DWIZ 882

Isang Pilipino na lumalaban para sa Russia ang napabalitang namatay sa nagpapatuloy na digmaan nito kontra Ukraine.

Kinilala ng Ukrainian Main Directorate of Intelligence ang Pilipinong Russian volunteer bilang si Jeric Jumadil Undol, isang 37 anyos na tubong Panamaw, Sulu.

Batay sa mga dokumento, unang lumipad si Undol patungong Moscow noong Abril upang sumapi sa Russian Army.

Binigyan siya ng isang-taong kontrata bago dumaan sa pagsasanay, at kalaunan, ipinadala sa Donetsk Region ng Ukraine, kung saan bahagi nito ang inookupa ng mga Ruso.

Ilang linggo lang ang itinagal ni Undol sa Russian-occupied Ukraine bago ito nasawi malapit sa bayan ng Katerynivka sa Donetsk Region.

Nauna nang nagbabala ang Department of Foreign Affairs sa mga Pilipino tungkol sa pagsali ng ilang indibidwal sa naturang digmaan matapos maiulat na apat na Filipino volunteer na nakikipaglaban para sa Russia ang naging prisoner of war ng Ukraine.| Sa panulat ni Anjo Riñon

Ipinababasura ng kampo ni Vice President Sara Duterte sa Quezon City Regional Trial Court ang tatlong kaso ng grave threats na inihain ng Department of Justice laban sa kanya kaugnay ng pagbabanta kina Pangulong Ferdinand Marcos Jr., First Lady Liza Araneta-Marcos at dating House Speaker Martin Romualdez.

Ayon sa abogado ng Bise Presidente na si Attorney Paul Lawrence Lim, naghain sila ng Motion to Quash the Information dahil sa kawalan ng hurisdiksyon.

Gayunman, tumanggi muna siyang magbigay ng karagdagang detalye dahil nakabinbin na sa korte ang usapin o sub judice.

Samantala, kinumpirma ni Prosecutor-General Richard Fadullon na natanggap na ng korte ang mosyon mula sa depensa ng Pangalawang Pangulo kung saan binigyan ang prosekusyon ng limang araw para magkomento bago resolbahin ang usapin.

Mariing nilinaw ni Fadullon na hindi protektado ang isang Bise Presidente sa ganitong uri ng kasong kriminal. | Sa panulat ni Reianne Antiquina

Sisimulan na ngayong araw ng Truth Commission na binuo ng Simbahang Katolika at mga civil society group ang una nitong pagdinig upang idokumento ang mga umano’y extrajudicial killings kaugnay ng kampanya kontra droga ng administrasyong Duterte.

Ayon kay dating ICC judge, Atty. Raul Pangalangan, isasagawa ang unang pagdinig sa Pope Pius Center sa Maynila.

Nilinaw ni Pangalangan na walang kapangyarihan ang komisyon na magsampa ng kaso o magbigay ng hatol, pero layunin nitong pakinggan ang mga biktima, tipunin ang kanilang testimonya, at gumawa ng ulat na maaaring isumite sa mga ahensya ng pamahalaan at international human rights organizations.

Isa anya sa mga tatalakayin ang kaso ni Raymart Siapo, 19-anyos na napatay noong 2017 sa Navotas habang ilalahad din ang resulta ng pagsusuri sa kanyang labi.

Ipinaliwanag din ni Pangalangan na hindi layunin ng komisyon na siraan ang sinuman kundi ilabas ang katotohanan.

Umaasa ang Kamara sa agarang pagtugon ng bagong kalihim ng Department of Health na si Dr. Edwin Mercado sa mga kakulangan at matagal nang hamon sa sektor ng kalusugan.

Kabilang sa mga isyung tinututukan ang zero-balance billing at pagpapalakas ng healthcare networks ng mga lokal na pamahalaan.

Kaugnay nito, nagpaabot ng pagbati si House Deputy Minority Leader at Akbayan party-list Representative Perci Cendaña kay Dr. Mercado sa kanyang bagong tungkulin.

Ayon kay Rep. Cendaña, umaasa siyang maisusulong ng bagong kalihim ang mga kinakailangang reporma upang mapalawak ang access sa abot-kaya at dekalidad na serbisyong pangkalusugan.

Binigyang-diin ng mambabatas na kailangang maging handa ang healthcare system sa pangangailangan ng mga Pilipino upang matugunan ang mga matagal nang problema sa kalusugan at matiyak na hindi maiiwan ang mga Pilipinong higit na nangangailangan ng serbisyong medikal.

Matatandaang si Dr. Mercado ay dating president at CEO ng PhilHealth bago itinalaga ni Pangulong Ferdinand Marcos Jr. bilang bagong Health Secretary nitong August 10, kapalit ni dating Health Secretary Dr. Jose Pujalte Jr. bilang dating pinuno ng PhilHealth.—sa panulat ni Reabelle Medina—ulat mula kay Geli Mendez (Patrol 30)

Iginiit ni House prosecutor at Bicol Saro party-list Representative Terry Ridon na papaliit na ang mundo ni Vice President Sara Duterte kaugnay ng pagsasama ng Department of Justice sa korte ng kasong grave threats laban sa Bise Presidente.

Ayon kay Rep. Ridon, asahang sabay-sabay nang ikakasa ang mga kasong kriminal at ang impeachment case laban kay VP Sara lalo na’t may aktwal na pagbabanta na ginawa ang Bise Presidente laban kina Pangulong Ferdinand Marcos Junior, at dating House Speaker Martin Romualdez.

Bukod dito, nilinaw ng mambabatas na walang epekto ang pagsasampa ng grave threats case sa nagpapatuloy na paglilitis.

Binigyang-diin ni Rep. Ridon na magkaiba ang saklaw ng dalawang proceedings dahil ang kriminal na kaso ay dinidinig sa regular na korte, habang ang mga alegasyon ng betrayal of public trust, maling paggamit ng confidential funds, at iba pang impeachable offenses ay sinusuri sa impeachment court.—sa panulat ni Reabelle Medina—ulat mula kay Geli Mendez (Patrol 30)

Natukoy at sinuri na ng Department of Energy ang mga posibleng lokasyon para sa nuclear power plant sa limang lalawigan sa Bataan, Palawan, Masbate, Pangasinan, at Camarines Norte.

Ayon sa DOE, bahagi ito ng paghahanda ng bansa para sa posibleng paggamit ng nuclear energy sa hinaharap.

Isinailalim sa paunang pagsusuri ang mga lugar, kasama ang technical assessment ng International Atomic Energy Agency, layuning mapalakas ang teknikal na basehan sa pagpili ng magiging site para sa unang nuclear power project ng Pilipinas.

Bukod dito, nakatuon din ang pamahalaan sa paghahanda ng imprastraktura, financing, safety, security, emergency preparedness, waste management, at pagsasanay ng mga manggagawang kailangan sa nuclear industry.

Kabilang sa pinag-aaralang paraan ng pagpopondo ang public-private partnerships at iba pang investment arrangements.—sa panulat ni Reabelle Medina

Hinatulan ng Quezon City Regional Trial Court ng 10 hanggang 12 taong pagkakakulong ang dating hepe ng PNP Custodial Service Unit na si Police Lt. Col. Jigger Noceda dahil sa sexual assault laban sa dating Ozamiz City Vice Mayor Nova Princess Parojinog.

Ayon sa korte, naganap ang insidente noong 2020 habang nakakulong si Parojinog sa PNP Custodial Center sa Camp Crame.

Bukod sa pagkakakulong, inatasan din si Noceda na magbayad kay Parojinog ng P150,000 para sa civil indemnity, moral damages at exemplary damages.

Nagsampa ng reklamo si Parojinog laban kay Noceda, na kalaunan ay sumailalim sa imbestigasyon ng PNP.

#DWIZ #DWIZNews #DWIZ882AM

Nagpaalala muli ang Department of Education sa mga empleyado nito na mahigpit na ipinagbabawal ang pagsasangla o pagsuko ng ATM payroll card bilang garantiya sa utang, o ang tinatawag na “sangla-ATM.”

Ayon sa DepEd Memorandum No. 049, s. 2026, mataas ang panganib ng ganitong gawain dahil maaari itong humantong sa hindi kontroladong pag-withdraw ng pera, pagsasamantala sa empleyado, labis na pagkakautang, at maling paggamit ng personal na impormasyon.

Hinikayat ng DepEd ang mga kawani na maging maingat sa pagkuha ng pautang at umiwas sa mga hindi awtorisadong nagpapautang na may mataas na interes at mapang-abusong kondisyon.

Sa halip, pinapayuhan silang gumamit ng mga lehitimo at reguladong lending facilities.

Kabilang dito ang mga loan program ng GSIS, DepEd Provident Fund, LandBank, at Pag-IBIG Fund, gayundin ang mga lending company na rehistrado at lisensyado ng Securities and Exchange Commission.

Mahigpit na pagsunod sa naturang paalala ang ipinag-utos sa lahat ng tanggapan at paaralan ng DepEd.—sa panulat ni Reabelle Medina