DWIZ 882

Natatwa na lang si Senate Minority Leader Vicente “Tito” Sotto the Third sa akusasyon ni Senador Imee Marcos kaugnay sa pag-amyenda sa Konstitusyon.

Paliwanag ni Sotto, biro lang ang impormasyon na gagawing kada rehiyon ang pagboto sa mga senador at ang posibleng pagdami ng mga miyembro nito.

Kumalat lang anya ang kwento noong ibinahagi ni Senador Panfilo Lacson ang nasabing biro sa kanyang sariling grupo.

Nagtataka rin siya kung saan nanggaling ang akusasyon ni Senador Marcos gayong tinututulan niya ang anumang pag-amyenda sa Konstitusyon.—sa panulat ni Anjo Riñon

Tiniyak ng Department of Justice ang pagiging bukas sa panig ni Senador Robin Padilla ukol sa isyu at alegasyon ng pagtulong umano nito para makatakas si Senador Ronald “Bato” dela Rosa.

Ito ang inihayag ni Justice Secretary Frederick Vida kasabay ng nagpapatuloy na imbestigasyon ng Special Panel of Prosecutors sa mga nangyari kamakailan sa Senado.

Ayon kay Vida, maaari anyang tumungo si Padilla sa DOJ upang magbigay ng paliwanag kaugnay sa mga alegasyon na kanyang kinakaharap.

Binigyang-diin din ng kagawaran na handa silang tumanggap ng pahayag at impormasyon na magmumula kaninuman na posibleng makatulong sa umuusad na imbestigasyon.—sa panulat ni Anjo Riñon

Nakatakdang magpalabas ng subpoena ang National Bureau of Investigation sa ilang mga indibidwal para magbigay-linaw sa nangyaring pagtakas ni Senador Ronald “Bato” dela Rosa sa Senado kamakailan.

Ayon kay NBI Director Melvin Matibag, kabilang sa mga ipa-subpoena ng ahensya ang mga huling nakausap o tinawagan ng senador.

Pinag-aaralan na rin aniya ng NBI na ipa-subpoena ang misis ni dela Rosa para magpaliwanag at magbigay-linaw sa kanyang post sa social media.

Matatandaang sinabi ng nasabing maybahay na ginamit umano ng kanyang mister ang insidente ng barilan sa Senado bilang oportunidad para makatakas.—sa panulat ni Anjo Riñon

Nanindigan ang limang pamilyang natitira na nagsusulong ng kaso laban sa puganteng negosyanteng si Charlie “Atong” Ang kaugnay sa mga nawawalang sabungero na hinding-hindi sila tatanggap ng anumang suhol.

Ayon kay Charlene Lasco, kapatid ng isa sa mga “missing sabungeros,” limang taon na silang naghahanap ng hustisya, kaya hindi sila uurong sa kaso.

Magkakasamang nagtungo sa Department of Justice sina Lasco at iba pang kamag-anak ng mga nawawalang sabungero upang magsampa ng reklamong obstruction of justice laban sa isa sa mga abogado ni Ang na si Atty. Caroline Cruz at iba pang kasabwat nito.

Dagdag pa ni Lasco, inalok ni Atty. Cruz ang ilang pamilya kapalit ng hindi pagdalo sa mga pagdinig kaugnay sa kaso ng mga nawawalang sabungero.—sa panulat ni Anjo Riñon

#dwiz #dwiznews #aliw23

Imposibleng ma-convict si Vice President Sara Duterte.

Ito ang pananaw ng political analyst na si Lito Banayo sa nalalapit na pagsisimula ng impeachment trial ng pangalawang pangulo.

Nabatid na, ayon sa Konstitusyon, two-thirds, o 16 sa 24 na senador, ang dapat bumoto ng pabor upang ma-convict si VP Sara.

Gayunman, labing-isa lamang ang miyembro ng Senate Minority, na posibleng bumoto sa pag-convict sa bise presidente.

Naniniwala rin si Banayo na walang isang salita ang kasalukuyang administrasyon; at wala silang alternatibo kung kukulangin ang boto sa pag-convict, o kahit sa pag-acquit, sa pangalawang pangulo. —sa panulat ni Anjo Riñon

Naniniwala ang political analyst na si Lito Banayo na malabong mangyari ang isang constituent assembly (Con-Ass) upang palitan o amyendahan ang 1987 Constitution.

Sinabi ito ni Banayo matapos ang ugong-ugong na may mga planong amyendahan ang Saligang Batas sa gitna ng mainit na tensyon sa pulitika.

Ayon kay Banayo, pinakatampok sa mga umuugong na amyenda sa Konstitusyon ang dami ng mga senador at kung papaano sila iboboto ng taumbayan; gayundin ang pagbabago sa minimum age ng pagtakbo sa mga matataas na halal na posisyon, tulad ng pangulo, pangalawang pangulo, at mga senador.

Seryoso rin anyang usapin ang pagpalit sa Saligang Batas, kaya mabuting nilinaw nina Senador Tito Sotto at Panfilo Lacson na biro lamang ang usaping con-ass, na naging laman naman ng privilege speech ni Senador Imee Marcos kamakailan. —sa panulat ni Anjo Riñon

Nangako ang Department of Justice na dadaan sa patas at masusing imbestigasyon ng reklamong obstruction of justice na kinakaharap ni Senador Robin Padilla.

Nilinaw ng DOJ na dumaraan sa karaniwang proseso ng pagsusuri ang ipinatutupad sa lahat ng kasong inihain sa kagawaran.

Inilabas ang naturang pahayag matapos kumpirmahin ni Prosecutor General Richard Anthony Fadullon na naisumite na ng PNP Criminal Investigation and Detection Group ang reklamo laban kay Padilla.

Ayon sa CIDG, naging instrumento ang senador sa pagtakas ni Senador Ronald “Bato” Dela Rosa sa Senado noong Mayo a-katorse.

Samantala, katulad ng anumang reklamong ihahain sa kanila, susuriin ng DOJ ang kaso laban kay Padilla alinsunod sa itinakdang pamamaraan at alituntunin.

Isasalang anila ang reklamo sa preliminary investigation; at sakaling makitaan ng sapat na basehan ng mga isinumiteng ebidensya, pormal itong iaakyat sa korte para idaos ang paglilitis. —sa panulat ni Anjo Riñon

Inihayag ni Interior and Local Government Secretary Jonvic Remulla na hindi pa rin inaalis sa imbestigasyon si Senate President Alan Peter Cayetano kaugnay ng shooting incident sa Senado noong Mayo 13.

Ayon kay Remulla, patuloy na inaalam ng Philippine National Police kung sino ang nagbigay ng utos sa dating Senate Sergeant-at-Arms na si Mao Aplasca.

Sinabi niya na posibleng tanungin si Aplasca kung sino ang nag-utos sa kanya sa insidente, at hindi pa rin isinasantabi ang iba pang posibleng sangkot, kabilang ang ilang opisyal.

Patuloy ang imbestigasyon habang sinusuri ng mga awtoridad ang posibleng ugnayan ng mga pangyayari sa loob at labas ng Senado.