DWIZ 882

Iginiit ni Senador Erwin Tulfo na dapat manatiling miyembro ng mga komite ng Senado sina Senador Jinggoy Estrada at Rodante Marcoleta kahit sila ay kasalukuyang nakadetine.

Gayunman, hindi aniya dapat silang payagang bumoto dahil hindi sila makakadalo sa mga sesyon.

Ikinumpara ni Sen. Tulfo ang sitwasyon sa dating Senador at kasalukuyang party-list representative Leila de Lima, na nanatiling miyembro ng komite at nakapaghain ng mga panukalang batas noong siya ay nakadetine.

Aniya, dapat pareho ang pagtrato kina Marcoleta at Estrada.

Matatandaang si Sen. Marcoleta ay nakapiit kaugnay ng pitumpu’t limang milyong pisong plunder case, habang si Sen. Estrada naman ay nahaharap sa limangdaan pitumpu’t tatlong milyong pisong plunder charge at isang graft case.—sa panulat ni Reabelle Medina

Parehong may kinakaharap na kasong grave threats sina Vice President Sara Duterte at kapatid na si Davao City Rep. Paolo “Pulong” Duterte dahil sa isang bagay na napansin ng House Prosecution Panel.

Ayon kina House Prosecutor Terry Ridon at House Prosecution Spokesperson Zia Alonto Adiong, napapatanong ang taumbayan kung nananalaytay ba sa dugo ng pamilya Duterte ang pagiging marahas.

Reaksyon ito ni Ridon at Adiong matapos samahan ni VP Sara ang kanyang kapatid sa arraignment nito kaugnay ng kasong grave threats.

Sinabi ng dalawang mambabatas na nauunawaan nila na bilang kapatid ay may sapat na oras si VP Sara para samahan at suportahan si Congressman Duterte.

Pero nakadidismaya umano na nakapaglaan ang Bise Presidente ng oras para samahan ang kanyang kapatid, ngunit hindi naman anila ito makahanap ng panahon para harapin ang sarili nitong impeachment trial.

Dagdag pa ng prosecution team, mas makabubuti sanang harapin ni VP Sara ang mga alegasyon laban sa kanya, lalo’t nakasalalay dito ang usapin ng kanyang panunungkulan. | via Geli Mendez (Patrol 30)

Nanawagan sa Kongreso si House Deputy Minority Leader at Akbayan Party-list Rep. Chel Diokno na agarang ipasa at isabatas ang panukalang P200 na umento sa sahod ng mga manggagawa.

Kasunod ito ng inilabas na preliminary injunction ng Pasig Regional Trial Court Branch 152 laban sa P85 wage increase sa National Capital Region.

Ayon kay Diokno, nakalulungkot na hindi muna maipatutupad ang dagdag-sahod habang nakabinbin ang kaso sa korte kaya marapat lamang agad na kumilos ang mga mambabatas sa Kamara at Senado at isabatas ang P200 daily wage hike.

Iginiit ni Diokno na malinaw umano sa Article 126 ng Labor Code na hindi maaaring maglabas ang alinmang hukuman ng temporary restraining order, preliminary injunction o permanent injunction laban sa anumang wage order.

Bukod pa dito, nakasaad naman sa Article 123 ng Labor Code ang tamang proseso para iapela ang isang wage order, at hindi umano ito dapat ihain sa Regional Trial Court.

Para kay Diokno, panahon na para kumilos ang Kongreso upang matiyak ang mas patas at mataas na sahod para sa mga manggagawa. | via Geli Mendez (Patrol 30)

Nanawagan si Parañaque 2nd District Rep. Brian Yamsuan na gumamit ng science-based solutions, kasabay ng pagpapaigting ng disiplina ng mamamayan sa tamang pagtatapon ng basura, upang tuluyang matugunan ang problema ng paulit-ulit na pagbaha, partikular sa mga mabababang lugar sa bansa.

Para kay Yamsuan, maaaring gamitin ang mga backhoe, mobile pumping station at dredger bilang agarang solusyon sa baha, pero kailangan aniya’ng tutukan ang pangmatagalang hakbang gaya ng science-based urban planning at mahigpit na pagpapatupad ng mga batas sa waste disposal.

Iginiit ni Yamsuan na dapat gawing mas madali ng mga lokal na pamahalaan ang tamang pagtatapon ng basura, kabilang ang paglalagay ng mga segregated trash bin sa mga strategic locations.

Dapat ding tugunan ng mga LGU ang problema ng informal settler sa kanilang mga komunidad at magkaroon ng programang magpapadali at magpapalapit sa mga residente sa tamang pagtatapon ng kanilang basura.

Sa kasalukuyan, regular ang pakikipag-ugnayan ni Yamsuan kay DPWH Secretary Vince Dizon para sa mga hakbang laban sa pagbaha sa Metro Manila, partikular sa kanyang nasasakupan.

Nagpadala na ang DPWH ng mga backhoe at mobile pumping station, habang nakatakda ring ipatupad ang flood interceptor project sa Dr. Santos Avenue.

Nangako naman si Dizon na kanyang imumungkahi sa ilalim ng 2027 National Budget ang pag-upgrade ng mga lumang dike at pagtatayo ng detention basins sa ilalim ng mga basketball court at open spaces gaya ng proyektong ipinatupad sa Maynila at Quezon City. | via Geli Mendez (Patrol 30)

Pinalagan ni House Prosecutor at Akbayan Party-list Rep. Chel Diokno ang mga trolls matapos muling iniuugnay ang kanyang pangalan sa confidential funds ng Office of the Vice President (OVP).

Matatandaang sa impeachment trial ni Vice President Sara Duterte, lumutang sa mga acknowledgment receipts ang pangalang “Jose Diokno Jr.” na sinasabing nakatanggap ng P120,000 bilang payment of reward para sa purchase of information sa ilalim ng confidential funds.

Nilinaw ni Diokno na hindi siya ang tinutukoy sa acknowledgement receipts at ang kanyang buong pangalan ay Jose Manuel Tadeo “Chel” Diokno at hindi “Jose Diokno Jr.”

Aniya, wala rin umano siyang “Junior” sa kanyang pangalan at sa kanilang pamilya.

Iginiit ni Diokno na kailanman ay hindi siya nakatanggap ng confidential funds at hindi rin siya naging ahente ni VP Sara.

Matagal na umano siyang iniuugnay sa isyu para sirain ang kanyang pangalan at kung igigiit ng mga trolls na nakatanggap siya ng confidential funds, aniya, para na rin nilang inamin na mali ang paggastos ni VP Sara sa pondo ng bayan.

Para kay Diokno, hindi dapat gamitin ang “confidential” bilang palusot sa paggamit ng pera ng bayan at ang anumang pondo, kabilang ang confidential funds, ay dapat ginagastos nang tama at may malinaw na dokumentasyon. | via Geli Mendez (Patrol 30)

Ikinalugod ng House prosecution team ang pagsasampa ng Department of Justice (DOJ) ng kasong grave threats laban kay Vice President Sara Duterte.

Nag-ugat ang reklamo sa alegasyon ng pagbabanta ni VP Sara sa buhay nina Pangulong Ferdinand Marcos Jr.; First Lady Liza Araneta-Marcos; at dating House Speaker Martin Romualdez.

Ayon kay House Lead Prosecutor Gerville Luistro, patunay lamang ito na ang pagsasampa ng kaso ay “no one is above the law” o walang sinuman ang mas mataas sa batas.

Para naman kay Mamamayang Liberal Party-list Rep. at House Prosecutor Leila de Lima, “panahon na” at “dapat lang” na masampahan ng reklamo ang Bise Presidente.

Matatandaang nangyari ang sinasabing pagbabanta ni VP Sara sa isang online press conference noong November 2024 kung saan, may nakausap na umano ang Bise Presidente na gunman para ipapatay ang Pangulo ng bansa.

Ang grave threats ni VP Sara ang naging paksa ng Article 4 ng impeachment case at ito ang unang artikulo na tinalakay at nilitis sa Senate Impeachment Court. | via Geli Mendez (Patrol 30)

Tiniyak ni House Speaker Faustino “Bodjie” Dy III na mananatiling bukas at transparent sa publiko ang proseso ng mahigpit na pagbusisi ng Kamara sa panukalang 2027 National Budget.

Ito’y matapos isumite ng Department of Budget and Management o DBM sa House of Representatives ang 2027 National Expenditure Program o NEP na nagkakahalaga ng P7.2 trillion sa pangunguna ni Budget Secretary Kim Robert De Leon, kasama ang iba pang opisyal ng ahensya.

Ayon kay Dy, mula pa noong nakaraang taon ay nagpatupad na ang Kamara ng reporma para sa mas mahigpit na pagsusuri sa pambansang pondo, kabilang ang pagbuo ng Budget Amendments and Review Subcommittee o BARSC at ang live-streaming ng bicameral meetings.

Iginiit ni Dy na sisiguraduhin ng Kamara na ang 2027 NEP ay talagang nakatutok sa pangangailangan ng mga Pilipino at kanilang susuriin ang bawat ahensya kung ano ang konkretong ibubunga ng pondong ilalaan dito.

Nabatid na mas mataas ng anim na porsyento ang panukalang P7.2-trillion budget kumpara sa P6.793 trillion na pondo ng gobyerno ngayong taon.

Binigyang-diin ni Dy na malinaw ang kanilang sukatan, na hindi dapat manatili lamang sa papel ang budget kundi dapat ramdam ng bawat Pilipino sa pamamagitan ng mas maayos na trabaho, serbisyo at suportang ipinangako ng gobyerno.

Dagdag pa ng lider ng Kamara na sa bagong Kongreso, ang bawat piso ay dapat napakikinabangan ng mga Pilipino. | via Geli Mendez (Patrol 30)

Tiwala si Pwersa ng Pilipinong Pandagat o PPP Party-list Rep. Harold Duterte na lilipas din ang lahat ng hakbang laban sa kanyang pinsan na si Vice President Sara Duterte.

Ito’y matapos magsampa ang Department of Justice o DOJ ng kasong grave threats laban sa Bise Presidente sa Quezon City Regional Trial Court, habang nagpapatuloy din ang impeachment trial.

Ayon sa kongresista, noong November 2024 pa nangyari ang sinasabing pagbabanta ni VP Sara laban sa buhay ni Pangulong Ferdinand Marcos Jr. at ng kanyang pamilya at noong January 30, 2025 ay nagsumite na ang National Bureau of Investigation o NBI ng affidavit of investigation sa DOJ.

Batay anila sa rules ng DOJ, dapat mareresolba ang kaso sa loob ng 100 araw.

Kwestiyonable para kay Cong. Harold kung bakit makalipas ang mahabang panahon ay ngayon lang nagsampa ng kaso sa korte ang DOJ at nataon pa ito sa pagtalakay sa impeachment trial sa isyu ng grave threats laban sa Pangulo.

Kumpiyansa ang mambabatas na lilipas din ang naturang mga hakbang laban sa Bise Presidente.

Pinagtibay ng House Committee on Ways and Means ang mga panukalang batas na layong magbigay ng mas malaking tax relief sa mga manggagawa at maliliit na negosyante.

Kabilang dito ang panukalang itaas ang annual taxable income exemption ceiling sa P350,000 mula sa kasalukuyang P250,000.

Sa ilalim nito, ang mga manggagawang may taunang taxable income na P350,000 o mas mababa ay magiging exempted sa personal income tax, na inaasahang magdudulot ng mas malaking take-home pay para sa low at middle-income workers.

Kasama rin sa mas pinalawak na tax reform package ang pag-exempt ang microenterprises sa 2-percent minimum corporate income tax o MCIT upang makatulong sa mga individual taxpayers at small businesses.

Ang dalawang panukala ay akda nina House Speaker Faustino Dy III at House Majority Leader Sandro Marcos, na pinagtibay ng komiteng pinamumunuan ni Marikina Rep. Miro Quimbo.

Ayon kay Quimbo, layunin ng tax relief para sa microenterprises na matulungan ang maliliit na negosyo na makabawi sa operasyon, mapanatili ang kanilang mga empleyado at maiwasang magsara ang kanilang pinagkakakitaan.