Isinusulong ni Parañaque 2nd District Rep. Brian Yamsuan ang panukalang batas na naglalayong itaas ang sahod ng mga guro ng Special Needs Education o SNED, bilang hakbang para tugunan ang kakulangan ng mga gurong tumutulong sa mga mag-aaral na may disabilities.
Sa inihaing House Bill 5574 ni Yamsuan, target itaas ang minimum salary grade ng SNED teachers mula Salary Grade 14 na may basic pay na P38,764… patungong Salary Grade 16 na katumbas ng P45,694 ngayong taon at P47,829 sa taong 2027.
Binigyang-diin ni Yamsuan ang kahalagahan na may sapat na mga SNED teachers kung saan, noong School Year 2024-2025… umabot ng mahigit 391,000 learners with disabilities ang naka-enroll sa public schools, na mayroon lamang 6,000 SNED teachers.
Batay sa pag-aaral ng Second Congressional Commission on Education o EDCOM 2, 32 percent lamang ng mga disabled students ang may nakatalagang SNED teacher sa kanilang paaralan.
Para kay Yamsuan, makatutulong ang pagtaas ng sahod upang maengganyo ang mas maraming qualified teachers na manatili sa bansa at magturo sa public schools.
Sa ilalim ng panukala, bibigyang-prayoridad ang salary increase ng SNED teachers, at aatasan ang DepEd na maghanda ng programmed budget para sa pagtaas ng sahod sa loob ng limang taon.
Umaasa ang mambabatas na susuportahan at pabibilisin ng Kongreso ang pagpasa sa panukala na magbibigay ng pantay na oportunidad, inklusibo, konkreto, at epektibong hakbang sa edukasyon tungo sa pag-unlad ng mga mag-aaral.
