Pinalagan ni House Prosecutor at Bicol Saro Partylist Rep. Terry Ridon ang aniya’y “imbentong pahayag” ni Baguio City Mayor Benjamin Magalong na may mga mambabatas umanong sangkot sa flood control scandal at may budget insertions, kabilang ang mga nangunguna sa impeachment case laban kay Vice President Sara Duterte.
Hinamom ni Ridon si Magalong na pangalanan ang mga prosecutor na sinasabi nitong may “budget insertions.”
Iginiit ni Ridon na “fake news” at walang basehan ang paratang ni Magalong dahil ang 2026 General Appropriations Act ay dumaan sa mga hakbang para tanggalin at ipagbawal ang insertions, alinsunod sa nais ng Kongreso at ni Pangulong Ferdinand Marcos Jr.
Bukod pa dito, wala pa aniya deliberasyon sa 2027 national budget at ang Executive Branch ang nagtatakda ng nilalaman ng 2027 National Expenditure Program o NEP bago ito isumite sa Kongreso.
Paliwanag ni Ridon, paano magkakaroon ng insertions o “pork barrel” ang House prosecutors kung wala pa namang deliberasyon sa 2027 budget?
Nagbabala si Ridon na baka maulit ang nauna nang paratang ni Magalong na may 67 kongresistang kasabwat sa katiwalian na hindi naman pinangalanan ng alkalde.
Sa kabila nito, tiniyak ni Ridon na mananatiling nakatutok ang House prosecution panel sa impeachment trial at hindi magpapaapekto sa mga paratang o tangkang durugin ang kanilang kredibilidad.
