Dismayado ang mga grupo ng manggagawa sa utos ng Pasig City Regional Trial Court na preliminary injunction laban sa 85-pesos minimum wage hike sa Metro Manila, sa araw mismo matapos mapasò ang nauna nitong TRO o temporary restraining order.
Ayon sa Nagkaisa Labor Coalition, isang “legal bombshell” ang nasabing injunction dahil sa halip na matapos anila ang suspensyon sa dagdag-sahod, mas pinahaba pa ito ng korte.
Iginiit ng grupo na hindi dapat maging permanenteng “waiting room” ng mga manggagawa ang naturang preliminary injunction.
Samantala, tutol din ang Sentro ng mga Nagkakaisa at Progresibong Manggagawa sa desisyon ng Pasig City RTC na suspendihin ang wage increase dahil hindi anila dapat pigilan ng korte ang mga manggagawa na makatanggap ng dagdag-sahod.
Binigyang-diin ng labor groups na hindi dapat maging dahilan ang anumang halaga ng pera para tanggapin ang pag-aalis ng umento sa sahod sa mga manggagawang hirap nang itawid ang kanilang pang-araw-araw na pangangailangan. | mula sa panulat ni Jordan Gutierrez
