DWIZ 882

Humihingi na ang Commission on Elections ng desisyon sa Kongreso kung matutuloy ba ang Barangay at Sangguniang Kabataan Elections sa Nobyembre.

Ito’y sa harap na rin ng nalalapit na pagsisimula ng filing of candidacy sa Setyembre 28 hanggang Oktubre 5.

Ayon kay Comelec Chairman George Garcia, mahalagang malinaw na ito bago maghain ng Certificate of Candidacy ang mga kandidato.

Sa kasalukuyang batas, nakatakdang idaos ang BSKE sa November 2, 2026, gayunman, may mga panukala sa Senado na ipagpaliban ang eleksyon at palawigin ang termino ng mga barangay at SK official.

Inaprubahan na ng Senado nitong August 24 ang panukala ni Senador Chiz Escudero na ilipat ang nakatakdang BSKE sa November 2028 at gawing limang taon ang agwat ng mga susunod na eleksyon.

Binigyang-diin ni Comelec Chairman Garcia na maaari namang itakda ang limang taong termino sa mga opisyal na mahalal sa Nobyembre upang matuloy ang 2026 elections.—sa panulat ni Jordan Gutierrez

Dinala si Senador Jinggoy Estrada sa Cardinal Santos Medical Center sa Greenhills, San Juan City kahapon, matapos sumailalim sa knee X-ray at makaranas ng pananakit ng tuhod.

Pansamantalang inilabas ang senador sa New Quezon City Jail para makatanggap ng medical attention.

Ayon kay Orthopedics Doctor Fernando Syquia, na siyang sumuri kay Senador Estrada, may napunit na bahagi ng kaliwang tuhod ng senador, na iniuugnay sa maling posisyon ng pagtayo.

Ang kanang tuhod naman ni Senador Estrada ay matagal nang may osteoarthritis, at kasalukuyang mino-monitor at binibigyan ng anti-inflammatory medication.

Nilinaw ni Doctor Syquia na posibleng sumailalim sa surgery si Senador Estrada kung lala ang kondisyon ng tuhod at maging sagabal ito sa kanyang pangkalahatang kalusugan. | Sa panulat ni Jordan Gutierrez

Tumaas ang meat imports ng Pilipinas sa unang pitong buwan ng taong kasalukuyan.

Ayon sa Bureau of Animal Industry, umabot sa 1.02 million metric tons ang karneng inaangkat ng bansa mula Enero hanggang Hulyo 2026, o katumbas ng 11% na pagtaas mula sa naitalang 919,827 metric tons sa kaparehong panahon noong 2025.

Karneng baboy ang mahigit kalahati sa mga inangkat na meat products sa nabanggit na panahon sa 53%, o katumbas ng 541,405 metric tons; o mahigit 10% na mas mataas kaysa sa naitalang 490,825 metric tons noong nakaraang taon.

Tumaas din ang pag-aangkat ng bansa sa karneng manok at karneng kalabaw, habang bahagya namang bumaba ang beef imports.

Samantala, nananatiling pangunahing supplier ng karne ang Brazil, na bumubuo sa 48% ng mga meat imports, habang sinundan naman ito ng Estados Unidos, Australia, Netherlands, at Canada. | Sa panulat ni Anjo Riñon.

Hindi uurong ang Department of Labor and Employment (DOLE) sa laban para sa ₱85 dagdag-sahod sa National Capital Region (NCR) matapos palawigin ng Pasig Regional Trial Court(RTC) ang suspensyon nito.

Ayon kay Labor Secretary Francis Tolentino, hindi lamang pinigilan ng desisyon ang dagdag-sahod kundi inalis din umano ang karagdagang kita na maaaring makatulong sa pagkain at pang-araw-araw na pangangailangan ng mga pamilya.

Iginiit ni Tolentino na ipaglalaban ng DOLE ang karapatan ng mga manggagawa hanggang makahanap ng solusyon at makuha nila ang nararapat na dagdag-sahod.

Dismayado si House Deputy Minority Leader at Akbayan Partylist Rep. Perci Cendaña, sa pagpapalawig ng suspensyon sa P85 wage increase sa National Capital Region.

Ito ay matapos maglabas ng preliminary injunction ang Pasig Regional Trial Court, na pumipigil sa pagpapatupad ng dagdag-sahod para sa mga minimum wage earner sa Metro Manila.

Ayon kay Cendaña, mistulang ninakawan at na-snatch ang dagdag na kita ng mga manggagawa dahil sa patuloy na pagkaantala sa implementasyon ng wage increase.

Aniya, dahil sa naunang temporary restraining order ng korte, nasa P780 na ang hindi pa natatanggap na dagdag-sahod ng mga minimum wage earners.

Nangangamba si Cendaña na posibleng lalo pang lalaki ang halagang ipinagkakait sa mga manggagawa habang nananatiling suspendido ang pagpapatupad ng P85 wage hike.

Dahil dito, muling nanawagan sa Kongreso ang mambabatas na madaliin ang pagpasa sa panukalang P200 daily minimum wage increase.

Aniya, kailangan nang kumilos ang mga mambabatas upang matiyak na makatatanggap ang mga manggagawa ng dagdag-sahod na makatutulong sa kanilang pang-araw-araw na pangangailangan. | via Geli Mendez (Patrol 30)

Kinuwestiyon ni Capas, Tarlac Mayor Roseller Rodriguez ang aniya’y kawalan ng konsultasyon sa lokal na pamahalaan kaugnay ng planong Pax Silica Industrial Hub.

Ayon kay Mayor Rodriguez, walang isinagawang malinaw na konsultasyon tungkol sa proyekto.

Inimbitahan lamang anya ang mga opisyal ng Capas sa isang meeting noong June 22, ngunit walang ibinigay na detalye tungkol sa agenda.

Anya, nabanggit lamang ang Pax Silica bilang isang technological hub, bago lumabas ang mas maraming impormasyon tungkol dito sa media.

Bunsod nito, hiniling ng alkalde sa Bases Conversion and Development Authority ang isang makabuluhang public consultation na dadaluhan ng lahat ng apektadong sektor.

Samantala, ayon naman sa BCDA, nakansela ang unang planong konsultasyon at nakatakda itong isagawa sa August 19.

Kaugnay nito, hiniling ni Senador Kiko Pangilinan sa BCDA na pabilisin ang proseso ng konsultasyon, dahil kailangang maipabatid sa mga lokal na stakeholder ang mga detalye ng proyekto.—sa panulat ni Reabelle Medina