DWIZ 882

Kinumpirma ng Department of Justice na sumasailalim sa evaluation ang reklamo ng Philippine National Police laban sa ama ng estudyanteng sangkot sa pamamaril sa Ateneo de Zamboanga University nitong Agosto 18.

Ayon kay DOJ Undersecretary Ian Norman Dato, naghain na ang PNP sa Office of the City Prosecutor sa Zamboanga City ng kasong reckless imprudence resulting in homicide and physical injury laban sa ama ng suspek.

Susundin anya ang due process at inaasahang magpapadala ng subpoena sa mga respondent upang mabigyan ng pagkakataong sumagot sa mga paratang.

Isinampa ang reklamo matapos makumpleto ng pulisya ang imbestigasyon sa pamumuno ng Police Regional Office 9 Special Investigation Task Group at makalap ang mga ebidensya kaugnay ng pamamaril.

Batay sa imbestigasyon ng PNP, lumalabas na may pananagutan ang ama dahil sa pagkakaroon ng access ng kanyang anak sa kanyang government-issued at personal na mga baril.—sa panulat ni Jordan Gutierrez

Umaasa si Senate President Sherwin Gatchalian na maipatawag bilang testigo si dating OVP Chief Security Officer Col. Raymund Lachica sa impeachment trial laban kay Vice President Sara Duterte.

Ayon kay Senate President Gatchalian, mahalaga ang testimonya ni Lachica dahil batay sa mga pahayag ng huling mga testigo, sa kanya humihinto ang money trail ng 500-million peso confidential funds.

Kinumpirma na rin ni dating Special Disbursing Officer Gina Acosta na siya mismo ang nagbigay ng pondo kay Lachica para sa confidential activities mula fourth quarter ng 2022 hanggang third quarter ng 2023.

Ipinunto ni Senador Gatchalian na bilang senator-judge, mahalaga para sa kanya na marinig mismo si Lachica at maaaring ikonsidera ng korte ang pagdalo nito sa paglilitis kung kailangan.

Nauna nang inihayag ni Lachica na handa siyang “magsabi ng totoo” kung ipatawag sa pagdinig, gayunman, nagpahayag na noon ang House prosecutors na hindi na nila planong iharap si Lachica bilang testigo dahil sapat na ang testimonya ni Acosta.—sa panulat ni Jordan Gutierrez

Namumuro ang big-time rollback sa presyo ng mga produktong petrolyo sa susunod na linggo dahil sa patuloy na pagbaba ng halaga ng krudo sa world market.

Bumaba nitong Agosto 24 hanggang 26 ang presyo ng diesel at kerosene sa P3.50 kada litro, habang P1.10 sa gasolina.

Kung magtutuloy ang pagbaba ng world crude oil prices, posibleng magbunga ito ng malaking pagbaba sa presyo ng mga produktong petrolyo sa bansa.

Matatandaang dalawang magkasunod na linggo nang tumaas ang presyo ng langis sa bansa, kung saan umabot sa P6.20-centavos kada litro ang itinaas ng diesel, habang P3.60 sa gasolina, at P6 sa kerosene o gaas.—sa panulat ni Jordan Gutierrez

#DWIZ #DWIZNews #DWIZ882AM

May “seryosong sakit” si Senador Loren Legarda at patuloy na naka-medical leave.

Ito ang inihayag ni Senate President Sherwin Gatchalian na tumanggi namang sabihin kung ano ang mismong sakit ng senador at iginiit na isa itong personal na issue.

Ikaapat na beses nang pinalawig ni Senador Legarda ang kanyang medical leave at nakatakdang magpatuloy ang pagliban hanggang Setyembre 2.

Nauna nang kinumpirma ng National Bureau of Investigation noong Agosto a-syete na pumunta si Senador Legarda sa France habang ang kanyang anak na si Batangas Rep. Leandro Leviste ay pumunta naman sa Hong Kong.

Matatandaang tinawag naman ng Office of the Ombudsman na “suspicious” ang dalawang buwang travel authority ni Cong. Leviste at ang pinahabang medical leave ni Senador Legarda, habang iniimbestigahan sa sinasabing sampung bilyong pisong solar energy contracts.—sa panulat ni Jordan Gutierrez

Hindi tumatanggap ng kanilang sahod ang mga senador na hindi pumapasok ngayon sa Senado, kabilang sina Senators Loren Legarda, Rodante Marcoleta, Jinggoy Estrada, at Ronald “Bato” Dela Rosa.

Ayon kay Senate President Sherwin Gatchalian, ang sweldong hindi kinukuha ng mga senador ay maaaring ideklarang savings at gagamitin sa iba pang gastusin ng Senado.

Samantala, nilinaw ni Senate President Gatchalian na nasa kamay ng Sandiganbayan kung papayagan sina Senators Estrada at Marcoleta na makadalo sa impeachment trial laban kay Vice President Sara Duterte.—sa panulat ni Jordan Gutierrez

Tinitingnan na ng House Prosecution Panel na gawing hostile witness si Defense Counsel Atty. Michael Poa sa nagpapatuloy na impeachment trial ni Vice President Sara Duterte.

Ayon kay House Trial Spokesperson Zia Alonto Adiong, maituturing na key witness si Atty. Poa sa usapin ng confidential funds ng Department of Education dahil sa kanyang naging papel bilang dating DepEd official.

Nabatid na kabilang din si Atty. Poa sa mga tumugon sa Audit Observation Memorandum ng Commission on Audit kaugnay ng naturang pondo noong kalihim pa ng kagawaran si Vice President Duterte.

Iginiit ni Cong. Adiong na makakatulong ang testimonya ni Atty. Poa upang maging malinaw ang pagtugon ng DepEd sa mga audit findings at iba pang dokumentong may kaugnayan sa kontrobersyal na confidential funds.

Nasa Senate Impeachment Court naman anya ang huling pasya kung papayagan si Defense Counsel Atty. Poa bilang hostile witness.—sa panulat ni Jordan Gutierrez

Nanawagan ang Management Association of the Philippines (MAP) ng “zero tolerance” sa kurapsyon at kwestyonableng paggamit ng pondo sa 2027 national budget.

Hinikayat ng MAP ang gobyerno na magpatupad ng end-to-end transparency para masubaybayan ng publiko ang paggamit ng pera ng bayan, mula sa pag-apruba ng pondo hanggang sa aktuwal na paggastos.

Dapat anilang ilantad ang lahat ng mahahalagang amendment at insertion sa budget, kabilang ang nagmungkahi, halaga at layunin nito, pati ang mga pagbabago sa Bicameral Conference Committee.

Binigyang-diin ng business group na hindi lang usaping pamamahala ang kurapsyon sa public spending kundi usaping pang-ekonomiya rin, dahil bawat pisong nawawala sa korapsyon ay pondong nawawala sa mga paaralan, ospital, imprastraktura, agrikultura at serbisyong panlipunan.—sa panulat ni Jordan

Inumpisahan na ng Senate Committee on Finance ang pagtalakay sa panukalang 7.2-trillion pesos national budget para sa 2027.

Ayon kay Finance Chairman JV Ejercito, “back to basic” ang Senado sa pagbuo ng budget para sa susunod na taon dahil titiyakin nilang tutugon ang pondo sa pangunahing pangangailangan ng mga Pilipino.

Sisiguraduhin anya ng Kongreso na hindi mauulit ang pag-aaksaya at pagwawaldas ng pondo ng bayan.

Iginiit din ng senador na hindi na dapat maging “business as usual” ang budget process at dapat matuto ang pamahalaan sa mga nakaraang pagkakamali upang maibalik ang tiwala ng publiko.

Tiniyak ni Senador Ejercito na mahigpit na ipagbabawal ang last-minute insertions sa Bicameral Conference Committee, habang ipagpapatuloy ang livestreaming ng bicam deliberations para sa transparency.

Ipatutupad din ang anti-epal provision na nagbabawal sa paggamit o pagpapangalan ng mga proyekto ng gobyerno gamit ang pangalan ng mga pulitiko.

Unang humarap sa budget briefing ang Development Budget Coordination Committee, kabilang sina Finance Secretary Frederick Co, Budget Secretary Kim Robert De Leon, Dep-Dev Secretary Arsenio Balisacan, at BSP Governor Eli Remolona Jr.—sa panulat ni Jordan Gutierrez

Binigyan ng Senate Impeachment Court hanggang Setyembre 2 ang mga bangko at financial institutions para isumite ang hinihinging financial records ni Vice President Sara Duterte, ng kanyang asawang si Atty. Manases Carpio, at ng 20 negosyo na may kaugnayan sa mag-asawa.

Inaprubahan ni Presiding Officer Senator Francis “Chiz” Escudero noong August 26 ang supplemental request ng prosecution para sa pagpapalabas ng mga subpoena, at inatasan ang mga institusyon na isumite ang mga dokumento sa Clerk of Court sa loob ng pitong araw.

Nilinaw ni Senador Escudero na peso-denominated accounts lamang ang saklaw ng kautusan at hindi kasama ang foreign currency deposits, maliban kung may nakasulat na pahintulot mula sa depositor.

Samantala, iginiit ni Defense Counsel Atty. Sheila Sison na may karapatang maghain ng objections ang depensa at gumamit ng mga legal remedy kaugnay ng mga ipina-subpoena na financial records ng kanilang kliyente.

Pinagbigyan din ng Impeachment Court ang hiling ng prosecution na ipatawag si Philippine Statistics Authority official Marissa Grande para sa pagdinig sa a-dos ng Setyembre 2.—sa panulat ni Jordan Gutierrez

Isinailalim na sa state of calamity ang buong Dinagat Islands dahil sa lumalalang krisis sa tubig na nakaaapekto o naglalagay sa agarang panganib sa mahigit 18,000 residente.

Ayon sa Provincial Disaster Risk Reduction and Management Council, mapapabilis ng deklarasyon ang mobilisasyon ng resources at mga hakbang para tugunan ang water shortage.

Tututukan din anila ang food at livelihood security ng mga magsasaka at mangingisda sa gitna ng krisis na nagpaubos ng pinagmumulan ng inumin at gamit na tubig sa naturang lalawigan.

Mahigit 18,000 Dinagatnon na ang apektado ng krisis sa suplay ng tubig, pagkaantala ng serbisyo, at pagdepende sa water hauling at rationing.

Ibinabala ng pamahalaang panlalawigan, hindi na lamang seasonal inconvenience ang krisis dahil maaari itong makaapekto sa kalusugan, sanitation, pagkain, kabuhayan at mahahalagang serbisyo.—sa panulat ni Jordan Gutierrez

#DWIZ #DWIZNews #DWIZ882AM