DWIZ 882

Ibinasura ng Sandiganbayan ang mga mosyon para sa leave to file demurrer to evidence na inihain ng mga kapwa akusado ni dating Kinatawan Elizaldy “Zaldy” Co sa kasong malversation na may kaugnayan sa umano’y ghost flood control projects.

Sa resolusyong isinulat ni Associate Justice Sarah Jane Fernandez, sinabi ng anti-graft court na ang pagbibigay ng pahintulot sa mga akusado na magsumite ng demurrer to evidence ay magdudulot lamang ng pagkaantala sa paglilitis.

Dahil dito, ipinag-utos ng korte na ituloy ang mga nakatakdang pagdinig para sa presentasyon ng ebidensya ng depensa.

Ang kaso ay may kaugnayan sa umano’y iregularidad sa pagpapatupad ng ilang flood control projects na sinasabing hindi naman naisagawa o natapos.

Gayunman, nilinaw ng korte na awtomatikong makakansela ang naturang mga pagdinig para sa sinumang akusado na maghahain ng demurrer to evidence nang walang pahintulot ng hukuman.

Naghain ng ethics complaint sa Kamara ang National Bureau of Investigation (NBI) laban kay Cavite 4th District Rep. Kiko Barzaga.

Dumating sa tanggapan ng House Secretary General si NBI Dir. Melvin Matibag para ihain ang kaso laban sa bagitong mambabatas.

Nakapaloob sa inihain na kaso ni Matibag, hinihiling nito na maimbestigahan at magkaroon ng disciplinary action kay Barzaga.

Nag-ugat ang paghahain ng kaso ni Matibag noong nagkaroon ng shooting incident sa Senado nitong Mayo 13, sa gitna ng tensyon kaugnay sa umano’y tangkang pag-aresto kay Sen. Ronald “Bato” dela Rosa dahil sa warrant na inilabas ng International Criminal Court.

Ayon kay Matibag, nandoon si Barzaga nang maganap ang insidente kung saan may mga “publication” o ipinost ang bagitong mambabatas na labag o “offensive” sa mga NBI.

Kabilang na dito ang paggamit ng “assasination” sa mga post ni Barzaga.

Nilinaw naman ni Matibag na hindi personal ang kaniyang inihain kundi para sa kapakanan rin ng mga tauhan ng NBI. | via Geli Mendez (Patrol 30)

Nagsimula na ang preliminary investigation ng Commission on Elections kaugnay sa umano’y donasyong natanggap ni Senador Francis Escudero noong nakaraang halalan.

Ayon kay COMELEC Chairman George Erwin Garcia, nagpadala na ang kanilang law department ng subpoena sa mga campaign donors para makuha ang kanilang paliwanag at dokumento.

Matapos nito, si Senador Escudero naman ang padadalhan ng subpoena upang mabigyan siya ng pagkakataon na sagutin ang mga reklamo laban sa kanya.

Nilinaw ni Garcia na ang kaso ay isang election offense lamang at hindi ito basehan para sa disqualification, lalo’t tapos na ang eleksyon.

Iginiit ni Assistant Ombudsman Mico Clavano na hindi dapat kailanman paghaluin ang usapin ng pananagutan at pulitika.

Kasunod ito ng pahayag ni Senator Jinggoy Estrada na maraming beses siyang inalok na talikuran ang Independent Majority Bloc kapalit ang pagbabasura sa kanyang kaso.

Ayon kay Assistant Ombudsman Clavano, dapat ding managot ang sinumang nagtatangkang palabuhin ang hangganan ng dalawang ito.

Binigyang-diin din niya na walang sinuman ang maaaring magdesisyon para sa Ombudsman kaugnay ng mga nakabinbing kaso, dahil ang ganitong hakbang ay maaari umanong maituring na isang anyo ng korapsyon.

Dagdag pa niya, matagal nang isinasagawa ang imbestigasyon sa mga naturang kaso at lantad naman sa publiko ang bawat hakbang ng proseso.

Aniya, malinaw at bukas sa pagsusuri ng publiko ang naging pag-usad ng mga imbestigasyon.

Sumuko si Senator Estrada matapos ilabas ng Sandiganbayan Fifth Division ang warrant of arrest dahil sa kasong plunder at graft. | via Jenn Patrolla (Patrol 38)

Nilinaw ni Interior Secretary Jonvic Remulla na inaresto ng mga tauhan ng Philippine National Police si Senador Jinggoy Estrada.

Ito’y taliwas sa naunang pahayag ni Sen. Estrada na sumuko siya sa mga otoridad kaugnay ng kasong plunder na isinampa sa kanya ng Office of the Ombudsman sa Sandiganbayan.

Nagkaroon din umano ng pagtatalo sa pagitan nina Remulla at Senate President Alan Peter Cayetano.

Ayon kay Cayetano, pumapayag naman ang Senado na arestuhin si Estrada sa labas ng gusali, kaya nagtataka siya na ginawa ito sa loob ng bulwagan ng Senado.

Kasama rin sina Senador Imee Marcos, Rodante Marcoleta, at ang magkapatid na Mark at Camille Villar nang nangyari ang insidente.

Samantala, sinabi rin ng kalihim na naaresto na rin ng mga otoridad ang tatlo pang kapwa-akusado ni Estrada; habang isinugod naman sa ospital si dating Public Works Secretary Manuel Bonoan matapos umano itong sumuko dahil sa hypertension. | Anjo Riñon

Pormal nang hiniling ni Vice President Sara Duterte sa Senate Impeachment Court na ibasura ang Articles of Impeachment na isinampa laban sa kanya.

Sa kaniyang isinumiteng sagot o tugon, iginiit ng kampo ni Duterte na may mga kakulangan umano sa reklamo dahil ito ay labag sa Konstitusyon, may depektong proseso, at kulang sa sapat na batayan.

Ayon sa legal team ng Bise Presidente, lumampas umano sa kapangyarihan nito ang House Committee on Justice, napaaga ang paghusga sa kaso, at umasa sa mga ebidensiyang iniharap matapos na siyang makapagsumite ng kaniyang tugon sa reklamo.

Kinuwestiyon din ng kampo ni Duterte ang pagsasama sa impeachment complaint ng mga alegasyong naganap bago pa man siya maupo bilang Bise Presidente.

Sa ngayon, hinihintay pa ang susunod na hakbang ng Senado bilang Impeachment Court kaugnay ng mosyon ng Bise Presidente na maibasura ang kaso. | via Jenn Patrolla (Patrol 38)

Naghain na si Vice President Sara Duterte, sa pamamagitan ng kanyang abogado, ng kaniyang sagot sa Senado na nakaupo bilang Impeachment Court.

Ayon sa defense team, nakasaad sa isinumiteng dokumento ang mga depensa ng Bise Presidente, kabilang ang mahahalagang usaping konstitusyonal, procedural at substantive na may kaugnayan sa Articles of Impeachment at sa naging pagdinig ng Kapulungan ng mga Kinatawan at ng Committee on Justice.

Sinabi rin ng kampo ni Duterte na hindi nito naaapektuhan ang mga isyung konstitusyonal na nakabinbin pa sa Korte Suprema.

Dagdag pa ng defense team, mas mainam na talakayin ang mga usaping nakasaad sa kanilang sagot sa loob ng Impeachment Court kaysa sa pamamagitan ng publisidad. | via Jenn Patrolla (Patrol 38)

Sumuko si Senador Jinggoy Estrada kay Interior Secretary Jonvic Remulla at sa mga tauhan ng PNP Criminal Investigation and Detection Group.

Ito’y matapos siyang kasuhan ng plunder ng Office of the Ombudsman sa Sandiganbayan ngayong araw.

Sa ginawa niyang press conference bago sumuko, iginiit ni Senador Estrada na hindi siya magpapakupkop sa Senado, katulad ng ginawa ni Senador Ronald “Bato” Dela Rosa kamakailan.

Sinabi rin niya na mananatili siyang bahagi ng Senate majority bloc, at hindi magpapatinag sa “anumang panggigipit, pananakot, at political maneuvering” para talikuran ang ang kanyang paninindigan.

Ibinilin na rin ni Estrada sa Senate Secretary na ipagpaliban ang kanyang sweldo upang ipakita sa publiko na wala siyang intensyong makinabang sa pondo ng bayan habang nililinis ang kanyang pangalan.—sa panulat ni Anjo Riñon