DWIZ 882

Iniimbestigahan na ng Department of the Interior and Local Government ang mahigit 200 personnel ng Bureau of Fire Protection dahil sa umano’y “slot-for-sale” recruitment.

Sa isang press conference, sinabi ni Interior Secretary Jonvic Remulla na sakop ng imbestigasyon ang mga tauhan ng BFP sa buong bansa bilang bahagi ng mas malawak na pagsisikap na sugpuin at tuluyang alisin ang korapsyon sa loob ng naturang ahensya.

Kasunod ito ng entrapment operation na isinagawa ng Criminal Investigation and Detection Group Region Three sa San Fernando, Pampanga noong Agosto 24.

Sa naturang operasyon, naaresto ang trenta’y-dos anyos na BFP personnel matapos mabistong tumatanggap ng P300,000 mula sa isang complainant kapalit ng posisyon sa ahensya.—sa panulat ni Reianne Antiquina

Inihirit ng Presidential Communications Office sa Kamara na dagdagan ang kanilang pondo sa ilalim ng 2027 National Expenditure Program (NEP).

Sa pagdinig ng House Committee on Appropriations para sa panukalang 2027 budget, aabot sa 2.621 billion pesos ang inihirit ng PCO, ngunit 2.482 billion pesos lamang ang inilaan sa NEP.

Dismayado ang ilang kongresista sa mababang pondo, partikular na si Lanao del Sur Representative Zia Alonto Adiong, dahil malaki anya ang papel ng PCO bilang tagapaghatid ng impormasyon ng gobyerno sa publiko.

Ayon kay naman kay PCO Secretary Dave Gomez, maaari pa ring maging epektibo at magawa ng ahensya ang kanilang mandato, ngunit mas marami pa itong magagawa kung madaragdagan ang budget.

Kabilang sa mga maaapektuhan ng mababang pondo ang Intercontinental Broadcasting Corporation (IBC-13), isang network na pagmamay-ari ng pamahalaan, na hindi makatatanggap ng anumang subsidiya sa ilalim ng panukala na inilabas ng Department of Budget and Management.—sa panulat ni Reianne Antiquina

Walang nakitang senyales ng bullying, conspiracy o pakikipagsabwatan, at iba pang school-related conflict na posibleng naging dahilan ng pamamaril sa Ateneo de Zamboanga University noong Agosto 18.

Ito ay ayon kay University President Father Ernald Andal sa isang community update.

Dagdag pa ni Father Andal, bagaman nauunawaan nila ang mga tanong at pangamba ng publiko, lalo na’t marami ang natatakot at nagluluksa matapos ang insidente, muli nitong ipinanawagan na iwasang magpakalat ng mga hindi beripikadong impormasyon, lalo na sa social media.

Samantala, naghain na ng kasong reckless imprudence resulting in homicide at physical injuries ang Philippine National Police laban sa dalawang indibidwal, kabilang ang ama ng menor de edad na gunman at may-ari ng baril na ginamit sa krimen.—sa panulat ni Reianne Antiquina

Iminungkahi ng Project NOAH sa pamahalaan ang pagtatayo ng mahigit 150 detention basin sa buong Metro Manila upang mabawasan ang pagbaha dulot ng malakas na ulan.

Sa isang press briefing, ipinaliwanag ni Project NOAH Executive Director Mahar Lagmay, pansamantalang iipunin ng mga detention basin ang tubig-ulan para hindi dumaloy sa mabababang lugar at mabawasan ang dami ng tubig na nagdudulot ng pagbaha.

Ayon kay Lagmay, kabilang sa mga lugar na pinagpaplanuhang pagtayuan ng detention basin ang Valenzuela; San Juan; Muntinlupa; at Caloocan.

Samantala, dalawang pansamantalang imbakan ng tubig na ang nakumpleto sa Quezon City na matatagpuan sa covered courts sa Barangay Sta. Monica at Tandang Sora.—sa panulat ni Reianne Antiquina

Isinusulong ng Department of Public Works and Highways ang pagtatayo ng isang underground flood detention basin sa EDSA-Balintawak sa Quezon City, isang lugar na madalas bahain, layunin na pansamantalang tipunin ang sobrang tubig-ulan upang maibsan ang pagbaha sa paligid ng interchange.

Katuwang ng DPWH ang North Luzon Expressway Corporation (NLEX) sa proyektong itatayo malapit sa Andres Bonifacio Monument.

Ayon kay DPWH Secretary Vince Dizon, modelo ito sa flood detention basin sa Burgos Circle sa Bonifacio Global City, Taguig.

Kaugnay nito, inalok naman ni Manny V. Pangilinan at NLEX Corporation na itayo ang pasilidad sa ilalim ng public-private partnership.

Target na matapos ang proyekto bago sumapit ang susunod na tag-ulan, bagama’t nakasalalay ito sa pagkuha ng Quezon City Government ng kailangang right-of-way.—sa panulat ni Reabelle Medina

Itinanggi ng Bureau of Jail Management and Penology na binigyan nito ng special treatment si Senador Jinggoy Estrada matapos siyang dalhin sa Cardinal Santos Medical Center sa San Juan para sa pagsusuri sa kanyang kaliwang tuhod.

Ito’y matapos na batikusin ng Samahan ng Ex-Detainees Laban sa Detensyon at Arest (SELDA) at Laya Campaign for the Release of All Political Prisoners ang BJMP.

Ayon kay Selda Vice Chairman Danilo Dela Fuente, hindi anya medical emergency ang meniscus tear at maaaring pahupain sa pamamagitan ng pain relievers, pahinga, ice pack, compression at elevation.

Nilinaw din ng tagapagsalita nitong si Superintendent Jayrex Joseph Bustinera, pinayagan ng Sandiganbayan Fifth Division ang medical leave ni Sen. Estrada para sa knee X-ray.

Dagdag pa ng BJMP, dapat ikonsidera ang partikular na kalagayan at utos ng korte sa bawat kaso bago sabihing may special treatment.—sa panulat ni Reabelle Medina

Hinamon ng Malacañang si Davao City Representative Paolo Duterte na ilabas ang mga dokumentong magpapatunay na totoong nakumpleto ang mga flood mitigation project sa kanyang nasasakupan.

Ito’y matapos kontrahin ni Rep. Duterte ang pahayag ng Office of the Ombudsman na “epicenter” ng anomalous flood control projects ang Davao City.

Ayon kay Congressman Duterte, may listahan siya ng mga nakumpletong proyekto mula 2020 hanggang 2022 na galing mismo sa DPWH Davao Region.

Samantala, giit ng Palasyo, magkaiba ang may dokumento at may proyektong makikita at talagang nakatutulong sa pagpigil ng baha.

Kaugnay nito, siniguro ni Executive Secretary Ralph Recto na walang discretionary funds sa panukalang 7.2 trilyong piso sa national budget para sa susunod na taon.—sa panulat ni Reabelle Medina

Iginiit ng Office of the Ombudsman na hindi nabubura ng recantation o pagbawi ng testimonya ng mga testigo ang kanilang mga naunang pahayag laban kay dating House Speaker Martin Romualdez kaugnay sa flood control scandal.

Ito ang tugon ng Ombudsman matapos hilingin ng legal counsel ni Romualdez na si Atty. Ade Fajardo na ibasura ang reklamo, dahil wala silang nakikitang sapat na dahilan para kasuhan ang dating House Speaker.

Ayon kay Atty. Fajardo, mahigit tatlumpung dating testigo na ang bumawi sa kanilang mga akusasyon laban kay Romualdez, kabilang ang retired Marine na si Orly Guteza.

Gayunman, iginiit ng Ombudsman na ang recantation ay hindi “eraser” bagkus karagdagang ebidensya na dapat suriin, kung saan pagtutugmain ng mga imbestigador ang naunang pahayag at ang bago nitong bersyon upang matukoy kung alin ang totoo.—sa panulat ni Jordan Gutierrez