DWIZ 882

Nilinaw ni House Prosecution at Bicol Saro Party-list Rep. Terry Ridon na walang aatras sa mga public at private prosecutor sa impeachment trial ni Vice President Sara Duterte.

Ayon kay Cong. Ridon, mananatili ang labing-isang miyembro ng House Prosecution Panel at lahat ng private prosecutors mula simula hanggang sa pagtatapos ng trial, sa kabila ng mga usap-usapan na may ilan umano na magbibitiw.

Lum itaw ang mga alingawngaw matapos maglabas ng mas mahigpit na guidelines ang Senate Impeachment Court sa Rule 18 o sub judice rule, kung saan ipinagbabawal nito sa mga abogado, respondent, at senator-judges na magkomento sa merito ng kaso.

Iginiit ni Cong. Ridon na patuloy pa ring maglalahad ang mga prosecution ng ebidensya at magpapaliwanag sa publiko tungkol sa proseso, mga testigo, at pagkakasunod-sunod ng trial, alinsunod sa mga limitasyon ng sub judice rule.

Kinumpirma ni Ridon na mas malamang na magdagdag sila ng mga spokesperson para sa prosecution panel na hindi saklaw ng nasabing rule.—sa panulat ni Jordan Gutierrez

Dahil sa malakas at tuloy-tuloy na ulan dulot ng Habagat, nagbabala ang PHIVOLCS sa posibleng pag-agos ng lahar at putik sa Pinatubo at Taal.

Sa Zambales, banta ang lahar mula sa Bundok Pinatubo. Ang mga lumang abo at bato mula noong 1991 eruption ay nahahalo sa tubig-ulan, nagiging parang semento, at umaagos pababa sa mga ilog. Maaaring maapektuhan ang San Marcelino, San Narciso, San Felipe, at Botolan sa Zambales, pati na ang mga kalapit na bayan sa Tarlac at Pampanga.

Samantala, nagbabala ang PHIVOLCS sa muddy streamflow at run-off sa kanlurang bahagi ng Bulkang Taal. Ang natitirang abo nito ay nahahalo sa ulan at nagiging makapal na putik na dumadaloy patungo sa Lawa ng Taal. Delikado ito sa mga bayan ng Agoncillo at Laurel.

Pinayuhan ng PHIVOLCS ang lahat ng residente at lokal na pamahalaan sa mga lugar na ito na manatiling alerto, bantayan ang lagay ng panahon, at maging handa sa posibleng paglikas para sa kanilang kaligtasan. | via Jennifer Go (DWIZ Correspondent)

Inaasahan na ng Bangko Sentral ng Pilipinas na mananatili sa mataas na antas ang inflation rate ng bansa ngayong Agosto, na posibleng umabot sa 5.5% hanggang 6.5%.

Ayon sa Bangko Sentral, maaaring ang nagpanatili sa mataas na inflation ang pagtaas ng presyo ng bigas, gulay, prutas, isda, at domestic fuel, kung saan iniuugnay sa hindi magandang lagay ng panahon.

Matatandaang bumaba ang inflation sa 6.2% noong Hulyo mula 6.8% noong Hunyo, at mas mababa ito sa 7.2% na naitala noong Abril.

Inaasahang ilalabas ng Philippine Statistics Authority ang opisyal na inflation rate para sa Agosto sa susunod na linggo, Setyembre 4.—sa panulat ni Jordan Gutierrez

Inutusan na ng Office of the Ombudsman si Senador Loren Legarda at ang kanyang anak na si Batangas First District Rep. Leandro Leviste na magsumite ng kanilang counter-affidavit sa mga reklamong plunder at graft laban sa kanila.

Ayon kay Assistant Ombudsman Mico Clavano, kaugnay ito ng umano’y pagkabigo ng kumpanya ni Cong. Leviste na magbigay ng solar power ayon sa itinakda ng kanilang congressional franchise.

Marami anyang solar power allocations ang ibinigay sa kumpanya, pero hindi umano natupad ang mga pangako, na nagdulot ng epekto sa presyo ng kuryente.

Kinuwestiyon din ni Asst. Omb. Clavano ang paulit-ulit na pagpapalawig ng medical leave ni Senador Legarda, na sinabing dahil sa malubhang karamdaman.

Iginiit ng Ombudsman na lumalawak ang hinala laban sa mag-ina, lalo na’t nasa labas ng bansa ang mga ito habang iniimbestigahan sa nasabing reklamo.

Nauna nang nagsampa ng reklamo ang Department of Energy laban kay Cong. Leviste at limang opisyal ng Solar Para sa Bayan Corporation dahil sa umano’y paglabag sa Public Service Act.—sa panulat ni Jordan Gutierrez

Walang koneksyon ang pagkawala ng confidential funds ng Department of Education o DepEd sa mga naganap na school shooting sa Tacloban at Zamboanga.

Ito ang iginiit ni House Prosecution Spokesperson at Lanao del Sur Rep. Zia Alonto Adiong, bilang tugon sa pahayag ni Senator-Judge Robin Padilla na maaaring napigilan sana ang mga insidente ng pamamaril sa mga paaralan kung mayroon pa ring confidential funds ang kagawaran.

Ayon kay Adiong, si Education Secretary Sonny Angara ang higit na nakakaalam kung kinakailangan talaga ng DepEd ang confidential funds.

Binigyang-diin din niyang wala umanong direktang mandato ang DepEd na magsagawa ng mga aktibidad na karaniwang trabaho ng mga security agency.

Ipinunto pa ni Adiong na noong panahon ni Vice President Sara Duterte bilang Education Secretary, hindi naman umano nalutas ang mga problema sa sektor ng edukasyon kahit may confidential funds ang departamento.

Sa halip, sinabi ni Adiong na ginamit umano ang pondo sa surveillance at seguridad ni VP Sara sa kanyang mga lakad at aktibidad, kabilang ang tree planting at Christmas party.

Dismayado si Adiong na ginugol sa 400 security personnel ni Vice President Sara ang confidential funds ng DepEd.

Muling iginiit ng mambabatas na hindi dapat iugnay ang kawalan ng confidential funds ng DepEd sa mga insidente ng pamamaril sa mga paaralan. | via Geli Mendez (Patrol 30)

Tiniyak ni House Committee on Appropriations Chairperson Rep. Mika Suansing na maitutugon sa mga lugar na pinakailangan ang pondo para sa Project NOAH.

Kasunod ito ng pakikipagpulong ni Suansing sa mga opisyal ng University of the Philippines, partikular kay UP President Atty. Angelo Jimenez, upang talakayin ang pagpapalakas ng suporta tungo sa libre at dekalidad na edukasyon maging ng disaster preparedness.

Napag-usapan rin kasama si UP Resilience Institute o UPRI Executive Dir. Dr. Mahar Lagmay ang P1 billion na pondong inilaan para sa Project NOAH sa ilalim ng 2026 General Appropriations Act o GAA.

Ayon kay Suansing, mahalagang magamit ang pondo para sa mas mahusay na flood at hazard mapping, early warning systems sa antas ng barangay, at pagtukoy sa mga lugar na kailangan ng flood mitigation projects.

Binigyang-diin ni Suansing ang pangangailangan ng masusing pagsusuri ng Kamara sa mga proyekto sa panahon ng budget deliberations upang matiyak na ang mga pondong ilalaan sa flood control ay mapupunta lamang sa mga flood-prone areas at sa mga proyektong talagang kinakailangan. | via Geli Mendez (Patrol 30)

Hindi umano natatakot ang House prosecution panel na harapin si Colonel Raymund Dante Lachica sakaling ihain siya bilang “hostile witness” sa impeachment trial ni Vice President Sara Duterte.

Ito ang binigyang-diin ni House Prosecution Adviser at Spokesperson Robert Ace Barbers, na tinitimbang pa ng House Prosecution Panel kung may maidaragdag na mahalagang ebidensya ang testimonya ni Lachica kaugnay sa Article 1 na tumutukoy sa maling paggamit ng confidential funds ni VP Sara.

Ayon kay Barbers, dapat na masiguro ng Senate Impeachment Court na may “value” o may bigat at makabuluhan ang testimonya ni Lachica.

Sakali namang iharap si Lachica bilang bahagi ng presentasyon ng depensa, tiniyak ni Barbers ang kahandaan ng prosekusyon sa cross-examination.

Nauna nang tumestigo si dating OVP Special Disbursing Officer Gina Acosta na apat na tranches na tig-P125 million na may kabuuang P500 million na confidential funds ang kanyang ibinigay kay Lachica bilang pagsunod umano sa utos ng Bise Presidente.| via Geli Mendez (Patrol 30)

Iginiit ni House Prosecution Spokesperson at Kabataan Party-list Rep. Renee Co na mas dapat ilaan ng Department of Education (DepEd) ang pondo nito sa mga mental health professional at pagdadagdag ng mga silid-aralan, sa halip na gamitin ito bilang confidential funds.

Tugon ito ni Senator Robin Padilla sa pahayag na maaari sanang napigilan ang mga pamamaril sa mga paaralan sa Tacloban at Zamboanga kung nanatili ang confidential funds ng DepEd.

Ayon kay Co, maraming salik o factors ang dapat tugunan para matiyak ang proteksiyon at kaligtasan ng mga estudyante, may confidential funds man o wala ang education sector.

Tinukoy ni Co ang pagtiyak na walang access ang mga menor de edad sa mga baril, pagpapalakas ng mental health services, at pagtugon sa mga problemang nararanasan ng mga bata sa loob ng tahanan, paaralan at komunidad.

Ipinaalala ni Co na nakalaan noon ang P112.5-million na confidential funds sa DepEd noong si Vice President Sara Duterte pa ang kalihim nito.

Lumalabas aniya sa imbestigasyon na ito ay inabuso at nagamit sa paraang hindi wasto na kabilang sa mga alegasyong dinidinig ng Senado bilang impeachment court. | via Geli Mendez (Patrol 30)