Sa tulong ng Project NOAH, masisiguro na tanging mga flood control project lamang sa mga flood-prone areas o lugar na madalas bahain ang mapopondohan sa ilalim ng panukalang 2027 National Budget.
Ito ang tiniyak ni House Appropriations Committee Chairperson Mikaela Suansing, na ang pondo para sa Project NOAH ay magagamit sa mga lugar na pinakamalaki ang pangangailangan.
Kasunod ito ng pakikipagpulong ni Suansing sa mga opisyal ng University of the Philippines, partikular kay UP President Atty. Angelo Jimenez, upang talakayin ang pagpapalakas ng suporta sa edukasyon at disaster preparedness.
Napag-usapan rin kasama si UP Resilience Institute o UPRI Executive Dir. Dr. Mahar Lagmay ang P1 billion na pondong inilaan para sa Project NOAH sa ilalim ng 2026 General Appropriations Act o GAA.
Iginiit ni Suansing na mahalagang magamit ang pondo para sa mas mahusay na flood at hazard mapping, early warning systems hanggang sa antas ng mga barangay, at mas mahusay na pagtukoy sa mga lugar na kailangan ng flood mitigation projects. | via Geli Mendez (Patrol 30)
