DOH, hinikayat ang mga LGU na sundin lamang ang isang health protocol kaugnay sa COVID-19.
Hinikayat ng Department of Health (DOH) ang Local Government Units na isa lamang ang sundin na health protocols kaugnay sa COVID-19.
Ito ay matapos na payagan ng pamahalaan ng Cebu ang hindi pagsusuot ng face mask sa labas maliban sa mga indibidwal na nakakaranas ng sintomas ng COVID-19.
Ayon kay Health Undersecretary Maria Rosario Vergeire, kailangan na iisa lamang ang protocol na dapat sundin ng mga lokal na pamahalaan para maabot ang New Normal.
Aniya, ang pagsusuot ng face mask ay base sa pag-aaral at rekomendasyon na ginawa ng mga eksperto para maiwasan na mahawa sa sakit.
Dagdag pa ni Vergeire na darating din ang panahon na hindi na kakailanganin ang pagsusuot nito pero sa ngayon ay kailangan pa, hanggang sa maging manageable na ang mga kaso ng COVID-19.