Painiimbestigahan na ni Senador Panfilo “Ping” Lacson sa Senado ang rehabilitasyon at pagkukumpuni sa EDSA matapos lumitaw ang mga bagong lubak sa ilang bahagi ng kalsada kasunod ng ilang araw na pag-ulan.
Sa Senate Resolution Number 5-9-4, inihirit ni Senador Lacson sa Senate Committee on Public Works na magsagawa ng “inquiry in aid of legislation” para suriin kung bakit mabilis nasira ang bagong gawang kalsada sa EDSA.
Ayon kay Senador Lacson, dapat busisiin kung nasunod ba ang mga itinakdang pamantayan sa pagpaplano, disenyo, konstruksyon at pamamahala ng infrastructure projects ng pamahalaan.
Nilinaw ng senador na layunin ng imbestigasyon na matukoy ang mga posibleng pagkukulang, makapaglatag ng mga hakbang para maiwasan ang mga kahalintulad na problema, at mapanagot ang responsibilidad sa bako-bakong proyekto. | mula sa panulat ni Jordan Gutierrez
