DWIZ 882

Pumalo ng P51 million ang pondong hiniling ng Office of the Vice President (OVP) para sa travel expenses ng taong 2027.

Ito ang naungkat ni Gabriela Women’s Party Rep. Sarah Elago sa budget hearing ng Appropriations Committee para sa panukalang budget ng OVP na aabot sa mahigit P785.2 million para sa susunod na taon.

Natanong ni Elago ang OVP kung magkano ang nagastos sa biyahe ng Bise Presidente noong 2025 kung saan, sinabi ni OVP Director Rosalynne Sanchez, na may P56 million na pondo para sa biyahe ang OVP noong 2025.

Mula sa naturang halaga, nasa P12.9 million ang para sa mga biyahe sa abroad, habang P32.5 million naman ang nagastos sa mga lokal na biyahe ng Pangalawang Pangulo.

Sakop rin ng gastos ang pagbiyahe ng mga personnel at security detail, gayundin ang mga biyaheng kaugnay sa mga programa ng OVP, kabilang ang Last-Mile Schools.

Ang pondong hinihiling para sa 2027 ay nakalaan sa ilalim ng Maintenance and Other Operating Expenses (MOOE). | via Geli Mendez (Patrol 30)

Suportado ng House prosecution panel ang bagong iskedyul na ipinatupad ng Senate Impeachment Court na inilatag ni Presiding Officer Senator Chiz Escudero.

Kumpiyansa si House Prosecutor Terry Ridon na bibilis ang paglilitis sa ilalim ng bagong schedule, kung saan magiging full-day ang mga pagdinig at aabot sa apat na araw kada linggo.

Naniniwala si Ridon na maaaring umabot sa hanggang tatlong testigo kada araw ang maihaharap sa direct at cross-examination at sa mga tanong ng senator-judges.

Mas mapapabilis pa umano ang paglilitis kung papabor ang depensa sa mga panukalang stipulation ng prosecution.

Tiwala si Ridon na agad matatapos ang presentasyon ng ebidensiya upang makapagdesisyon na ang senator-judges sa paglilitis kung convicted o acquitted si VP Sara.

Gayunman, aminado siyang kailangan din nilang balansehin ang kanilang tungkulin bilang mambabatas sa paggawa ng mga batas at prosecutors sa pagdalo sa impeachment trial. | via Geli Mendez (Patrol 30)

No comment muna ang Office of the Vice President (OVP) sa isyu ng PAX Silica Project.

Sa budget hearing ng House Appropriations Committee, naungkat ni Kabataan Partylist Rep. Renee Co ang posisyon ng OVP sa kontrobersyal na proyekto matapos ang viral video ni Vice President Sara Duterte.

Matatandaang natanong ang Bise Presidente hinggil sa PAX Silica, pero “no comment” ang ibinigay na tugon niya.

Natanong din hinggil sa isyu si OVP Chief of Staff Atty. Zuleika Lopez, ngunit sinabi niya na hindi siya makakasagot dahil hindi ito sakop ng usapin sa 2027 budget.

Ayon kay Co, bilang may policy coordinator ang OVP, maaaring magkaroon ito ng inisyal na hakbang upang pag-aralan ang PAX Silica at maglabas ng posisyon.

Tugon naman ni Lopez, may mga natatanggap na rin silang mga sulat na humihingi ng posisyon ng OVP kaugnay sa nasabing usapin. | via Geli Mendez (Patrol 30)

Naglabas na ng release order ang Sandiganbayan 5th Division para kay dating Public Works and Highways Secretary Manuel Bonoan.

Nito lamang Martes, Setyembre 1 nang aprubahan ng korte ang mosyon ng Ombudsman na tanggalin si Bonoan sa mga kapwa akusado ni Senator Jinggoy Estrada sa kasong graft at plunder.

Kaugnay ito sa 573 million pesos na sinasabing kickback mula umano sa maanomalyang flood control project.

Binawi na rin ng korte ang mga commitment order na inisyu nito laban kay Bonoan at inatasan ang Philippine National Police na palayain ang dating kalihim sa kanilang kustodiya, partikular sa PNP-Health Service General Hospital kung saan tatlong buwan itong namalagi.

Nanawagan sa publiko ang convenience store company na Philippine Seven Corporation na panatilihin ang kaligtasan ng mga customer nito at kaagad i-report ang anumang unsanitary practice na nakita ng mga ito sa kanilang mga tindahan.

Ito’y matapos mag-viral sa social media ang insidente ng food tampering, kung saan dinilaan ng isang babae ang kinuha nitong hotdog bago ibinalik sa steamer at kumuha ng isa pang piraso ng hotdog gamit ang kanyang mga kamay.

Sa isang pahayag, tiniyak ng 7-Eleven na pangunahing prayoridad nito ang food safety, at kaagad nitong itinatapon ang anumang “improperly handled” na pagkain bilang bahagi ng polisiya nito.

Gayunman, iginiit ng kumpanya na paglabag sa pampublikong kalusugan ang sadyang pag-tamper sa pagkain.

Dahil dito, magsasampa ng kaso ang 7-Eleven sa sinumang gumagawa ng kahalintulad na aksyon sa kanilang mga tindahan. | Sa panulat ni Anjo Riñon

Hati ang pananaw ng mga Pilipino tungkol sa kanilang kalidad ng buhay sa nakalipas na 12 buwan.

Ayon sa Social Weather Stations, mula June 20 hanggang 29, nasa 33% naman ang nagsabing lumala ito habang 34% ang nagsabing nanatiling pareho ang kanilang kalagayan.

Dahil dito, nakapagtala ang SWS ng net gainers score na zero, na itinuturing na “fair.”

Mas mataas ito ng 26 points kumpara sa negative 26 noong March 2026 na pinakamababang score na naitala nitong mga nakaraang survey.

Anila, tumaas ang net gainers score sa lahat ng bahagi ng bansa, pinakamababa ito sa Metro Manila na -13, na sinundan ng Visayas na -1.

Samantala, positibo naman ang naitalang score sa Mindanao na +3 at +4 naman sa Balance Luzon.

Isinagawa ang survey sa pamamagitan ng face-to-face interviews sa 1,200 adult Filipinos sa buong bansa.—sa panulat ni Reabelle Medina

Ipinagbawal ng Department of Education ang paggamit ng mga realistic simulation sa mga school safety drill, layong maiwasan ang posibleng negatibong epekto sa mental at emosyonal na kalagayan ng mga estudyante.

Ayon sa DepEd, kailangan din ang pahintulot ng mga magulang bago makilahok ang mga learner sa naturang drills.

Anila, nakikipagtulungan na ang ahensya sa mga medical at mental health experts upang matiyak na ang mga safety exercise ay angkop sa edad ng mga estudyante at sensitibo sa trauma.

Naka-iskedyul ngayong araw, September 3, ang nationwide school safety drill matapos itong ipagpaliban dahil sa mga nabanggit na alalahanin.

Samantala, giit ng DepEd, layunin ng mga drill na ihanda ang mga estudyante sa posibleng emergency nang may kumpiyansa at hindi takot.—sa panulat ni Reabelle Medina

Itinuturing ni dating Sandiganbayan Associate Justice Alex Quiroz na pagsasayang ng oras ang pagiging hostile witness ng prosecution ni dating DepEd Spokesman Atty. Michael Poa sa impeachment trial ni Vice President Sara Duterte.

Matatandaang sinalang si Poa bilang testigo sa impeachment trial ng pangalawang pangulo upang magbigay ng impormasyon tungkol sa paglusta umano ng confidential funds ng DepEd noong si V-P Sara pa ang kalihim.

Kung tutuusin, baka sumabit pa anya ang prosecution dahil baka nakasalalay ito sa mga hostile witness, at hindi sa sarili nitong mga testigo, upang patunayang matibay ang mga ebidensya ng mga ito.—sa panulat ni Anjo Riñon

Malaki ang epekto ng umano’y pamumulitika sa gitna ng impeachment trial ni Vice President Sara Duterte.

Ito ang sinabi ni dating Sandiganbayan Associate Justice Alex Quiroz matapos marinig ng publiko ang maaanghang na palitan ng tirada sa loob ng Senate Impeachment Court.

Ayon kay Quiroz, dapat maipatupad ng Senate Impeachment Court ang Rule 18, o sub judice rule, habang dinidinig ang kaso laban sa pangalawang pangulo upang mabigyan ito ng due process, tulad sa mga ordinaryong korte, at hindi mauwi sa mind-conditioning ng mga senator-judges at ng publiko.

Nangangamba rin ang dating mahistrado ng Sandiganbayan na nahahaluan ng pulitika ang impeachment trial laban sa bise presidente, lalo na’t nalalapit na ang 2028 presidential elections.—sa panulat ni Anjo Riñon