DWIZ 882

Pinabulaanan ni House impeachment prosecutor at Bicol Saro Party-list Representative Terry Ridon ang alegasyong tumanggap siya ng maleta na may lamang pera mula sa labingwalong dating mga sundalo.

Sa isang forum sa Quezon City, nagpakita siya ng maleta na naglalaman lamang ng mga peluka at mangga bilang tugon sa mga paratang.

Ayon kay Rep. Ridon, hindi matitinag ang House prosecution panel sa aniya’y mga kasinungalingan at gawa-gawang testimonya laban sa kanila.

Hinamon din niya ang mga nag-akusa na humarap sa nakatakdang pagdinig ng Senate Blue Ribbon Committee sa Lunes, June 8, upang masuri ang kredibilidad ng kanilang mga pahayag.—sa panulat ni Reabelle Medina

Naghain ng mga panukalang pagbabago ang prosecution at defense sa kaso ni dating Pangulong Rodrigo Duterte sa International Criminal Court kaugnay ng magiging takbo ng mga pagdinig bago ang paglilitis sa Nobyembre.

Ayon sa prosecution, nais nitong palawigin ang mga deadline para sa pagsusumite ng ilang ebidensya at aplikasyon para sa proteksyon ng mga testigo, layuning matiyak ang maayos na paghahanda ng kaso.

Bukod dito, iminungkahi ng defense na magkaroon ng mas balanseng sistema sa pagtanggap at pagsusumite ng ebidensya upang maiwasan ang pagsisikip ng rekord ng korte sa mga dokumentong may limitadong halaga sa kaso.

Dagdag pa ng defense, dapat ding maging malinaw ang saklaw ng testimonya ng mga testigo at maiwasan ang labis na paggamit ng mahahabang dokumento at rekord sa mga pagdinig.

Sa ngayon, hinihintay na ang pasya ng Trial Chamber III sa mga mungkahing pagbabago.—sa panulat ni Reabelle Medina

Iginiit ni dating senador Koko Pimentel na hindi maituturing na opisyal na pagdinig ng Senado ang isinagawang Blue Ribbon Committee hearing ng kampo ni Senador Alan Peter Cayetano.

s
Ayon kay Pimentel, mas tama itong ilarawan bilang isang meeting o briefing kung saan maaaring makinig at makipag-usap ang mga senador sa iba’t ibang pindibidwal.

Sinabi niya na bagama’t maaaring pag-usapan sa naturang pagtitipon ang iba’t ibang isyu, hindi ito pormal na aksyon ng isang komite ng Senado.

Naghahanap ang International Criminal Court (ICC) ng mga interpreter na marunong sa Filipino at Cebuano bilang paghahanda sa nalalapit na paglilitis kay dating Pangulong Rodrigo Duterte sa November.

Ayon sa ICC, kailangan nila ng dalawang uri ng interpreter: paraprofessional interpreter at associate court interpreter. Gagamitin sila sa pag-translate ng testimonya ng mga testigo at iba pang usaping legal sa korte.

May nakalaan na kontrata hanggang Disyembre 31 ngayong taon, at sa The Hague, Netherlands ang magiging trabaho nila.

Malaki rin ang sahod na inaalok ng ICC—umaabot mula humigit-kumulang ₱4 milyon hanggang ₱5.1 milyon kada taon.

Kabilang sa tungkulin ng mga interpreter ang pagsasalin ng mga salitang legal at teknikal, paghahanda sa mga kaso, at paggawa ng listahan ng mga salita para sa interpretasyon. Dapat ay mahusay sila sa Filipino at/o Cebuano, at mataas din ang antas ng English.

Ayon sa ICC, mahalaga ang mga interpreter para mas maintindihan ng mga tao mula sa Pilipinas ang mga pahayag sa loob ng korte, lalo na sa mismong pagbubukas ng trial.

Si Rodrigo Duterte ay nahaharap sa kasong murder bilang crime against humanity kaugnay ng war on drugs noong kanyang administrasyon.