Nanawagan si House Committee on Basic Education Chairman Roman Romulo na tiyakin ang pagpapalakas ng interventions, support systems, pagtuturo at pagsasabuhay ng Good Manners and Right Conduct o GMRC, partikular ang paggalang at pagpapahalaga sa buhay ng tao, tungo sa pagsiguro ng kaligtasan at mapigilan ang karahasan sa mga mag-aaral sa bawat paaralan.
Kasunod ito ng panibagong pamamaril sa Banga National High School sa South Cotabato na ikinasawi ng tatlong mag-aaral.
Ayon kay Romulo, hindi na dapat ituring na hiwalay na insidente ang ganitong mga kaso dahil may iba pang naiulat na pamamaril sa loob at paligid ng mga paaralan na kinasasangkutan ng mga estudyante.
Paliwanag ni Romulo, kailangang nang seryosong pag-aralan kung paano mas mapoprotektahan ang mga estudyante, hindi lamang sa pamamagitan ng mas mahigpit na mga hakbang para sa kaligtasan sa paaralan, kundi pati na rin sa pagpapalakas ng support system at iba pang hakbang na makatutulong upang maiwasan ang karahasan.
Bukod pa dito, dapat ding palakasin ang mental health support sa mga paaralan upang matulungan ang mga mag-aaral na nakararanas ng problema, may kaalitan, trauma o matinding stress.
Hinikayat naman ni Romulo ang publiko na huwag magpakalat, i-share, o i-repost ang mga graphic o insensitive na litrato at video ng insidente at mga impormasyong hindi pa beripikado kaugnay ng insidente.
