Muling ipinananawagan ng Akbayan Reform Bloc ang agarang pagpasa ng House Bill No. 10058 o Child Safety Against Gun Violence Act, kasunod ng panibagong shooting incident sa Banga National High School sa South Cotabato.
Ayon kina Akbayan Party-list Representatives Perci Cendaña at Chel Diokno, lubhang nakababahala ang pagdami ng insidente ng karahasan sa mga paaralan na maituturing na epidemic ng gun violence.
Nanawagan si Cendaña sa mga kapwa mambabatas na ipasa na ang naturang panukala upang pagbawalan ang access ng mga menor de edad sa baril, iba pang armas, at gawing gun-free zones ang mga paaralan.
Para naman kay Diokno, ipinakikita ng panibagong insidente ng pamamaril sa mga paaralan ang pangangailangan para sa komprehensibong reporma upang matiyak ang kaligtasan ng mga mag-aaral.
Binigyang-diin nina Diokno at Cendaña ang pangangailangan ng agarang aksiyon upang maprotektahan ang mga kabataan.
Nagpaabot naman ng pakikiramay ang dalawang mambabatas sa mga pamilya ng mga estudyanteng nasawi at nasugatan.
