Pormal nang inihain ni House Speaker Faustino “Bojie” Dy III at House Majority Leader Sandro Marcos ang House Bill No. 11387 o Responsible Firearm Ownership and Safe Storage Act na layong palakasin ang mga hakbang sa pagmamay-ari at pag-iingat ng mga baril.
Kasunod ito ng pamamaril sa Banga National High School sa South Cotabato na ikinasawi ng tatlong mag-aaral.
Target ng panukala na pigilan ang mga menor de edad at iba pang hindi awtorisadong indibidwal na makakuha o magkaroon ng access sa mga baril at iba pang armas bilang bahagi ng mas malawak na hakbang para gawing mas ligtas ang mga paaralan at maiwasan ang mga katulad na trahedya.
Ayon kay Dy, bukod sa mas mahigpit na seguridad sa mga paaralan, kailangan rin ng mas matibay na support system at mental health programs para sa mga mag-aaral.
Aniya, ang naturang trahedya ay lalo pang nagpatibay sa kanilang hangaring bumuo ng mas ligtas at mas maalagang mga paaralan para sa bawat kabataang Pilipino.
Nagpaabot ng pakikiramay si Speaker Dy sa mga mag-aaral, pamilya ng mga biktima ng pamamaril, mga guro, at buong komunidad ng paaralan na naapektuhan ng trahedya.
