DWIZ 882

Itinuturing ni dating Sandiganbayan Associate Justice Alex Quiroz na pagsasayang ng oras ang pagiging hostile witness ng prosecution ni dating DepEd Spokesman Atty. Michael Poa sa impeachment trial ni Vice President Sara Duterte.

Matatandaang sinalang si Poa bilang testigo sa impeachment trial ng pangalawang pangulo upang magbigay ng impormasyon tungkol sa paglusta umano ng confidential funds ng DepEd noong si V-P Sara pa ang kalihim.

Kung tutuusin, baka sumabit pa anya ang prosecution dahil baka nakasalalay ito sa mga hostile witness, at hindi sa sarili nitong mga testigo, upang patunayang matibay ang mga ebidensya ng mga ito.—sa panulat ni Anjo Riñon

Malaki ang epekto ng umano’y pamumulitika sa gitna ng impeachment trial ni Vice President Sara Duterte.

Ito ang sinabi ni dating Sandiganbayan Associate Justice Alex Quiroz matapos marinig ng publiko ang maaanghang na palitan ng tirada sa loob ng Senate Impeachment Court.

Ayon kay Quiroz, dapat maipatupad ng Senate Impeachment Court ang Rule 18, o sub judice rule, habang dinidinig ang kaso laban sa pangalawang pangulo upang mabigyan ito ng due process, tulad sa mga ordinaryong korte, at hindi mauwi sa mind-conditioning ng mga senator-judges at ng publiko.

Nangangamba rin ang dating mahistrado ng Sandiganbayan na nahahaluan ng pulitika ang impeachment trial laban sa bise presidente, lalo na’t nalalapit na ang 2028 presidential elections.—sa panulat ni Anjo Riñon

Pinag-aaralan pa ng House Prosecution Panel kung ipagpapatuloy nito ang presentasyon para sa Article 3, na tumutukoy sa bribery and corruption, sa impeachment trial laban kay Vice President Sara Duterte.

Ayon kay House Prosecutor Terry Ridon, pag-uusapan pa ng panel ang susunod nilang hakbang sakaling matapos ang presentasyon ng mga ebidensya at testimonya para sa Article 1.

Ang nasabing artikulo ay tumutukoy sa umano’y maling paggamit ng confidential funds ng Office of the Vice President at Department of Education sa ilalim ng pamamahala ni VP Sara.

Una nang sinabi nina Ridon at House Prosecutor Joel Chua na posibleng matapos sa kalagitnaan ng Setyembre ang presentasyon ng prosecution para sa Article 1.

Samantala, nilinaw ni House Prosecution Adviser at Spokesperson Robert Ace Barbers na wala pang pinal na desisyon kung iwi-withdraw ang Article 3 ng Articles of Impeachment sa kanilang presentasyon.

Binigyang-diin naman ni Deputy Speaker Paolo Ortega V, malalakas at mabibigat ang mga ebidensya at testimonya ng prosecution sa bawat Articles of Impeachment. | via Geli Mendez (Patrol 30)

Nababahala si House Committee on Appropriations Vice Chairperson at FPJ Panday Bayanihan Party-list Representative Brian Poe sa posibilidad na magamit ang artificial intelligence sa online filing at oath-taking ng Statement of Assets, Liabilities and Net Worth ng mga opisyal ng gobyerno.

Sa pagdinig ng panukalang 4.04 billion peso na budget ng Civil Service Commission para sa 2027, sinabi ni Rep. Poe mahigpit na authentication at security measures ang pangangailangan layong maiwasan ang impersonation at iba pang uri ng manipulasyon gamit ang A.I.

Iginiit naman ni CSC Assistant Commissioner Ariel Ronquillo, mayroon nang mga prosesong sinusunod ang komisyon, kabilang ang beripikasyon sa oath administrator at sa nanunumpang indibidwal sa pamamagitan ng video conferencing.

Samantala, tiniyak naman ng CSC na pananagutin ang mga oath administrator kung magkaroon ng problema.—sa panulat ni Reabelle Medina

Tiniyak ni Senador Jinggoy Estrada na gagamitin niya ang lahat ng legal na remedyo matapos payagan ng Sandiganbayan Fifth Division ang kahilingan ng Ombudsman na alisin sa mga akusado si dating Public Works Secretary Manuel Bonoan sa kasong plunder at graft na kinakaharap ng senador.

Ayon kay Sen. Estrada, nirerespeto niya ang naging desisyon ng korte, ngunit hindi dito nagtatapos ang kanyang legal na laban.

Aniya, pag-aaralan ng kanyang mga abogado ang mga available na remedyo upang maprotektahan ang kanyang mga karapatan at malinis ang kanyang pangalan.

Sa botong 2-1, sinabi ng Sandiganbayan na saklaw ng prosecutorial discretion ng Ombudsman ang pagpili kung sino ang maaaring gawing state witness.

Matatandaang sina Sen. Estrada, dating DPWH Sec. Bonoan, at tatlo pang indibidwal ay kinasuhan kaugnay ng sinasabing pagsasabwatan upang makalikom ng mahigit limandaang milyong pisong kickback mula sa mga flood control project.—sa panulat ni Reabelle Medina

Naghahanda ang San Lazaro Hospital sa posibleng panibagong pagdami ng mga kaso ng leptospirosis sa mga susunod na linggo, kasunod ng malawakang pagbaha sa Metro Manila bunsod ng malalakas na pag-ulan.

Ayon sa ospital, maaaring tumaas muli ang mga kaso isa hanggang dalawang linggo matapos ang pagbaha.

Batay sa report, umabot sa limampu ang leptospirosis admissions sa San Lazaro Hospital noong August 26, habang labing-anim na kaso naman ang naitala noong August 31.

Sa pinakahuling datos, nakapagtala na ang ospital ng isang daan animnapu’t dalawang kaso ng leptospirosis at labing apat na pagkamatay hanggang August 31.

Paalala ng Department of Health sa publiko na maligo agad matapos lumusong sa baha gamit ang sabon at malinis na tubig.

Anila, kapag nakaranas ng sintomas, agad na magtungo sa pinakamalapit na health center para sa tamang pagsusuri at gamutan.—sa panulat ni Reabelle Medina

Iginiit ng depensa ni Vice President Sara Duterte na bagama’t handa silang i-stipulate na walang confidential funds na inilipat ang DepEd sa AFP, hindi nila kinikilala na walang confidential o intelligence information na ibinahagi sa dalawang ahensya.

Ayon kay Lead Defense Lawyer Sheila Sison, may mga certification mula sa mga opisyal ng militar na nagpapakitang nagpatuloy ang kooperasyon ng DepEd at AFP sa mga Youth Leadership Summits, bilang bahagi ng pagpigil sa recruitment ng mga estudyante ng insurgent groups.

Kabilang anya dito ang mga dokumentong naglalahad na nagbunga ang kooperasyon sa “zero reported” recruitment ng Communist Terrorist Group sa mga estudyante.

Nagkasundo naman ang prosekusyon at depensa na itakda bilang stipulation na walang confidential funds na direktang inilipat ng DepEd sa AFP o mga unit nito.

Samantala, ipinagtanggol din ni Atty. Sison ang paggamit ng Dep-Ed ng confidential funds noong kalihim pa si Vice President Duterte, at binanggit ang isang Notice of Credit mula COA noong August 8, 2024 kaugnay ng 75-million peso Audit Observation Memorandum para sa taong 2023.—sa panulat ni Jordan Gutierrez

Ikinukunsidera ng House Prosecution Panel na bawasan ang Articles of Impeachment na kanilang ipiprisinta sa impeachment trial laban kay Vice President Sara Duterte.

Ito ang kinumpirma ni House Prosecutor Joel Chua, matapos tanungin sa press conference kung tatanggalin na ba ng prosecution ang Article 3 o Bribery and Corruption sa kanilang presentasyon.

Paliwanag ni Chua, nakalatag pa rin sa kanilang presentasyon ang Article 3 pero kanilang ikinukunsidera na alisin na lamang ito.

Aniya, ang pagkukunsidera ng prosecution sa presentasyon ay hindi nangangahulugang mahina ang kanilang ebidensya at testimonya, kundi nais lamang nila na mapabilis ang proseso ng paglilitis.

Sinabi ni Chua na pag-uusapan pa ng prosecution ang pinal na desisyon at target umano nilang matapos ang lahat ng Articles of Impeachment sa buwan ng Oktubre.

Nilinaw naman ng prosecutor na lahat ng kanilang inilalatag na ebidensya at testimonya sa kada-artikulo ay malalakas at matitibay para patunayan ang mga alegasyon laban kay VP Sara. | via Geli Mendez (Patrol 30)

Posibleng ilabas na ng Senate Impeachment Court ngayong araw, Setyembre 2, ang desisyon sa panukalang baguhin ang schedule ng impeachment trial ni Vice President Sara Duterte para mapabilis ang paglilitis.

Ayon kay Impeachment Court Spokesperson Regie Tongol, posibleng manatili ang kasalukuyang schedule, o ganap na ilipat sa hapon, at maging “mixed” na may mga hearing sa umaga at mayroon din sa hapon.

Tinatapos pa anya ng Impeachment Court ang pag-aayos ng schedule matapos makuha ang calendar ng Senate Committee on Finance para maiplano ni Senate President Sherwin Gatchalian at Presiding Officer Francis Escudero ang mga posibleng araw ng pagdinig.

Layon ng pagbabago na matapos ang impeachment trial sa target na Disyembre ngayong taon, at kung ilalabas ang bagong schedule ngayong araw, inaasahang ipatutupad ito simula sa susunod na linggo.

Una nang nilinaw ni Presiding Officer Escudero na kailangang munang makuha ang calendar ni Senate Finance Committee Chairman JV Ejercito para sa deliberasyon sa panukalang 2027 national budget bago tiyak na itakda ang mga araw ng impeachment trial.—sa panulat ni Jordan Gutierrez