DWIZ 882

Nag-sorry si House Private Prosecutor Atty. Benjamin Tolosa Jr. sa witness stand na Counsel for Defense Atty. Michael Poa matapos gamitin ang salitang “abogadong walang alam” sa nagpapatuloy na impeachment trial laban kay Vice President Sara Duterte.

Kasunod ito ng pagpuna sa kaniya ni Defense Lead Counsel Atty. Sheila Sison, na aniya’y hindi akma bilang miyembro ng Bar of the Philippines.

Paliwanag ni Tolosa, sa naging pagdalo ni Poa noon sa pagdinig ng House Committee on Good Government and Public Accountability, iginiit niya na “wala siyang personal knowledge” hinggil sa pagpapalabas ng confidential funds ng Department of Education.

Sinabi ni Tolosa na “presumption” lamang ang basehan ni Poa nang gamitin ang mga AFP certification at Youth Leadership Summit para patunayan ang payment of rewards.

Iginiit ni Tolosa na wala siyang intensiyong insultuhin si Poa dahil malinaw naman sa naging salaysay nito sa nakaraang pagdinig na hindi niya alam kung paano ginastos ang pondo ng DepEd.

Dagdag pa ni Tolosa, siya ang inatasan ni VP Sara para sumagot sa findings ng COA pero “I have no personal knowledge” lamang ang tanging sagot nito.

Sa huli, humingi ng paumanhin si Tolosa kay Poa kung na-offend o na-insulto niya ito sa pagsisimula pa lang ng paglilitis. | via Geli Mendez (Patrol 30)

Hindi maaaring madaliin ang pagsasampa ng kaso laban sa mga personalidad na sangkot sa umano’y anomalya sa flood control projects kung hindi pa sapat ang mga nakalap na ebidensya.

Binigyang-diin ni Palace Press Officer Claire Castro na kailangang maging matibay ang mga kaso upang hindi ito mauwi sa pagkabasura dahil lamang sa kakulangan ng ebidensya.

Ayon pa sa opisyal, mahirap ang trabaho ng Ombudsman dahil kinakailangan nitong masusing pag-aralan ang napakaraming dokumento at ebidensya.

Sa ganitong paraan anya matitiyak na magiging sapat at matibay ang mga ito sakaling umabot sa korte ang mga kaso.—sa panulat ni Anjo Riñon

Hinikayat ng Malacañang ang publiko na hayaan ang Office of the Ombudsman na magsagawa ng imbestigasyon nito sa mga reklamong may kinalaman sa umano’y anomalya sa mga flood control project.

Ayon kay Palace Press Officer Claire Castro, may sariling mandato ang Ombudsman bilang isang independent constitutional body.

Kaya hindi anya maaaring panghimasukan ni Pangulong Ferdinand Marcos Jr. ang kanilang isinasagawang imbestigasyon.

Sinabi ni Castro na nakikita naman ang patuloy na pagkilos ng Ombudsman, kabilang ang pagsasagawa ng pag-aaral at imbestigasyon alinsunod sa itinakdang proseso.—sa panulat ni Anjo Riñon

Pinuna ng kampo ni dating House Speaker Martin Romualdez ang mga gumagamit ng salitang “mastermind” habang nagpapatuloy pa ang preliminary investigation sa mga reklamong kinakaharap ng mambabatas.

Ayon kay Atty. Ade Fajardo, abogado at tagapagsalita ni Romualdez, nakababahala na maaaring may nabuo nang konklusyon bago pa ganap na masuri ng Office of the Ombudsman ang lahat ng ebidensya at depensa ng kanyang kliyente.

Matatandaang humiling ang mga abogado ni Romualdez na mag-inhibit si Ombudsman Jesus Crispin Remulla sa kaso dahil sa mga pampublikong pahayag nito sa imbestigasyon kabilang na ang paulit-ulit na pagbanggit sa posibilidad ng pagsasampa ng kaso sa kongresista.

Iginiit ni Fajardo na hindi dapat pangunahan ng mga pampublikong akusasyon ang naturang proseso, lalo na’t nagbabago ang ilang salaysay ng mga testigo at may mga karagdagang ebidensya pang hindi naibibigay sa depensa.

Binigyang-diin ni Fajardo ang kahalagahan ng pagiging patas at walang kinikilingan sa preliminary investigation, at dapat nakabatay lamang sa kumpleto at wastong ebidensya ang magiging desisyon ng Ombudsman. | via Geli Mendez (Patrol 30)