DWIZ 882

Pinuna ng kampo ni dating House Speaker Martin Romualdez ang mga gumagamit ng salitang “mastermind” habang nagpapatuloy pa ang preliminary investigation sa mga reklamong kinakaharap ng mambabatas.

Ayon kay Atty. Ade Fajardo, abogado at tagapagsalita ni Romualdez, nakababahala na maaaring may nabuo nang konklusyon bago pa ganap na masuri ng Office of the Ombudsman ang lahat ng ebidensya at depensa ng kanyang kliyente.

Matatandaang humiling ang mga abogado ni Romualdez na mag-inhibit si Ombudsman Jesus Crispin Remulla sa kaso dahil sa mga pampublikong pahayag nito sa imbestigasyon kabilang na ang paulit-ulit na pagbanggit sa posibilidad ng pagsasampa ng kaso sa kongresista.

Iginiit ni Fajardo na hindi dapat pangunahan ng mga pampublikong akusasyon ang naturang proseso, lalo na’t nagbabago ang ilang salaysay ng mga testigo at may mga karagdagang ebidensya pang hindi naibibigay sa depensa.

Binigyang-diin ni Fajardo ang kahalagahan ng pagiging patas at walang kinikilingan sa preliminary investigation, at dapat nakabatay lamang sa kumpleto at wastong ebidensya ang magiging desisyon ng Ombudsman. | via Geli Mendez (Patrol 30)

“MOTHER-MEOW IN CONGRESS”

Pormal nang nanumpa bilang bagong kinatawan ng ika-apat na distrito ng Cavite si Rep. Jennifer “Jenny” Barzaga.

Ito’y matapos makakuha ng 201,893 na boto si Barzaga sa kanilang distrito sa isinagawang special election noong nakaraang linggo.

Ang panunumpa ni Rep. Barzaga ay sinuportahan ng mga kinatawan ng Cavite kabilang na si 2nd District Rep. Lani Mercado, Agimat Partylist Rep. Bryan Revilla, at 1st District Rep. Jolo Revilla.

Pinalitan ni Congresswoman Barzaga ang nabakanteng posisyon ng kaniyang anak na si dating Cong. Kiko Barzaga o mas kilala bilang “Cong-Meow” makaraang masibak sa pwesto dahil sa disorderly behavior o hindi magandang pag-uugali, hindi akmang asal bilang mambabatas at kabiguang gampanan ang kaniyang legislative duties.| via Geli Mendez (Patrol 30)

Posibleng tapusin na ng House prosecution panel sa susunod na linggo ang presentasyon ng mga ebidensya at pagharap sa mga testimonya para sa Article 1 na tumutukoy sa maling paggamit ng confidential funds.

Ito ang kinumpirma sa press conference ni House Prosecutor Joel Chua, na pag-uusapan pa ng prosecution kung kailangan pang iharap sa impeachment court ang ilan pang natitirang testigo sa naturang artikulo.

Aniya, bukod kay dating DepEd Special Disbursing Officer Edward Fajarda, nasa isa hanggang dalawang testigo pa ang kanilang ipiprisinta bukas, kabilang Philippine Statistic Authority (PSA) Assistant National Statistician Marizza Grande at si Counsel for Defense Atty. Michael Poa.

Una nang sinabi ni Chua na minabuti ng prosecution na hindi na iharap sa witness stand ang dalawa pang military officers dahil sapat o kuntento na sila sa naging testimonya nina Col. Manaros Boransing II at Col. Magtanggol Panopio hinggil sa isyu ng military certifications at Youth Leadership Summit.

Umaasa naman ang prosecution na bago matapos ang taon, ay mayroon nang desisyon o mapapagpasyahan na sa impeachment trial kung convicted o acquitted si Vice President Sara Duterte. | via Geli Mendez (Patrol 30)

Mariing itinanggi ni Senador Panfilo Lacson ang pinalulutang na may balak siyang tumakbo sa pagka-presidente sa 2028.

Sinabi ni Lacson na panoorin siya dahil magtatapos ang kanyang public service career kapag natapos sa 2031 ang kanyang termino bilang senador.

Baka pa nga magretiro na siya nang mas maaga dahil sobrang nakakapagod at nakakadismaya ang paglaban sa katiwalian sa bansa.

Bahagi ito ng tugon ni Lacson sa sinabi ni Senate Minority Leader Alan Peter Cayetano na fake news ang anya’y paulit-ulit niyang paratang na may katiwalian sa mga infrastructure project sa Taguig gaya ng flood control projects at Laguna de Bay reclamation.

Giit ni Lacson, kapag detalyado at may pinaghuhugutan pang official records, mahirap paniwalaan na ito ay peke at hahaluan pa ng kulay politika.—sa panulat ni Anjo Riñon

Pinagsusumite ni Senate Minority Leader Alan Peter Cayetano ang Department of Budget and Management at Department of Finance (DOF) ng update sa paggastos ng 2026 national budget at sa sitwasyon ng utang ng pamahalaan.

Ayon kay Cayetano, kailangan ng mga mambabatas ang mga impormasyong ito para sa pagbalangkas ng panibagong pambansang budget na “transparent” at tapat sa mga prayoridad nito.

Partikular na hinihinging impormasyon ng minority leader ay kung magkano na ang nailabas sa 2026 budget, magkano ang mga nailaan sa proyekto at ang aktwal na nagastos dito.

Hinihingi rin ng senador ang absorptive capacity, o ang kayang gastusin ng bawat ahensya, gayundin ang detalye tungkol sa mga pondong inilaan para sa programa na Unified Package for Livelihoods, Industry, Food, and Transport (UPLIFT).

Nais ding malaman ni Cayetano sa DOF kung magkano na ang kabuuang utang ng pamahalaan hanggang nitong Hulyo 31, pati na ang mga loan at bond na kinuha o ginagarantiyahan ng gobyerno sa nakalipas na tatlong taon.

Dagdag pa sa nais makuha ni Cayetano ang impormasyon kung aling foreign loan at grant ang aaprubahan pa ng pamahalaan; gayundin ang listahan ng mga pondong inilipat, na-realign, o idinagdag sa ibang programa simula Hulyo 2023, pati na rin kung saan galing at saan napunta ang pera.—sa panulat ni Anjo Riñon

Idineklara na sa state of calamity ang buong probinsya ng Occidental Mindoro, matapos pormal na aprubahan ng Sangguniang Panlalawigan ang PDRRMC Resolution Number 6, Series of 2026.

Pinangunahan ni Vice Governor Anecita Diana Apigo-Tayag ang pagpapatibay ng resolusyon, batay sa request at rekomendasyon ni Governor Eduardo B. Gadiano, na siyang chairman ng PDRRMC.

Ito ay dahil sa malawak na pinsalang idinulot ng Habagat na pinalakas ng Tropical Depressions Maymay at Neneng.

Ayon sa PDRRMC, umabot na sa mahigit 2.19 bilyong piso ang tantyang kabuuang pinsala sa iba’t ibang sektor ng probinsya.

Pinakamalaki sa mga naitalang pinsala ang sa infrastructure at agriculture, kabilang ang mga kabukiran.

Kaugnay nito, hinihiling ang paglalaan at paggamit ng 25.7 milyong pisong Quick Response Fund (QRF) para sa agarang pangangailangan ng mga apektadong sektor.

Patuloy namang nakatutok ang pamahalaang panlalawigan sa paghahatid ng agarang tulong at pagpapabilis ng rehabilitasyon sa mga apektadong komunidad. | via Mariboy Ysibido (Occidental Mindoro Correspondent)

“NABUDOL PO ANG AFP!”

Ito ang binigyang-diin ni House Impeachment Spokesperson Zia Alonto-Adiong na desperado ang Department of Education (DepEd) sa ilalim ng pamamahala noon ni Vice President Sara Duterte na gamitin ang military certification at Youth Leadership Summit bilang tugon sa findings ng Commission on Audit (COA).

Para kay Adiong, kataka-taka kung bakit pumayag ang AFP na gamitin ng DepEd ang kanilang operasyon sa maling pamamaraan.

Ayon kay Adiong, malinaw ang naging testimonya ni Col. Manaros Boransing II sa impeachment trial, na walang tinanggap ang AFP na pera o kahit na anong support funding mula sa DepEd.

Dagdag pa ni Adiong, kinumpirma rin ni Boransing sa impeachment trial na ang mga inisyung certificate ng AFP ay hindi lamang para sa DepEd kundi para sa iba pang ahensya ng gobyernong kalahok nito.

Ang pahayag ni Adiong ay tinungkuran ni Commission on Higher and Technical Education Chairperson Jude Acidre, na napalakas ng testimonya ni Boransing ang posisyon ng prosekusyon na may problema sa mga patakaran at paggamit ng confidential funds.

Sinabi ni Acidre na hindi lamang ang AFP ang nabudol ni VP Sara kundi nalinlang din maging ang taumbayan.

 | via Geli Mendez (Patrol 30)

Ibinabala ng Mines and Geosciences Bureau (MGB) na mahigit tatlonglibo at pitongdaang barangay sa Luzon ang lantad sa panganib ng landslide at pagbaha dahil sa Bagyong Pilandok at Southwest Monsoon o Habagat.

Batay sa ulat ng MGB, naitala ang pinakamaraming landslide at flood-prone sa Ilocos Region sa mahigit dalawanglibo at dalawangdaang barangay.

Pumangalawa ang Central Luzon sa mahigit pitongdaang barangay, sumunod ang Cordillera Administrative Region sa 617, Cagayan Valley sa 107, MIMAROPA sa 87 at panghuli naman ang CALABARZON sa 22.

Ayon sa MGB, ang mga geohazard susceptibility map ay ginagawa batay sa geology, anyong lupa at terrain ng isang lugar, gayundin sa mga gawain ng tao na maaaring magpalala sa panganib ng sakuna.—sa panulat ni Reianne Antiquina

Inibunyag ni Department of Environment and Natural Resources Secretary Juan Miguel Cuna na wala pang environmental impact assessment na inihain o ipinoproseso sa kanilang ahensya kaugnay sa Pax Silica Project.

Ayon kay Secretary Cuna, wala pang malinaw na project description na isinumite sa kanilang tanggapan kaya hindi pa masusing napag-aaralan ang epekto ng nasabing proyekto sa kalikasan.

Samantala, nilinaw ni DENR Environmental Management Bureau Director Michael Drake Matias na naglabas sila ng Environmental Compliance Certificate (ECC) para sa development plan ng Bases Conversion and Development Authority sa isang bahagi ng New Clark City ngunit hindi ito tumutukoy sa mismong Pax Silica Project.

Sa ilalim ng proyekto sa pangunguna ng Estados Unidos, isang 1,600-ektaryang high-tech industrial hub ang planong itayo sa New Clark City sa Capas, Tarlac upang suportahan ang imprastraktura para sa artificial intelligence (AI), mga data center, at advanced semiconductor manufacturing.

Kinontra naman ng mga magsasaka, indigenous groups, at environmental experts dahil sa posibleng pagpapaalis o pagkawala ng mga tirahan, at pangamba tungkol sa mga posibleng epekto ng proyekto sa kapaligiran, lalo na sa suplay ng tubig.—sa panulat ni Reianne Antiquina