DWIZ 882

Pinalawak ng Department of Education (DepEd) ang kampanya laban sa bullying, physical assault, at mga banta sa kaligtasan sa mga paaralan, kabilang ang mas mahigpit na kaparusahan sa mga mag-aaral na makagagawa ng malulubhang paglabag.

Ayon kay Education Secretary Sonny Angara, nais ng DepEd na mabigyan ng pagkakataong magbago ang mga mag-aaral, ngunit hindi nito isasakripisyo ang kaligtasan ng nakararami.

Sa ilalim ng DepEd Order No. 006, s. 2026, o Guidelines on Ensuring a Safe and Motivating Learning Environment, maaaring ipataw ang non-readmission, agarang exclusion at mandatory referral sa law enforcement o social welfare authorities para sa mga mag-aaral na sangkot sa severe offenses.

Nilinaw ng DepEd na ang non-readmission ay nangangahulugang hindi na maaaring mag-enroll ang learner sa susunod na school year, ngunit maaari pa ring tapusin ang kasalukuyang taon. Samantala, ang exclusion ay agarang pagtanggal sa active rolls ng paaralan, habang ipagpapatuloy ang pag-aaral sa pamamagitan ng alternative educational interventions.

May tatlong antas ng disciplinary action depende sa bigat ng paglabag.

Para sa first-level o minor offenses, maaaring patawan ng written reprimand, ipaalam sa mga magulang at isailalim sa guidance counseling.

Sa second-level o serious offenses, gaya ng paulit-ulit na bullying at online harassment, maaaring magkaroon ng suspension na hanggang limang araw at mandatory referral sa Department of Social Welfare and Development (DSWD). Kapag naulit ang paglabag, maaaring mauwi sa non-readmission, habang full exclusion naman ang maaaring ipataw sa ikatlong offense.

Para sa third-level o high-risk offenses, kabilang ang matinding pananakit, bomb threats at dangerous hoaxes, maaaring ipataw ang non-readmission sa unang offense, permanent exclusion sa ikalawa, at agarang pag-turnover sa law enforcement authorities.

Maaari ring magpatupad ang school head ng 30-araw na preventive suspension habang iniimbestigahan ang insidente kung itinuturing na banta sa kaligtasan ng paaralan ang mag-aaral.

Sa oras na mai-report ang bullying o anumang safety threat, inaatasan ang Child Protection Committee na agad magsagawa ng imbestigasyon, tiyaking ligtas ang biktima at magbigay ng mental health at psychosocial support.

Itinatakda rin ng bagong guidelines ang koordinasyon ng paaralan sa Philippine National Police (PNP), DSWD, Local Government Unit (LGUs) at mga komunidad, lalo na sa mga banta na nangyayari sa loob ng paaralan at online.

Bukod sa administrative sanctions, maaaring humarap ang mga offender sa posibleng criminal liability o custody interventions, depende sa uri ng paglabag.

Sa lahat ng antas ng disciplinary process, kailangang ipaalam sa mga magulang ang naging aksiyon laban sa learner-offender.

Sinisilip na ng Marcos administration ang flood management master plan na inihanda noong panahon ng yumaong dating Pangulong Benigno Aquino the Third, kasabay ng isinusulong na pagpapatupad ng panibagong flood management plan ng pamahalaan.

Ayon kay Palace Press Officer Claire Castro, nabanggit sa kanilang pag-uusap ni Public Works Secretary Vince Dizon na binabalikan ngayon ng ahensya ang mga naunang flood control plans.

Kabilang dito ang tinatawag na Aquino-Singson Master Plan, na isinagawa noong nakaraang administrasyon.

Gayunman, sinabi ni Castro na sa ngayon, ang planong nakatuon sa mga major river basin ang dokumentong hawak ni Dizon.

Wala rin anyang kopya ng kabuuang Aquino-Singson Master Plan ang nakarating sa Presidential Communications Office, bagama’t sinasabing na-turn over ito sa Duterte administration matapos bumaba sa puwesto si Aquino.

Patuloy namang tinutukoy ng pamahalaan kung paano magagamit ang mga naunang plano bilang bahagi ng mas malawak na hakbang upang matugunan ang problema sa pagbaha sa bansa. | Sa panulat ni Anjo Riñon

Nagbabala ang Department of Energy na posibleng makansela o ma-blacklist ang mga generation company na patuloy sa paglabag sa mga panuntunan.

Ayon kay DOE Secretary Sharon Garin, handa ang ahensya na higpitan ang pagpapatupad ng kanilang three-warning rule.

Sa ilalim ng naturang panuntunan, ang generation company na makakatanggap ng tatlong warning dahil sa paulit-ulit na paglabag ay posibleng ma-blacklist at mawalan ng permit para makapag-operate. Layunin nitong mapanatili ang maayos at mapagkakatiwalaang serbisyo ng kuryente sa publiko.

Samantala, kinumpirma naman ng DOE na nasa 40 generation companies na ang nakatanggap ng first warning mula sa daan-daang napadalhan ng show-cause order noong Hunyo, kabilang sa binabantayan ang mga paglabag sa Public Service Act at mga panuntunan ng DOE at Energy Regulatory Commission (ERC).

Giit ni Sec. Garin, hindi dapat nagiging dahilan ang pagkasira ng isang generation company para maapektuhan ang mga consumer. | Sa panulat ni Reabelle Medina