DWIZ 882

Kinikilala ng House prosecution panel ang pahayag ni Vice President Sara Duterte na wala siyang intensyong takasan ang batas at gagamitin niya ang mga legal na remedyo na maaari niyang magamit.

Ito ang sinabi ni House Prosecutor Terry Ridon na hindi dapat pangunahan ang anumang prosesong kinakaharap ni VP Sara.

Ayon kay Ridon, ang pag-iisyu ng warrant ay hindi pa patunay na may kasalanan ang pangalawang pangulo kundi magkakaroon si VP Sara ng pagkakataon para iharap ang kaniyang depensa sa tamang hukuman.

Binigyang-diin din ni Ridon na hiwalay na prosesong konstitusyonal ang impeachment proceedings para sa pananagutan.

Bukod pa dito, dapat aniyang hayaang gampanan ng mga korte at ng Senate Impeachment Court ang kanilang tungkulin.

Samantala, tiniyak ng prosecution na ipagpapatuloy nito ang pag-usig sa impeachment case tungo sa pagkamit ng katotohanan at pananagutan.| via Geli Mendez (Patrol 30)

Nakikipag-ugnayan na ang Department of Foreign Affairs o DFA sa mga counterpart nito sa New Delhi at Kathmandu upang matukoy ang kalagayan ng mga Pilipinong apektado ng landslide at flash flood sa Nepal.

Ito ang sinabi ni DFA Secretary Ma. Theresa Lazaro, makaraang maiulat na isang Pilipino ang nawawala sa insidente.

Aminado si Lazaro na wala umanong foreign service post ang Pilipinas sa Nepal kaya umaasa ang DFA sa Philippine Embassy sa New Delhi, na may hurisdiksyon sa bansa.

Nakipag-ugnayan na rin ang embassy sa honorary consul sa Kathmandu, na naiulat ding apektado ng insidente.

Humingi na rin ang DFA ng DNA sample mula sa pamilya ng nawawalang Pilipino upang maikumpara sa mga labi na mare-retrieve sa lugar. | via Geli Mendez (Patrol 30)

Naalarma at nagulat ang kampo ni dating House Speaker Martin Romualdez sa desisyon ng Sandiganbayan na alisin si dating Department of Public Works and Highways Secretary Manuel Bonoan sa kasong plunder na may kaugnayan sa flood control scam.

Ayon kay Atty. Ade Fajardo, ang abogado at tagapagsalita ni Romualdez, noong nilikha ng Ombudsman ang special panel para magsagawa ng preliminary investigation laban kay Romualdez ay wala kahit isang taga-DPWH ang naglahad ng alegasyon laban sa mambabatas.

Binigyang-diin ni Fajardo na sa pagharap ni Bonoan sa Senate Blue Ribbon Committee at Independent Commission for Infrastructure o ICI, wala itong sinabi na may kaugnayan, kinalaman o partisipasyon si Romualdez sa maanomalyang flood control projects.

Nakakabahala para kay Fajardo na ngayon ay malaya at isa nang potential witness si Bonoan.

Dagdag pa ni Fajardo, na sa ngayon ay walang maituturing na “credible evidence” laban kay Romualdez, matapos bawiin ng Limang Maleta Boys kasama ang star witness na si Orly Guteza ang kanilang mga naunang salaysay at alegasyon laban sa mambabatas. | via Geli Mendez (Patrol 30)

Pinuri ni Occidental Mindoro Lone District Rep. Leody “Odie” Tarriela ang patuloy na pagsusulong ng Barangay Development Program at iba pang peace and development initiatives ng administrasyon ni Pangulong Ferdinand Marcos Jr. katuwang ang NTF-ELCAC.

Ito’y matapos maitala ang pag-angat ng ekonomiya sa lalawigang kinakatawan ni Tarriela kung saan, mula sa 2.1% ay lumago ito sa 11.2% na pinakamabilis sa buong bansa.

Nakamit din ng pito sa 11 munisipalidad ng lalawigan ang idineklarang insurgency-free status na dating apektado ang mga kalsada, kuryente, kabuhayan, at pangunahing serbisyo ng gobyerno.

Matatandaang tinaguriang “Brownout Capital” ang Occidental Mindoro dahil umaabot umano sa 16 hanggang 18 hours kada araw ang pagkawala ng kuryente.

Ayon kay Tarriela, kasabay ng pagbuti ng suplay ng kuryente at pagpasok ng mga proyektong pangkaunlaran ay dumami ang oportunidad sa negosyo at trabaho.

Ayon kay Tarriela, patunay ito na magkaugnay ang kapayapaan at kaunlaran.

Aniya, kapag gumaganda ang buhay ng isang tao, nawawala ang dahilan para sumuporta sa armadong grupo at mas natututukan ang serbisyo para sa kalusugan, edukasyon, kabuhayan, at iba pang pangangailangan tungo sa kaunlaran ng mamamayan. | via Geli Mendez (Patrol 30)

Aabot na sa 39 diplomatic protest ang inihain ng Pilipinas laban sa China ngayong 2026 kaugnay ng patuloy na agresibong pagkilos at pag-angkin nito sa West Philippine Sea.

Ito ang kinumpirma ni DFA Secretary Ma. Theresa Lazaro sa pagdinig ng House Committee on Appropriations matapos mausisa ni FPJ Panday Bayanihan Party-list Rep. Brian Poe.

Ayon kay Lazaro, kapansin-pansin naman ang pagbaba ng mga insidente ng pagbomba ng mga water cannon at paggamit ng laser ng China Coast Guard laban sa mga tauhan ng Philippine Coast Guard.

Ipinaliwanag ni Lazaro ang provisional arrangement ng Pilipinas at China kaugnay ng rotation at resupply operations sa Ayungin Shoal.

Nabuo aniya ang kasunduan matapos ang insidente noong June 2024 kung saan naputulan ng daliri ang isang Pilipinong miyembro ng PCG sa gitna ng tensyon sa karagatan.

Sa pamamagitan din aniya ng exchange of notes, nilinaw ni Lazaro na hindi nito isinasantabi ang karapatan at posisyon ng Pilipinas sa ilalim ng UNCLOS at 2016 Arbitral Award. | via Geli Mendez (Patrol 30)

Nanawagan si Akbayan Party-list Representative Percy Cendaña sa Commission on Human Rights (CHR) na maging mas vocal sa suporta nito sa mga biktima ng extrajudicial killings (EJK) sa ilalim ng administrasyong Duterte.

Ginawa ni Cendaña ang panawagan sa budget briefing para sa 2027 budget ng ahensya sa House Committee on Appropriations.

Ayon sa mambabatas, dapat maramdaman ng mga pamilyang naulila ang hayagang suporta ng CHR sa kanilang paghahanap ng katarungan sa International Criminal Court (ICC).

Pinuna rin ni Cendaña ang aniya’y kakulangan ng komisyon sa mga pampublikong diskurso kaugnay ng kaso ni dating Pangulong Rodrigo Duterte sa The Hague.

Gayunman, kinilala niya ang pagbuo ng CHR ng task force para muling suriin ang mga kaso ng EJK. | via Geli Mendez (Patrol 30)

Asahan na ang panibagong bigtime oil price hike sa darating na Martes, Setyembre 8.

Batay sa apat na araw na palitan sa Mean of Platts Singapore, patuloy ang pagsirit ng presyo ng mga produktong petrolyo sa pandaigdigang merkado bunsod ng nagpapatuloy na digmaan sa pagitan ng Estados Unidos at Iran.

Dahil dito, inaasahang madaragdagan ng P4.60 ang kada litro ng diesel, P3.90 sa gasolina, at P4.50 naman sa kerosene.

Gayunman, nagbabala si Jetti Petroleum president Leo Bellas na posible pang tumaas ang presyo ng krudo sa world market dahil sa nabanggit na tensyon sa Middle East at ang patuloy na pagsadsad ng halaga ng piso kontra dolyar. | Sa panulat ni Anjo Riñon