DWIZ 882

Nanganganib na matigil na ang operasyon ng EDSA Bus Carousel matapos itong makakuha ng zero budget sa panukalang 2027 General Appropriations Act.

Dahil dito, umapela si Transportation Secretary Giovanni Lopez sa House Committee on Appropriations na pondohan ito upang maipagpatuloy ang pagtulong sa mga commuter sa darating na taon.

Ginawa ni Lopez ang panawagan matapos punahin ni Akbayan Rep. Perci Cendaña ang pagiging “zero budget” ng naturang bus service, at maging ang kaugnay nitong mga service contracting fuel subsidies.

Ayon kay Cendaña, ipinapakita lamang nito na tila wala sa prayoridad ng pamahalaan ang milyun-milyong commuter, at maging ang mga tsuper at transport worker na umaasa sa nabanggit na bus system.—sa panulat ni Anjo Riñon

Nagbabala ang World Meteorological Organisation na lalo pang lalala ang El Niño pagdating ng katapusan ng taong 2026, at may posibilidad na magtagal pa ito hanggang Pebrero 2027.

Ayon sa WMO, asahan na ang mas mainit na panahon at mas malubhang pag-ulan na magdudulot ng pagtuo ng lupa at matinding pagbaha.

Ngunit iginiit ng ahensya na isang natural climate phenomenon ang El Niño at hindi dulot ng climate change.

Gayunman, sinabi ng mga eksperto na lalo lang iinit ang panahon kung sasabayan ang El Niño ng pagsusunog umano ng mga fossil fuel.—sa panulat ni Anjo Riñon

Nais nang umuwi ni Senador Loren Legarda sa bansa oras na matapos ang mga pagsusuri sa kanya.

Ito ang sinabi ni Senate Majority Leader Juan Miguel Zubiri makaraang sabihin na may seryosong sakit sa baga si Legarda.

Sa pagkakaalam ni Zubiri, labas-masok sa ospital ang kapwa senador dahil sa pagpapagamot nito; ngunit hindi naman niya masabi kung may kahilingan si Legarda para paliwigin pa ang kanyang medical leave.

Matatandaang nag-umpisa ang medical leave ni Legarda noong Agosto A-Tres, at ilang beses na itong ipinalawig.

Kaya apela ni Zubiri sa mga kapwa senador na bigyan si Legarda ng humanitarian consideration.

Gayunman, sinabi ni Senate Finance Committee Chairman JV Ejercito na, kapag patuloy pa rin na naka-medical leave si Legarda, ibibigay sa iba o kaya aakuin niya ang pagtalakay sa panukalang 2027 budget ng mga ahensya ng pamahalaan na nakatoka kay Legarda bilang isa sa mga vice chairpersons ng Finance Committee.—sa panulat ni Anjo Riñon

Handa ang administrasyong Marcos na ilahad sa publiko ang nilalaman ng binubuo nitong National Flood Control Master Plan.

Ayon kay Palace Press Officer Claire Castro, layunin ng pamahalaan na maipakita sa publiko ang mga hakbang at plano nito kaugnay ng climate change at flood management upang makipagtulungan ang mga mamamayan at pamahalaan sa pagtugon sa problema sa pagbaha.

Ayon kay Castro, kailangang matukoy at matugunan ang mga bara at iba pang problema sa mga daluyan ng tubig upang maging epektibo ang flood control measures.

Binigyang-diin ni Castro ang kahalagahan ng political will upang maisakatuparan ang mga kinakailangang hakbang at hindi na ito maantala pa.

Samantala, wala pang mabigay na detalye ang opisyal ng Malacañang nang tanungin kung ang Department of Public Works and Highways lamang ang mangunguna sa pagbuo ng master plan o kung kukuha rin ng mga eksperto mula sa urban planning, Project NOAH, at iba pang larangan.

Mas mainam anya kung si DPWH Secretary Vince Dizon ang magpaliwanag tungkol dito, lalo na’t kabilang sa mga planong binabalikan ngayon ang Aquino-Singson Master Plan at ang master plan para sa mga pangunahing river basin.—sa panulat ni Anjo Riñon

Magsasampa ng kaso ang mga prosecutor ng Department of Justice sa Tacloban City ng kasong frustrated murder at attempted murder laban sa 15-anyos na estudyante na namaril sa loob ng San Jose National High School noong Hunyo.

Ayon sa mga prosecutor, alam ng suspek ang ginawa nito nang isinagawa nito ang pamamaril sa naturang paaralan, na nagresulta sa pagkamatay ng tatlong kapwa-estudyante at ikinasugat ng dalawampung iba pa.

Dagdag pa ni Justice Undersecretary Ian Norman Dato, pinag-isipan umano ng dalawang suspek sa krimen ang mass school shooting, ngunit abswelto sa criminal liability ang katorse-anyos na gunman sa ilalim ng mga umiiral na batas.

Matatandaang nirekomenda rin ng mga DOJ prosecutor sa Tacloban ang pagsasampa ng kasong reckless imprudence resulting in multiple homicide and physical injuries laban kay Police Staff Sergeant Arla Rey Pacencia, na tiyahin ng katorse-anyos na gunman.—sa panulat ni Anjo Riñon

Umakyat na sa halos 118,000 kaso ng dengue sa buong bansa.

Ayon sa Department of Health, naitala ang mga kaso ng dengue mula Enero hanggang Agosto ngayong taon.

Naitala naman ang pinakamaraming kaso ng naturang sakit sa Central Luzon, Calabarzon, at Metro Manila.

Iginiit ni Health Undersecretary Gloria Balboa na mas mababa ito ng mahigit kwarenta porsyento kaysa sa naitalang mahigit dalawang daang libong kaso sa parehong panahon noong nakaraang taon.

Gayunman, ibinabala ni Balboa na lalo pang tataas ang mga kaso ng dengue sa mga susunod na linggo dahil na rin sa patuloy na buhos ng ulan.—sa panulat ni Anjo Riñon

Halos hati ang mga senador sa panukalang batas na gawing limang taon ang termino ng barangay at Sangguniang Kabataan officials at panukalang ipagpaliban muli ang nakatakdang Barangay at SK Elections sa Nobyembre.

Ayon kay Senate Majority Leader Juan Miguel Zubiri, layunin ng Senate Bill Number 2387 ni Senador Chiz Escudero na pahabain ang termino ng barangay at SK officials, pero kasamang epekto nito ang pag-urong ng eleksyon mula sa darating na Nobyembre 2 patungong 2028.

Nais anya ng mga nanunungkulan ngayon na maipagpaliban muli ang eleksyon, pero may panawagan din na ituloy na ito lalo na ang SK elections, dahil hindi na raw kabataan ang nanunungkulan dito ngayon.—sa panulat ni Anjo Riñon

Kinikilala ng House prosecution panel ang pahayag ni Vice President Sara Duterte na wala siyang intensyong takasan ang batas at gagamitin niya ang mga legal na remedyo na maaari niyang magamit.

Ito ang sinabi ni House Prosecutor Terry Ridon na hindi dapat pangunahan ang anumang prosesong kinakaharap ni VP Sara.

Ayon kay Ridon, ang pag-iisyu ng warrant ay hindi pa patunay na may kasalanan ang pangalawang pangulo kundi magkakaroon si VP Sara ng pagkakataon para iharap ang kaniyang depensa sa tamang hukuman.

Binigyang-diin din ni Ridon na hiwalay na prosesong konstitusyonal ang impeachment proceedings para sa pananagutan.

Bukod pa dito, dapat aniyang hayaang gampanan ng mga korte at ng Senate Impeachment Court ang kanilang tungkulin.

Samantala, tiniyak ng prosecution na ipagpapatuloy nito ang pag-usig sa impeachment case tungo sa pagkamit ng katotohanan at pananagutan.| via Geli Mendez (Patrol 30)

Nakikipag-ugnayan na ang Department of Foreign Affairs o DFA sa mga counterpart nito sa New Delhi at Kathmandu upang matukoy ang kalagayan ng mga Pilipinong apektado ng landslide at flash flood sa Nepal.

Ito ang sinabi ni DFA Secretary Ma. Theresa Lazaro, makaraang maiulat na isang Pilipino ang nawawala sa insidente.

Aminado si Lazaro na wala umanong foreign service post ang Pilipinas sa Nepal kaya umaasa ang DFA sa Philippine Embassy sa New Delhi, na may hurisdiksyon sa bansa.

Nakipag-ugnayan na rin ang embassy sa honorary consul sa Kathmandu, na naiulat ding apektado ng insidente.

Humingi na rin ang DFA ng DNA sample mula sa pamilya ng nawawalang Pilipino upang maikumpara sa mga labi na mare-retrieve sa lugar. | via Geli Mendez (Patrol 30)