Tatapusin na ng Department of Justice o DOJ ngayong taon ang pag-review sa hiling na extradition ng United States kay Pastor Apollo Quiboloy.
Ito ang sinabi ni House Appropriations Committee Vice Chairperson Keith Micah Tan sa budget deliberations, bilang tugon sa interpellation ni Akbayan Party-list Rep. Perci Cendaña.
Ayon kay Tan, patuloy na sinusuri ng DOJ ang mga dokumentong isinumite ng U.S. government kaugnay ng extradition request, batay sa umiiral na extradition treaty ng Pilipinas at Amerika.
Aniya, malaking bahagi ng proseso ang pag-review sa napakaraming dokumentong isinumite ng panig ng U.S.
Samantala, kaugnay naman ng umano’y pagkakabasura ng asylum application ni dating presidential spokesman Harry Roque, sinabi ng DOJ na kung makukumpirma ang ulat, wala nang legal na hadlang para ma-deport siya ng Austria. | Sa panulat ni Geli Mendez
