Hindi magdadalawang-isip si Department of Agrarian Reform o DAR Secretary Conrado Estrella the Third na alisin sa pwesto ang sinumang opisyal o empleyado ng ahensya na nagpapabaya sa kanilang tungkulin.
Ginawa ni Estrella ang pagtiyak matapos ang interpelasyon ni Kamanggagawa Party-list Rep. Eli San Fernando dahil sa reklamo ng ilang magsasaka na hindi umano pinapansin ng mga opisyal ng DAR ang kanilang mga hinaing.
Ayon sa kalihim, handa siya na agarang aksyunan ang usapin, basta’t maibigay sa kaniya ang mga pangalan ng mga kawaning mapapatunayang nagpapabaya sa serbisyo.
Binigyang-diin ni Estrella na walang puwang sa ahensya ang mga tauhang hindi ginagampanan nang maayos ang kanilang tungkulin, lalo na sa pagtugon sa mga pangangailangan ng mga magsasaka. | via Geli Mendez (Patrol 30)
