DWIZ 882

Balik-operasyon na ang BBM-Sara UniTeam Headquarters simula bukas, Enero 17.

Ito ang inanunsiyo ni BBM chief of staff Atty. Vic Rodriguez matapos ang dalawang linggong pagsasara nang magpositibo sa COVID-19 ang maraming staff at volunteers ng partido.

Gayunman, nilinaw ni Rodriguez na ang mga papapasukin lamang ay ang mga empleyadong negatibo na sa swab o RT-PCR tests.

Matatandang ipinag-utos ni UniTeam presidential bet Ferdinand “Bongbong” Marcos Jr. ang pagsasara ng kanilang headquarters makaraang tamaan ng virus ang 68 staff at volunteers.

Nabatid na bago ang temporary closure ay nakapaghanda na ang UniTeam office ng COVID-related items tulad ng vitamins, face masks, face shields at iba pang medical supplies na ipapadala sa mga ospital at medical facilities.

Sa kabila naman ng dagok na kinakaharap ng partido, sinabi ni Rodriguez na magdodoble-kayod sila upang maihatid ang mga relief goods at Covid-19 kits sa lahat ng mga benepisyaryo.

Simula bukas, Enero a-17, ipatutupad na ng Department of Transportation (DOTr) ang “No Vaccination, No Fly” kung saan, tanging mga fully vaccinated domestic travelers lamang ang papayagang makasakay sa mga local carriers na patungo o aalis ng Metro Manila.

Ang direktibang “No Vaccination, No Fly” ay nakapaloob sa DOTr Order-2022-001, hangga’t ang Metro Manila ay nananatiling nasa ilalim ng alert level 3 o mas mataas pa.

Upang payagang makasakay sa eroplano, dapat silang magpakita ng pisikal o digital na mga kopya ng vaccine card, valid government ID o anumang dokumentong inirekomenda ng IATF.

Exempted sa panuntunan ang mga indibidwal na may medical condition o immunocompromised, gayundin ang mga naglalakbay upang bumili ng mga mahahalagang produkto tulad ng gamot at mga medical device.

Samantala, ang mga pasaherong gustong ipagpaliban ang kanilang mga plano ay maaaring kanselahin ang flights, dalawang oras bago ang nakatakdang oras ng pag-alis at piliin ang kanilang susunod na opsyon sa portal ng manage booking ng airlines. —sa panulat ni Kim Gomez

Pinalawak ng Department of Health-SOCCSKSARGEN (DOH-12) ang bio-surveillance nito sa Omicron variant sa gitna ng tumataas na kaso ng COVID-19 sa rehiyon.

Ayon kay Dr. Sulpicio Henry Legaspi, Assistant Director ng DOH-12, isinumite ng mga otoridad ang lahat ng positibong kaso para sa genome sequencing upang masuri ang posibleng pagkakaroon ng nakakahawang variant.

Sinabi ni Legaspi, na ang surveillance ay ginagawa sa pakikipag-ugnayan sa mga rural health unit at molecular laboratories sa apat na probinsya at apat na lungsod ng rehiyon.

Sa kasalukuyan, ang kabuuang aktibong kaso ng rehiyon ay pumalo na sa 503 na naitala nito lamang Huwebes, Enero a-13.

Samantala, inihayag naman ni  Dr. Dyan Zubelle Parayao, pinuno ng DOH-12 Epidemiology and Surveillance Unit, na maaga nilang binalaan ang mga rural health units hinggil sa pinaghihinalaang iba’t ibang kaso ng COVID-19 upang matiyak ang agarang interbensyon. —sa panulat ni Kim Gomez

Inihain sa Kamara ang isang panukalang batas na magbibigay ng 30 bilyong pisong tulong pinansyal sa mga restaurant na apektado ng pandemya.

Ang batas na HB 7610 na inihain ni Antique Representative Loren Legarda ay naglalayong magbigay ng mga insentibo sa buwis at pagbabayad sa upa sa mga restaurant.

Ayon kay Legarda, nakapagtala ng 44% pagbaba sa mga benta ng serbisyo sa pagkain noong taong 2020, at maraming mga establisyimento ang kailangang magbawas ng tauhan o mapilitang magsara dahil sa pandemiya.

Gayunpaman, nanawagan si Legarda sa Kamara, na kailangan din ng restaurant industry ang ating tulong para mailigtas nila ang kanilang negosyo maging ang kanilang mga empleyadong umaasa sa kanilang kita.