DWIZ 882

Inihayag ni Acting Presidential Spokesperson at Cabinet Secretary Karlo Nograles na aprubado na ng IATF ang Retro-Active Application of Testing and Quarantine Protocols Resolution 157 para sa mga international travelers.

Ayon kay Nograles, ang IATF Resolution 157-E ay para sa green at yellow list countries, kung saan epektibo ito sa mga manlalakbay na dumating sa Pilipinas bago ang Enero a-13 taong kasalukuyan.

Sa ngayon, tanging mga balik bayang pinoy, at mga may long term visa ang pinapayagang makapasok habang ang mga may hawak na tourist visa ay hindi pa rin papayagang makapasok sa bansa. —sa panulat ni Kim Gomez

Inihayag ni Pasig City Mayor Vico Sotto na siya ay nagpositibo sa COVID-19.

Ayon kay Sotto, nakararanas siya ngayon ng pananakit ng lalamunan, lagnat at pananakit ng katawan.

Hindi naman binanggit ni Sotto kung kanino o sino ang taong kaniyang mga nakasalamuha.

Sa kabila nito, patuloy ang trabaho ng alkalde habang naka-quarantine upang matiyak na patuloy ang mga serbisyo sa kanyang nasasakupan.

Gayunpaman, hinikayat ni Sotto ang publiko na mag-ingat, dahil sa mataas na transmissibility ng Omicron variant. —sa panulat ni Kim Gomez

Iginiit ng Alliance of Concerned Teachers (ACT) ang pangangailangang magbigay ng mga benepisyo sa sick leave ng mga guro sa pampublikong paaralan.

Binigyang diin ng grupo, na dapat maging pantay ang mga empleyadong regular at hindi regular sa pampublikong paaralan maging sa pribadong sektor.

Ayon sa ACT, higit sa limampung porsyento ng mga guro sa National Capital Region (NCR) ang nakakaranas ngayon ng mga sintomas ng trangkaso mula pa noong Enero a-11.

Bilang tugon, naglabas ang DepEd Central Office ng memorandum na nagpapahintulot sa regional at schools division offices na magdeklara ng suspensiyon ng klase sa kani-kanilang mga lugar. —sa panulat ni Kim Gomez

Inihayag ni Department of Science and Technology (DOST) Philippine Council for Health Research and Development (PCHRD) Executive Director Dr. Jaime Montoya na mayroong potensyal ang paggamit ng virgin coconut oil (VCO) laban sa COVID-19.

Ayon kay Montoya, base sa dalawang clinical studies, ang VCO ay maaring gawing mouth wash at nasal inhaler dahil kaya nitong pumatay ng 60% hanggang 90% ng virus.

Dadag pa ni Montoya, makakatulong ito para maibsan ang mga sintomas ng COVID-19 na nararamdaman ng mga may mild symptoms at suspected COVID patients.

Samantala, namuhunan ang DOST ng 8.4 na milyong piso para matukoy ang kaligtasan at bisa ng VCO bilang pandagdag na gamot para sa mga pasyenteng nagpositibo sa COVID-19. —sa panulat ni Kim Gomez

Hinimok ni former National Task Force (NTF) Against COVID-19 Special Adviser Dr. Anthony Leachon ang pamahalaan na muling alamin ang mga alituntunin sa COVID-19 at alert level system sa gitna ng pagdami ng mga nagpositibo sa virus partikular na ang mga health care workers.

Ayon kay Leachon, maliwanag na ang mga healthcare workers ay nagkakasakit dahil sa sobra-sobrang pagtatrabaho.

Inimungkahi ni Leachon, na dapat iprayoridad din ng gobyerno ang serbisyo ng mga health clerk, medical students, at mga intern at hindi lang ang mismong mga doktor at nurse.

Samantala, nanawagan din si Leachon, sa IATF, na dapat  tutukan ang mga tunay na bayani sa gitna ng pandemya, at iyon ay ang mga frontliners. —sa panulat ni Kim Gomez

Patuloy na bumababa ang daily growth rate ng COVID-19 cases sa National Capital Region (NCR) batay sa 7-day moving average ng mga bagong kaso.

Ayon kay OCTA Research Fellow Doctor Guido David, bumaba ngayon sa 3% mula 5% noong nakaraang araw ang growth rate.

Aniya, ipinapakita ng naitalang trend na posibleng umabot na lamang sa 15,000 hanggang 16,000 ang bilang ng bagong kaso ng COVID-19 sa NCR bukas.

Samantala, sinabi ni Guido na bumaba rin sa 3.22 noong January 11 ang reproduction number o antas ng hawaan sa isang lugar. —sa panulat ni Airiam Sancho

Inanunsyo ng Department of Education Schools Division Office – Pampanga (DepEd SDO-Pampanga) na suspindido ang mga klase sa lahat ng lebel sa kanilang pampublikong paaralan simula January 17 hanggang January 21, 2022.

Ayon sa DepEd-SDO, ang nasabing hakbang ay upang mabigyan ng panahon ang mga guro, estudyante at mga school personnel na makagpahinga at makapagpagaling.

Una nang nagdeklara ng suspensyon ng klase ang lokal na pamahalaan ng San Juan, Pasay, Marikina at Manila. —sa panulat ni Airiam Sancho

Nasa 30% ang posibleng bilang ng mga residenteng hindi pa bakunado kontra COVID-19 sa National Capital Region (NCR).

Ito ang sinabi ni Department of the Interior ang Local Government (DILG) Undersecretary for Barangay Affairs Martin Diño kaugnay sa unvaccinated individuals.

Aniya, posibleng lumampas na rin sa 70% o naabot na ng rehiyon ang herd immunity kaya’t mapapansin na kahit maraming kaso ng hawaan ng nasabing virus, ito ay mild cases lamang.

Samantala, nilinaw ng DILG na hindi lahat ng barangay sa NCR ang nakapagsumite ng listahan ng mga hindi pa nababakunahan. —sa panulat ni Airiam Sancho