Drew Nacino

Sa gitna ng hindi maawat na oil price increase, isang fuel tanker na may kargang 20,000 litro ng gasolina na nagkakahalaga ng 1.5 million pesos ang na-hijack sa bayan ng Sariaya, Quezon.

 Apat umanong suspek ang nangharang sa truck na pag-aari ng 4M Transport Intel Corporation habang patungong Lucena City mula sa Alora Depot sa Barangay Castañas, Sariaya.

 Kinilala ni Quezon Provincial Police Office Director, Col. Joel Villanueva ang tatlo sa mga suspek na sina Vincent Reyes, na kalauna’y naaresto, Philip Magtanggol at isang alyas Joli.

 Nasakote si Reyes sa tulong ng kanyang cellphone na naiwan sa loob ng truck habang sina Magtanggol, alyas Joli at isang hindi pa nakikilalang salarin ay pinaghahanap pa rin.

 Tinutukan umano ng baril nina Reyes ang driver ng truck bago ito itinali at piniringan at iniwan sa gilid ng kalsada.

 Narekober naman ang fuel tanker sa Barangay Manggalang-Bantilan matapos ang follow-up operation.

Isinara na ni incoming Agrarian Reform Secretary Conrado Estrella III ang pangako ni President-elect Ferdinand Marcos Jr. na ibaba sa 20 pesos ang presyo ng kada kilo ng bigas.

 Inamin ni Estrella na nakausap na niya ang ilang kapwa magsasaka at inihayag ng mga ito na hindi kakayaning maibaba sa 10 piso ang kada kilo ng farm gate price.

 Hanggang 14 pesos anya ang kayang presyo sa farm gate at pagdating sa miller hanggang sa retailers ay maaaring umabot sa 28 pesos ang kada kilo ng bigas.

 Nilinaw ng incoming Secretary ng Department of Agrarian Reform (DAR) na kakayanin naman sa mga susunod na panahon na ibaba ang presyo kung magiging mas moderno ang farming technology sa bansa.

 Una nang sinabi ni outgoing DAR acting Secretary Bernie Cruz na sa 2^nd quarter ng 2023 maibababa ang presyo sa pamamagitan ng mega-farms.

 Samantala, inihayag ni Estrella na isa sa kanyang ipa-prayoridad ang imbestigasyon sa pag-aresto sa Tinang 91 o grupo ng mga magsasaka, land reform advocates, media at estudyante sa Hacienda Tinang sa Concepcion, Tarlac.

 Kung patatagalin anya ito ay maaaring magresulta sa karahasan na posibleng hindi ma-control.

Plano umano ng Communist Terrorist Group na manggulo sa oath-taking ceremony ni President-elect Ferdinand “Bongbong” Marcos Jr. sa Hunyo a-30.

 Ito ang ibinunyag ng dating mga miyembro ng Communist Party of the Philippines-New People’s Army-National Democratic Front (CPP-NPA-NDF) sa idinaos na tagged media briefing ng National Task Force to End Local Communist Armed Conflict.

 Ayon kina Orlando “Ka Warly” Baluyot, Chairman ng Tinang Samahang Nayon Multi-Purpose Cooperative at Ka Pong Sibayan, magsasaka mula sa Hacienda Tinang sa Concepcion, Tarlac, na kapwa dating rebelde, nagsisimula na ang mga komunista na i-organisa ang mga magsasaka sa kanilang lalawigan.

 Maliban sa Hacienda Tinang, ang mga opisyales at miyembro ng CPP-NPA-NDF Legal Front Organizations ay nagsasagawa na anila ng pulong kasama ang mga magsasaka malapit sa Hacienda Murcia at Barangay Central sa loob ng Hacienda Luisita.

 Ang mga magsasaka umano sa mga nasabing lugar ay organisado na ng naturang front groups.

 Inihayag din ni Baluyot na ang mga magsasakang ito ay may problema sa kanilang lupain at nakatanggap na umano ng eviction threats.

 Isiniwalat din ng dalawang dating rebelde na may ilang miyembro ng mga grupong makakaliwa ang madalas na nakikitang pumupunta sa mga nabanggit na lugar.

Umaaray na ilang taxi driver sa walang puknat na pagtaas ng presyo ng mga produktong petrolyo.

Ito ang dahilan kaya’t humiling na rin ang mga taxi driver at operator ng flagdown rate.

Umapela ang Philippine National Taxi Operators Association (PNTOA) na dagdagan ng bente pesos ang kasalukuyang kwarenta pesos na flagdown rate sa taxi.

Ayon kay PNTOA President Bong Suntay, na kinatawan din ng ika-apat na distrito ng Quezon City, temporary additional 20 pesos lang naman ang kanilang hirit pero wala munang calibration ng Metro.

Kailangang-kailangan anya itong ipatupad agad upang maisalba ang mga driver na lumiliit na ang inuuwing kita sa kani-kanilang pamilya.

Gayunman, wala pang natatanggap na petisyon ang LTFRB mula sa grupo habang ipinaliwanag ni Executive Director Kristina Cassion na kailangan nilang balansehin ang kakayahan ng mga commuter na magbayad ng 60 pesos na flagdown.

Pina-panagot ng grupong National Federation of Small Fisherfolk Organization in the Philippines o Pamalakaya si Agriculture Secretary William Dar sa kinakaharap na food crisis ng bansa.

Sa kanilang inilunsad na kilos-protesta sa tapat ng tanggapan ng Department of Agriculture sa Quezon City, kahapon, ipinanawagan din ng Pamalakaya ang pagpapatigil sa importasyon ng isda.

Iginiit ni Pamalakaya Spokesman Rommel Arambulo na sa halip mag-import ng galunggong, dapat anilang bigyan ng subsidiya ang mga mangingisda para maka-agapay sa kanilang hanap =buhay.

Dapat din anyang taasan ang fuel subsidy sa 15,000 mula sa kasalukuyang 3,000 pesos at bilisan ang pamamahahagi nito upang maagapan ang lumiliit na kita ng mga mangingisda bunsod ng hindi maawat na oil price hike.

Una nang inaprubahan ni Pangulong Rodrigo Duterte ang kalahating bilyong pisong pondo para sa fuel subsidy ng nasa 158,000 magsasaka at mangingisda.

Gayunman, hindi pa natatapos ng DA ang distribusyon ng nasabing ayuda.

Naniniwala si Senator-Elect JV Ejercito na mas darami ang mahihikayat na gumamit ng bisikleta, e-scooter at e-bike bilang alternatibong transportasyon sa gitna ng patuloy na pagtaas ng presyo ng langis.

Kaya nanawagan si Ejercito, na aktibong siklista at advocate ng active transportation, sa pamahalaan na tiyakin ang mas ligtas na bike lanes.

Dapat anyang tiyakin ng pamahalaan ang kaligtasan ng mga siklista at scooter rider habang pinagaganda pa ang mass transportation sa bansa.

Ayon kay Ejercito, dapat pangunahan ng Land Transportation Office (LTO) ang pag-popromote ng bisikleta at scooters at tiyaking mabibigyang prayoridad ang active transportation sa national flagship infrastructure program ng gobyerno.

Umapela naman ang nagbabalik-senadong mambabatas sa LTO na ituloy ang pag-aaral kung paano maituturing ang e-scooters at e-bikes bilang alternatibong transportasyon. —sa ulat ni Cely Ortega-Bueno (Patrol 19)

Desisyon ng sinumang senador na hirap mag-ingles ang paggamit ng tagalog o wikang filipino sa pakikipag-debate at pakikipag-talakayan sa plenaryo.

Reaksyon ito ni Senate President Tito Sotto sa pahayag ni Senator-Elect Robin Padilla na tagalog ang kanyang gagamitin sa pakikipag-debate dahil mga Pilipino naman at hindi Amerikano ang mga mambabatas na kanyang haharapin.

Gayunman, binigyang-diin ni Sotto na hindi rin mapililit ang ibang senador na sagutin si Padilla sa wikang Tagalog.

Dapat anyang tandaan na ang journal, rules, index at bills ay pawang nakasulat sa english maging ang konstitusyon.

Alinsunod sa Article 14, Section 7 ng 1987 Constitution, kapwa official language ng bansa ang Filipino at Ingles. —sa ulat ni Cely Ortega-Bueno (Patrol 19)