Drew Nacino

Hinimok ng Inter-Agency Council on Traffic (I-ACT) ang mga jeepney driver at operator na ikunsidera ang kanilang planong mag-tigil-pasada sa gitna ng tumataas na presyo ng mga produktong petrolyo.

 Ayon kay I-ACT Chief Charlie del Rosario, sa halip na tumigil sa pamamasada, dapat magkaloob ng “serbisyo publiko” ang mga operator at driver sa mga commuter at kumilos alinsunod sa kanilang prangkisa.

 Ibina-balanse naman anya ng Land Transportation Franchising and Regulatory Board (LTFRB) ang ekonomiya at pangangailangan ng mga tsuper at mananakay sa pamamagitan ng pag-apruba sa pisong provisional increase sa minimum fare.

 Iginiit ng mga transport group na dagdagan pa ang pasahe lalo’t palaki nang palaki ang gastos nila sa krudo habang lumiliit ang kanilang kita kada araw.

 Hinikayat naman ni del Rosario ang mga transport group na bigyan pa ng kaunting panahon ang pamahalaan na magdesisyon sa hirit na panibagong fare hike dahil taumbayan ang mahihirapan kung agaran ang pagpapasya.

 Una nang inihayag ng LTFRB na kanilang dedesisyunan ang hiling na panibagong dagdag-pasahe bago magtapos ang termino ni Pangulong Rodrigo Duterte sa Hunyo a – 30.

Tatlo sa bawat 10 Filipino o 34% ang naniniwalang humirap ang kanilang pamumuhay sa nakalipas na isang taon.

 Batay ito sa Social Weather Stations (SWS) survey sa 1,440 respondents noong April 19 hanggang 27.

 Lumabas din sa survey na 32% ng mga respondent ang nagsabing bumuti ang kanilang pamumuhay habang 34% pa ang nagsabing walang nagbago.

 Ang nasabing bilang ay mataas ng 14 points sa negative 16 noong December 2021.

 Gayunman, kapos ito ng 20 points o below pre-pandemic level na “very high” +18 na naitala noong December 2019.

Umabot sa 425 ang karagdagang COVID-19 cases ang naitala ng Department of Health (DOH) kahapon.

 Ito na sa ngayon ang pinaka-mataas na daily tally sa nakalipas na dalawang buwan simula nang makapagtala ng 690 new infections, noong April 3.

 Dahil dito, bahagya pang umakyat sa 3,462 ang aktibong kaso kahapon mula sa 3,211 noong Miyerkules habang sumampa na sa 3,694,529 ang total cases.

 Nangunguna pa rin ang National Capital Region (NCR) sa may pinaka-mataas na bagong kaso na 1,761 sa nakalipas na dalawang linggo na sinundan ng Calabarzon, 518; Central Luzon, 277; Western Visayas, 266 at Central Visayas, 136.

Nanindigan ang Philippine National Police (PNP) na walang ligal na batayan para isailalim sa kanilang kustodiya ang SUV driver na suspek sa pag-hit-and-run ng isang guwardya sa Mandaluyong City dahil sa kawalan ng warrant of arrest.

 Ipinaliwanag ni PNP Spokesperson, Col. Jean Fajardo na wala na sa kanilang control kung magkakaroon ng out-of-court settlement ng biktimang si Christian Floralde at suspek na si Jose Antonio San Vicente.

 Hindi na anya ito subject for warrantless arrest dahil mahabang panahon na ang lumipas simula nang mangyari ang insidente.

 Sa kabila ng kawalan ng warrant of arrest, iginiit ni Fajardo na nangako si Atty. Danilo Macalino na ang suspek na si Jose Antonio San Vicente ay haharap sa mga kaso at sasagutin ang mga akusasyon laban sa kanya ngayong araw.

Kung si Senate President Tito Sotto ang tatanungin, dapat ay sundin ng Philippine National Police (PNP) at ng abogado ng suspek na naka-hit and run ng isang security guard ang nakasaad sa RA 10586 o anti-drunk and drugged driving law.

 Ito ang inihayag ni Sotto makaraang madismaya sa hindi nasunod na proseso at ginawa ng mga otoridad sa pagsuko ng suspek na si Jose Antonio San Vicente.

 Iginiit ng outgoing Senate President na dapat ay isinailalim si San Vicente sa comprehensive 5 way test ng Philippine Drug Enforcement Agency (POEA) at hindi tamang regular drug test lang ang gawin.

 Nakapagtataka anyang ang mahirap na lolong nagnakaw lang ng mangga ay ipinakulong agad gayong iba ang pagtrato ng mga otoridad sa may kaya na naka-hit and run ng security guard na muntik nang mamatay.  - sa ulat ni Cely Ortega-Bueno

Inirekomenda ni Senator Sonny Angara na magsagawa na lang ng dayalogo ang Inter-Agency Task Force (IATF) at Cebu provincial government.

 Ito’y upang maiwasang umabot pa sa korte ang usapin sakaling magmatigas ang IATF at Cebu LGU sa kani-kanilang paninindigan hinggil sa mandatory at optional na pagsusuot ng face mask.

 Ayon kay Angara, nauunawaan niya si Cebu Governor Gwendolyn Garcia sa pag-i-isyu ng patakaran ukol sa opsyonal na pagsusuot ng facemask sa kanilang lalawigan.

 Ito’y dahil nakasalalay ang kanilang income sa turismo kaya’t bumuo ito ng pro-active policy sa pagsusuot ng facemask.

 May basehan din naman anya ang hakbang ng gobernador dahil kapag tiningnan ang ibang mga bansa tulad sa Europa, Amerika at Asya, gaya sa indonesia, ginawa na lang optional ang pagsusuot ng face mask.

 Mayroon naman din anyang siyensya na sumusuporta sa optional na pagsusuot ng facemask sa outdoor area pero ibang usapin na sa matataong lugar kung saan mahirap ipatupad ang social distancing, gaya sa bus stop, sakayan ng jeep, tren at palengke. –  sa ulat ni Cely Ortega-Bueno (Patrol 19)

Sa gitna ng kaliwa’t kanang krisis sa mundo, nakita ang pinakamaraming “stressed” na manggagawa’t empleyado sa Pilipinas kumpara sa iba pang bansa sa Southeast Asia.

 Ito ang lumalabas sa “State of the Global Workplace: 2022 Report” ng Gallup, isang global analytics at advice firm, kung saan 50% ng 1,000 respondents na Pilipinong nagtratrabaho ang nakaramdam ng stress isang araw bago ang interview.

 Pumangalawa naman ang Thailand, 41%; Cambodia, 38%; Myanmar, 37%; Vietnam, 35%;  Singapore, 34%, Laos, 32%; Malaysia, 27% at Indonesia, 20%.

 Alinsunod sa labor code, karaniwang 40 oras kada linggo ang trabaho ng isang normal na empleyado habang nakatali sa hanggang 570 pesos per day ang minimum wage sa Metro Manila, na pinakamataas sa buong Pilipinas.

 Ilan sa mga batayan ng mataas na stress level ang hindi patas na trato sa trabaho, na pinakamalaking source ng burnout, na sinusundan ng dumaraming workload, malabong komunikasyon sa manager, kawalan ng manager support at hindi makatarungang time preasure.

Dahil din sa baba ng sahod at taas ng inflation rate, na pinakamataas ngayon simula noong November 2018, nadagdagan umano ang stress ng mga Pinoy, kaya’t mayroong mga naghahanap pa ng dagdag-trabaho.

 Pinayuhan naman ng gallup ang mga manggagawa na bukod sa trabaho, maghanap ng maayos na boss lalo’t ang limang sanhi ng work stress ay madalas nagmumula sa mahinang leader sa trabaho.

Aminado ang Philippine Overseas Employment Administration (POEA) na malayo pa ring maabot ang 7,500 cap na itinakda ng gobyerno sa deployment ng mga healthcare worker.

 Ayon kay POEA Administrator Bernard Olalia, ang nasabing bilang ay para lamang ngayong taong 2022.

 May sapat pa naman anyang supply ng nurse sa bansa pero hindi nagbigay ng eksaktong bilang si Olalia.

 Una nang inihayag ni Olalia na mahigit 2,000 nurse na ang na-deploy simula Enero hanggang Mayo.

 Kanya ring nilinaw na hindi otomatikong aalisin ang deployment cap kapag inalis na ang state of national emergency sa bansa dahil sa COVID-19 pandemic.

 Sa kabila nito, inihayag ni Olalia na hindi pa nila inirerekomenda ang pag-alis sa deployment cap na layuning matiyak na may sapat na health care worker ang bansa sa gitna ng pandemya.

 Nilinaw ni Agriculture Assistant Secretary Noel Reyes na hindi lamang solusyon ang pag-aangkat ng isda upang mapataas ang supply.

 Sa gitna ito ng batikos ng grupong Pambansang Lakas ng Mamamalakaya ng Pilipinas (PAMALAKAYA) na ang pag-fish importation ay maaaring magdagdag ng pasanin sa mga lokal na mangingisda.

 Iginigiit ng pamalakaya na dahil sa pag-aangkat ay maaari nitong bawasan ang halaga ng local fish production, na magpapalala sa kanilang pakikibaka sa gitna ng walang prenong oil price increase.

 Gayunman, ipinaliwanag ni Reyes na kailangang isulong ang pagtatayo ng mga imprastraktura na kailangan ng mga lokal na mangingisda upang matulungan silang madagdagan ang huling isda.

 Samantala hinimok naman ng DA ang susunod na administrasyon na maglagay din ng premium sa Bureau of Fisheries and Aquatic Resources (BFAR) para madagdagan ang suplay ng isda.

Matapos ang walong taong delay, makukumpleto na ngayong Hunyo ang Common Station, na magkokonekta sa apat na railway lines at pampublikong kalsada sa Metro Manila.

Ayon sa Department of Transportation (DOTR), ang Unified Grand Central Station ay isang patunay sa kalidad ng serbisyo sa taumbayan ni Pangulong Rodrigo Duterte, na nakatakdang bumaba sa pwesto sa June 30.

Ang Common Station, na matatagpuan sa North Edsa, Quezon City, ang magdurugtong sa LRT-1, MRT-3, MRT-7 at Metro Manila Subway.

Magkakaroon din ng Intermodal Integrated System sa ilalim nito, na magpapahintulot sa mga pasahero na sumakay ng bus, jeep o taxi.

Sa oras na makumpleto, makapag-se-serbisyo ang Common Station ng hanggang kalahating milyong pasahero kada araw.