Drew Nacino

Dapat munang tanggalin sa ipapasang pambansang budget sa susunod na taon ang mga hindi mahahalaga gastusin o non-essential.

Ito ang payo ni Senator Imee Marcos bunsod ng hirap ng buhay ngayon dulot ng walang tigil na pagtaas ng presyo ng krudo na nagdudulot na ng pagtaas ng presyo ng mga bilihin.

Ayon kay Marcos, dapat munang magtiis at iwasan ang travel expenses, gastusin sa training, pagbili ng mga bagong sasakyan at pagpapaganda ng mga opisina.

Kanila rin anyang susuriin nang husto kung mayroong savings sa ilalim ng 2022 Budget para may magamit na pondong pang-ayuda o subsidy sa mga apektadong industriya tulad ng transport, agriculture at fisheries sectors.

Binigyang-diin ng senador na mahalagang pagtuunan ng pansin ang paglikha ng trabaho,pagpapasigla sa ekonomiya at pagpapababa ng presyo ng mga bilihin. —sa ulat ni Cely Ortega-Bueno (Patrol 19)

Walang himala sa pagresolba sa napakabigat na problemang kinahakaharap ng bansa sa ngayon.

Ito ang inihayag ni Senator Imee Marcos makaraang aminin na kinakabahan sila sa napakataas na expectation o inaasahan ng publiko sa unang isandaang araw sa pag-upo ng kanyang kapatid na si President-Elect Bongbong Marcos.

Ayon sa senador, baka inaasahan ng taumbayan na sa isang kisapmata ay mawawala o malulutas na ang kaliwa’t kanang problema ng bansa.

Iginiit din ng mambabatas na walang himala at kahit pa buhay ang kanyang ama na napakagaling at napakasipag ay posibleng mahirapan din itong lutasin agad ang mabibigat na suliranin ng bansa ngayon. —sa ulat ni Cely Ortega-Bueno (Patrol 19)

Ang Autumn ay isa sa mga partners ng kagawaran gaya ng Fassster na gumagawa ng projections at modelling para sa gobyerno ngayong may pandemya.

Ayon kay Health Undersecretary Maria Rosario Vergeire, kung papasok ang mas nakahahawang subvariants at marami ang susuway sa health protocols at kaunti ang nagpapa-booster, posibleng umabot sa mahigit 4,800 ang ma-oospital.

Ang nasabi anyang projection ay maaaring maganap sa Agosto ngayong taon, na mas mataas kaysa noong kasagsagan ng Delta variant.

Gayunman, hindi binanggit ng DOH kung ang 4,800 ay “daily” o “monthly” figures.

Nilinaw naman ni Vergeire na projection lamang ito at walang katiyakan kung mangyayari talaga.

Hindi babalik sa pamamasada ang nasa isanlibong PUV drivers na kasama sa ‘transport holiday’ sa Negros Occidental hangga’t patuloy na mataas ang presyo ng langis.

Ito ang babala ng United Negros Drivers and Operators Center (UNDOC sa gitna ng lumiliit na kita ng mga driver.

Ayon kay Diego Malacad, Secretary General ng UNDOC, halos 20% ng kanilang mga miyembrong tsuper na ang tumigil na sa pamamasada.

Marami anya sa kanila ang nagtrabaho na lang bilang mga construction worker o nangingisda at tumutulong sa mga sakahan para may ipakain sa kanilang mga pamilya.

Samantala, umapela naman si Malacad sa mga operators na huwag patawan ng parusa ang mga driver kung pansamantalang maghanap ang mga ito ng ibang trabaho.

Makararanas pa rin ng panaka-nakang pag-ulan ang Metro Manila ngayong araw.

Ayon sa PAGASA, dulot ito ng localized thunderstorm na maaaring magresulta ng flood at landslide prone area.

Magiging mainit at maalinsangan naman ang panahon sa Visayas at Mindanao pero asahan pa rin ang pag-ulan.

Nagpaalala naman sa publiko ang PAGASA na huwag kalimutang magdala ng payong kung lalabas ng bahay bilang panangga sa biglaang pagbuhos ng ulan o matinding sikat ng araw.

Dalawang linggo bago magtapos ang termino, muling pinanindigan ni Pangulong Rodrigo Duterte ang giyera kontra droga ng Gobyerno.

Itinanggi rin ni Pangulong Duterte na nagkaroon ng Extra-Judicial Killings sa kampanya laban sa Illegal drugs, taliwas sa iginigiit ng isang dating Supreme Court Justice na lumaganap ang EJK.

Dahil dito, sinupalpal ng Punong Ehekutibo ang dating mahistrado na hindi naman niya pinangalanan.

Tila iba anya ang binasang libro o iba ang pagkaka-intindi ng retiradong S.C. Justice na kanya ring kababayan sa Davao City.

Nagpatutsada rin si Pangulong Duterte na hindi naman lahat ng nabasa ng dating mahistrado sa aklat ay akma sa reyalidad, lalo ang Criminal Law maging ang konstitusyon.