Drew Nacino

Ipinanawagan na ni Philippine Chamber of Agriculture and Food Incorporated (PCAFI) President Danilo Fausto kay Pangulong Bongbong Marcos na magdeklara ng nationwide state of calamity o emergency.

Ito’y upang matugunan ang mga problema at hamong kinakaharap ng bansa sa gitna ng nagbabadyang global food crisis na pinalala ng Russia-Ukraine war, na kabilang sa mga pangunahing food producer.

Iginiit ni Fausto na mahigit 50% ng feeds supply ay nanggagaling sa Ukraine habang nagpatupad ng ban ang India at ilan pang bansa sa exportation ng kanilang feeds upang ma-protektahan ang kanilang sariling pangangailangan.

Bukod dito ay nagmahal ang abono o fertilizer kaya’t karamihan sa mga magsasaka ay hindi na gumagamit ng pataba bagay na may negatibong epekto sa food supply ng Pilipinas.

Ayon kay Fausto, kung magdedeklara ng state of calamity o emergency ay mabibigyan ng kapangyarihan ang pangulo na mamagitan sa pondo ng mga local government unit upang mapalakas ang supply at maiwasang tumaas ang presyo ng pagkain.

Makatutulong din ito sa implementasyon ng Mandanas-Garcia ruling, na inaasahang magpapataas sa pondo ng mga local government unit sa P230 billion.

Hindi naman anya basta maaaring paki-alaman ng pangulo ang pondo ng mga lgu kaya’t kailangan ng karagdagang kapangyarihan.

Sa katunayan anya ay halos wala ng pondo ang pamahalaan nang magpalit ng administrasyon kaya’t dapat ikunsidera ang pagdedeklara ng state of calamity o emergency sa lalong madaling panahon bukod pa sa pagbibigay ng subsidiya sa mga food producer.

4 na hinihinalang miyembro ng New People’s Army NPA ang patay matapos maka-engkwentro ng militar sa bayan ng Binalbagan, Negros Occidental.

Ayon kay 3rd Infantry Division Commander, Maj. Gen. Benedict Arevalo, nagsasagawa ng operasyon ang mga tropa ng gobyerno nang maganap ang sagupaan sa Barangay Santol, kahapon.

Tumagal anya ng tatlong minuto ang putukan sa pagitan ng mga miyembro ng 94th Infantry Battalion, Negros Occidental Police Provincial Office, binalbagan police at mga rebelde.

Narekober naman sa encounter scene ang ilang mataas na kalibre ng baril at mga personal na kagamitan nga mga hinihinalang NPA member.

Kinumpirma ng mga fast-food giants Jollibee Group at Mcdonald’s Philippines na numinipis na ang stock ng manok sa ilan nilang branch.

Ito, ayon sa Jolibee Group, ay bunsod ng patuloy na pagtaas ng consumer demand at limitadong chicken supply sa merkado, kaya’t ilang branches ng Jollibee at Mang Inasal ang hindi nakakapag-serve ng chicken orders.

Inihayag naman ni Mcdonalds’ Philippines Corporate Relations Director Adi Hernandez na ilang branches nila ang pansamantalang wala o limitado ang chicken products.

Nakikipag-ugnayan na ang Jollibee at Mcdo sa kanilang supplier upang matugunan ang lumalaking demand at tiniyak na makakapag-serve na ng chicken orders sa kanilang mga customer sa lalong madaling panahon.

Sa pag-iikot ng DWIZ sa ilang branches ng Jollibee at Mcdo sa Caloocan at Quezon Cities, limitado na ang pag-order ng manok at hindi na rin maaaring mamili ng chicken parts.

Sa Imus City, Cavite naman, pahirapan din ang pag-order ng chicken bucket meal sa ilang branch ng mga nasabing fast food chain simula pa noong isang buwan.

Guilty ang hatol ng Sandiganbayan 2nd Division kay dating AFP Comptroller, Maj. Gen. Carlos Garcia matapos ang 12 taon na plea bargaining agreement.

Sa 8 pahinang desisyon, pinatawan ng Anti-Graft Court si Garcia ng 4 hanggang 8 taong pagkakakulong matapos mapatunayang guilty sa kasong direct bribery noong nasa pwesto pa.

Pinagbabayad din ng Korte ang dating opisyal ng mahigit P400 million na tatlong beses na mas mataas kumpara sa isinasaad ng plea bargaining agreement na P135 million.

Nakasaad din sa hatol na hindi makalalabas ng kulungan si Garcia hangga’t hindi nababayaran nang buo ang multa.

Guilty rin ang hatol sa dating AFP general sa kasong ‘facilitating money laundering’ na may katapat na kulong ng 4 hanggang 6 na taon at multa na P1.5 million.

Ang mga kaso ay nag-ugat mula sa iregularidad sa kanyang statements of assets, liabilities and net worth at mga nadiskubreng ‘ill-gotten wealth’ ng kanyang pamilya habang nasa serbisyo.

Wala pang pasya ang PNP kung magbibigay ng legal assistance o hindi sa walong NCRPO member na idinadawit sa kaduda-dudang pagkamatay ng walong high-profile inmates sa New Bilibid Prison, sa Muntinlupa.

Bagaman inihayag ng BuCor na namatay sa covid-19 ang naturang bilanggo, nakitaan naman ito ng National Bureau of Investigation ng mga iregularidad sa medical at health records.

Ito ang dahilan kaya’t naghain ng kasong murder laban sa 22 NCRPO officials na naka-assign sa BuCor sa kasagsagan ng covid-19 pandemic noong 2020.

Ayon kay PNP Director for Operations, Maj. Gen. Valeriano de Leon, hinihintay na lamang nila ang formal report at handa naman silang makipagtulungan sa NBI.

Entitled naman anya ang mga nasabing pulis sa legal assistance kung may kaugnayan sa trabaho ang mga reklamo pero kung hindi ay kailangan nilang maghanap ng sariling abogado.

Isasailalim naman sa restrictive custody ang mga isinasangkot na NCRPO official kung mayroong matibay na ebidensya na mag-uugnay sa kanila sa kaso.

Allergic umano ang taumbayan sa mga usaping pulitikal pagdating sa pag-amyenda sa konstitusyon.

Ito ang inihayag ni incoming Senate President Juan Miguel Zubiri makaraang igiit na hindi muna dapat pag-usapan ang Charter Change o Cha-Cha dahil kabago-bago pa lang ng administrasyon.

Ayon kay Zubiri, sobrang kontrobersyal ng issue ng Cha-Cha lalo na ang pagbago sa term limits ng mga elected officials kaya hindi nila ito magiging prayoridad sa unang taon ng 19th Congress.

Mas dapat anya nilang tutukan ang mga usapin o mga panukalang makatutulong sa pagpapasigla ng ekonomiya at paano muling ma-i-aangat o mapapahusay ang pamumuhay ng publiko.

Sinabi naman ni Senator Win Gatchalian na ang dapat bigyang prayoridad sa ngayon ng Kongreso ang pa-protekta sa ekonomiya at bansa mula sa malaking pagkakautang.

Hindi anya ang pagbabago sa political division sa konstitusyon ang inaatupag sa halip ay dapat maglatag ng mga solusyon kontra inflation, walang tigil na pagtaas ng presyo ng langis at may nagbabadyang food crisis.

Ipinagtanggol ni Finance Secretary Ben Diokno si Pangulong Bongbong Marcos matapos itong magduda sa panibagong datos ng gobyerno pagdating sa bilis ng pagtaas ng presyo ng bilihin o inflation rate.

Ipinaliwanag ni Diokno na mali lang ang pagkaka-intindi sa pangulo hinggil sa iniulat ng Philippine Statistics Authority na 6.1% inflation rate noong Hunyo.

Sa katunayan anya ay tinutukoy ni Pangulong Marcos ang full year figure gayong ang aktuwal na inflation rate simula enero hanggang hunyo ay aabot lamang sa 4.4%.

Buwan-buwan anyang mayroong projection ang Bangko Sentral ng Pilipinas ng inflation rate.

Ipinunto ni Diokno na pasok pa rin sa forecast ng BSP na 5.7% ang 6.1% inflation rate para sa Hunyo at gaya ng kanyang naunang binanggit ay nasa 4.4% ang average inflation mula Enero hanggang Hunyo.

Iginiit ng kalihim na tama naman ang pangulo sa pahayag nitong ang kasalukuyang mataas na inflation ay nararanasan din sa ibang panig ng mundo gaya sa indonesia na umakyat ang overall inflation sa 4.4% noong Hunyo kumpara sa 3.6% noong Mayo.

Kasado na rin ang dagdag-suweldo para sa mga kasambahay sa Calabarzon at Soccsksargen.

Ito, ayon sa National Wages and Productivity Commission, ay alinsunod sa wage order na inilabas ng Regional Tripartite Wages and Productivity Boards RTWPB at inilathala noong Hunyo a – 30.

Sa naturang kautusan ng RTWPB – Calabarzon, ang mga domestic worker sa growth corridor area ng REHIYON, na sumasaklaw sa mga lungsod at first-class na munisipyo ay makakukuha ng 1,500 peso monthly wage hike.

Itinakda nito ang minimum na sahod ng mga domestic worker sa mga lugar na ito sa P5,000.

Samantala, tatanggap naman ng P500 salary increase ang mga domestic worker sa Soccsksargen kaya’t magiging P4,500 na ang kanilang suweldo kada buwan.

Magkakabisa ang dalawang wage order sa Hulyo a – disi sais.

Inihain sa mababang kapulungan ng Kongreso ang P1.5 trillion Bayanihan 3 upang masuportahan ang bayan bangon muli agenda ni Pangulong Ferdinand “Bongbong” Marcos, Jr.

Layunin ng House Bill 271 o National Economic Stimulus and Recovery Act of 2022 na tustusan ang unang tatlong taon ng administrasyong Marcos para makalikha ng milyong trabaho at i-angat ang ekonomiya ng Pilipinas.

Ito’y sa gitna ng epekto ng covid-19 pandemic at krisis dulot ng Russia-Ukraine war.

Ang nasabing panukala ay ini-akda nina Camarines Sur Representatives Lray Villafuerte, Tsuyoshi Anthony Horibata, Miguel Luis Villafuerte at Bicol Saro Partylist Rep. Nicolas Enciso VIII.

Iginiit ni Villafuerte na ang panukala ay naka-batay sa mga naunang priority legislation na binanggit ni incoming Speaker Ferdinand Martin Romualdez sa 19th Congress na tinawag na Bayan Bangon Muli Bill.

Alinsunod ito sa mga naunang bayanihan to heal as one o Bayanihan 1 at Bayanihan to Recover as One o Bayanihan 2 na naging batas noong 2020 bilang tugon ng gobyerno sa pandemya.