Drew Nacino

Target ng Commission on Population and Development (POPCOM) na mapanatili ang rate ng paglaki ng populasyon ng bansa sa 1%.

Inihayag ni Executive Director Juan Antonio Perez III, na ni-re-appoint sa naturang posisyon, na inaasahan nilang tataas muli ang populasyon lalo’t unti-unti nang bumabalik sa normal ang ekonomiya.

Gayunman, inaasahan din anya nilang mananatili ito sa 1%.

Kung noon ay 1.5 million ang nadaragdag sa populasyon kada taon maaaring umabot na lamang ito ng 1-milyon kada taon na mas magiging manageable para sa gobyerno.

Para makamit ang 1% o 1-milyong population growth rate, tiniyak ni Perez na ipagpapatuloy ang mga programa ng POPCOM sa responsableng pagiging magulang at pagpaplano ng pamilya.

Muling ipinag-utos ng National Telecommunications Commission (NTC) sa mga Regional Director nito at mga Telcos na palakasin ang mga hakbang kontra fake job text scams.

Ito, ayon kay NTC commissioner Gamaliel Cordoba, ay dahil patuloy na nakatatanggap ang publiko ng mga pekeng job text at kahalintulad na scams.

Nanawagan din ang NTC sa DITO Telecommunity, Globe Telecoms at Smart Communications na magsagawa ng text blast sa kanilang subscribers simula kahapon hanggang July 11.

Layunin nito na bigyang babala ang mga subscriber laban sa mga naglipanang text na nag-aalok ng pekeng trabaho kapalit ng malaking sweldo.

Inatasan din ang Telcos na i-block ang sim cards na ginagamit sa fraudulent activities at paigtingin ang public information campaign para bigyang kaalaman ang publiko laban sa mga scam.

Muling pinalagan ng Simbahang Katolika ang pag-re-file sa 19^th Congress ng divorce bill.

Iginiit ni Father Jerome Secillano, Executive Secretary ng Catholic Bishops Conference of the Philippines-Public Affairs Committee, lalong makasisira sa pundasyon ng pamilya ang diborsyo.

Tugon ito ni Secillano matapos ihain ni Albay Rep. Edcel Lagman ang House Bill 78 o “Absolute Divorce Act” sa paniniwalang ito ay karapatan ng kababaihan.

Ayon kay Secillano, nakalulungkot na may ilang mambabatas na mas nakatutok sa pagsira sa kasagraduhan ng kasal sa halip na pagtibayin at ayusin ang pagsasama ng mga mag-asawa.

Binigyang-diin ng opisyal ng simbahan na dapat pagtuunan ng mga mambabatas ang mga programang tutugon sa tunay na problema ng bansa gaya ng kahirapang pinalala ng pandemya na labis naka-apekto sa ekonomiya at mga mamamayan.

Ilan pang posisyon sa gobyerno ang pinunan na ni Pangulong Ferdinand “Bongbong” Marcos Jr.

Pinangunahan ni Pangulong Marcos ang panunumpa ng mga bagong talagang opisyal sa Malacañang, kahapon.

Kabilang sa mga nadagdag sa listahan ng mga appointed official ang aktor na si Tirso Cruz III bilang bagong Film Development Council Chairman;

Antonio Manuel Lagdameo, Ambassador at Permanent Representative ng Pilipinas sa United Nations; Junie Cua, chairperson ng Philippine Charity Sweepstakes Office;

Mark Lapid, chief operating officer ng Tourism Infrastructure and Enterprise Zone Authority; Romeo Lumagui Jr., deputy Commissioner for Operations ng Bureau of Internal Revenue;

Juan Revilla, board member ng Movie and Television Review and Classification Board, Ambassador Jose Manuel Romualdez, bilang Philippine Ambassador to USA; Abdulghani Salapuddin bilang Administrator at chairman ng Southern Philippines Development Authority;

Jose Arnulfo Veloso, pangulo ng Government Service Insurance System; Col. Ramon Zagala bilang Presidential Security Group Commander at Amenah Pangandaman, secretary ng Department of Budget and Management na hindi nakapag-oath taking noong Biyernes.

Bahagyang bumaba sa 10,032 ang aktibong kaso ng COVID-19 sa bansa kahapon kumpara sa 10,094 noong Lunes.

Sa datos ng Department of Health, nakapagtala ng karagdagang 823 COVID-19 cases kahapon kaya’t umakyat sa 3, 710, 145 ang total caseload.

Kabilang na rito ang 3, 639, 503 recoveries at 60,610 deaths.

Ang mga bagong infections ay bahagyang mababa kumpara sa nakalipas na linggo na hindi natinag sa 1,000 level gaya noong lunes na umabot sa 1,188 ang new cases.

Iniuugnay ang mababang bilang sa kaunting tests na isinagawa noong Linggo, Hulyo a – 3.

Nananatili ang Metro Manila sa may pinaka-maraming COVID-19 cases sa lahat ng rehiyon sa nakalipas na dalawang linggo na 5,918; na sinundan ng CALABARZON, 2,353 at Western Visayas, 1,043.

Hinimok ng ilang food producer si Pangulong Bongbong Marcos na tutukan ang mga kinakaharap na hamon ng agriculture at livestock sectors sa harap ng nagbabadyang global food crisis.

Ayon kay Bantay Bigas spokesperson Cathy Estabillo, bilang short term solution, dapat bigyan ng subsidiya ang mga magsasaka ngayong planting season upang makapagtanim ng mas maraming crops at makapag-ani rin ng mas marami.

Una nang ipinag-utos ni Marcos, bilang Kalihim ng Department of Agriculture ang agarang implementasyon ng “Masagana 150” at “Masagana 200” upang mapalakas ang food production.

Layunin ng mga nasabing programa na makapag-produce ng 150 hanggang 200 kabang bigas kada ektarya.

Gayunman, inihayag ni Estabillo na sa Thailand, na isang rice exporting country, aabot lamang sa 120 cavans per hectare ang inaani kaya’t dapat pag-aralan muna ang kapasidad ng agri-sector ng Pilipinas upang makapag-plano nang maigi.

Bukod sa pagpapalakas ng produksyon ng palay at mais, dapat din anyang palakasin ang livestock production ng bansa.

Sinabi ni United Broilers Raisers Association President Bong Inciong na ang hamon ngayon kay Pangulong Marcos ay silipin ang sistema ng World Trade Organization na mayroong pumapasok na importasyon pero hindi mawawalan ng loob ang mga producers.

Pinayuhan naman ni Gregorio San Diego ng Philippine Egg Board Association ang Pangulo na dapat nang pulungin ang mga food producer upang mabatid kung gaano kalalim ang problema at makapag-rekomenda rin ng mga solusyon.

Mas ikinukunsidera ng Marcos Administration na palakasin ang produksyon ng palay at mais sa halip na mag-import ng karagdagang supply upang ma-stabilize ang presyo ng pagkain.

Ito ang inihayag ni Pangulong Bongbong Marcos matapos ang kanyang unang cabinet meeting, kahapon.

Ayon sa Pangulo, hangga’t maaari ay dapat bawasan ang pag-i-import ng mga food product ng Department of Agriculture hanggang katapusan ng taon.

Gayunman, dapat anyang ipagpatuloy ang pag-import ng ilang produkto tulad ng manok dahil sa kakulangan ng feeds.