Drew Nacino

Nasa Pilipinas na si Chinese State Councillor at Foreign Minister Wang Yi.

Kinumpirma ng Department of Foreign Affairs na dakong alas-10 kagabi nang dumating si Wang sa Villamor Air Base sa Pasay City.

Ito’y para sa kanilang pulong ni Pangulong Ferdinand “Bongbong” Marcos Jr. na layuning pagtibayin ang ugnayan ng Pilipinas at China.

Una nang inihayag ni Pangulong Marcos na hindi lamang ang issue sa West Philippine Sea ang tatalakayin sa kanilang pulong.

Wala namang inilabas na schedule ang DFA kung anong oras ang pagkikita ng Pangulo at Chinese official.

Sumampa sa 6.8% ang weekly COVID-19 positivity rate sa bansa.

Ayon sa Department of Health, 91% na o mayorya ng mga probinsya, highly urbanized cities at independent component cities na ang nakitaan ng pagtaas ng mga kaso sa mga nakalipas na linggo.

Sa lahat ng mga rehiyon, anim ang nakapagtala ng positivity rates na lampas na sa itinatakdang 5% threshold ng World Health Organization.

Ang mga ito ay ang Metro Manila, 9.3%; CALABARZON, 8.4%; Western Visayas, 7.1%; MIMAROPA, 6.4%; CAR, 5.5% at Central Luzon, 5.4%.

Sa kabila nito, nananatiling mababa ang Healthcare Utilization Rates at hindi naman humahantong sa severe at critical COVID-19 admissions ang pagtaas ng mga kaso sa mga rehiyon.

Kahit tumataas ang infections, lahat ng rehiyon ay nananatili sa low risk classification maging ang Average Daily Attack Rates at Healthcare Utilization Rates.

Nakatakdang bisitahin ni Chinese State Councilor at Foreign Minister Wang Yi si Pangulong Ferdinand “Bongbong” Romualdez Marcos Jr.

Ayon kay Foreign Ministry spokesperson Zhao Lijian, kabilang ang Pilipinas sa mga bansang pakay ng gagawing official visit ni Yi simula ngayong araw hanggang bukas.

Si Wang ang pangalawang pinaka-senior Chinese official na bibisita sa Pilipinas matapos si Chinese Vice President Wang Qishan, na dumalo sa inagurasyon ni Pangulong Marcos noong  Biyernes bilang special representative ni Presidenti Xi Jinping.

Wala namang ibinigay na detalye ang DFA sa byahe ni Wang pero magkakaroon umano ng bilateral talks ito sa kanyang Philippine counterpart na si Foreign Affairs secretary Enrique Manalo at National Security Adviser Clarita Carlos.

Nakatakda ang pagbisita ng nasabing Chinese official, isang linggo bago ang komemorasyon ng Pilipinas sa tagumpay nito sa International Arbitral Court, na nagpawalang-bisa sa claim ng China sa pinag-aagawang West Philippine Sea, kabilang ang bahaging inaangkin din ng Pilipinas.

Hawak na ng isang babaeng street sweeper mula Malabon at isang magsasaka mula Quezon Province ang magkahiwalay na premyo nilang P100 million mula sa lotto games ng Philippine Charity Sweepstakes Office.

Ayon sa PCSO, kinubra na ng babae ang P103.2 million na napanalunan nito sa Mega Lotto 6/45 draw noong June 17, 2022.

25 taon na umanong nagtatrabaho bilang taga-walis ang babae at walang permanenteng trabaho ang kaniyang asawa.

Kinubra na rin ng 29- anyos na lalaking magsasaka mula General Nakar, Quezon ang napanalunan nitong P100 million sa 6-58 Ultra Lotto draw noong May 24.

Nasungkit ng magsasaka ang winning combination sa pamamagitan ng “Lucky Pick” system.

Sumampa na sa 51,622 ang dengue cases sa bansa kabilang ang 239 na death toll simula Enero a–1 hanggang Hunyo a-18.

Sa datos ng Department of Health, ang nasabing bilang ngayong taon ay 58% na mataas kumpara sa 32,610 cases sa kaparehong panahon noong isang taon.

Ayon sa DOH, pinakamaraming naitalang kaso ng dengue sa Central Luzon, 6,641; Central Visayas, 6,361 at Zamboanga Peninsula, 4,767.

Nakapagtala naman ng 13,075 cases sa loob lamang ng nakalipas na apat na linggo o simula Mayo a –8 hanggang Hunyo a – 18.

Pinaka-marami ang kaso ng naturang sakit sa Central Luzon, 1,826; Central Visayas, 1,570 at Cordillera Administrative Region 1,175.

Mayroon ding increasing trend sa MIMAROPA, Western Visayas, Central Visayas, Zamboanga Peninsula, Davao Region, BARMM at CAR.

Samantala, 15 mula sa 17 rehiyon ang lumampas na sa epidemic threshold sa nakalipas na apat na linggo maliban sa Region 1 at CARAGA.