Drew Nacino

Nilinaw ng OCTA Research Group na kaunti ang inirereport na COVID-19 cases sa kabila ng patuloy na pagdami ng mga aktibong kaso sa bansa.

Ito, ayon kay OCTA Research Fellow, Dr. Guido David, ay dahil nabawasan ang mga isinasagawang tests.

Sa ngayon anya ay nasa 654 cases per day ang seven-day average sa Metro Manila kaya kung nagsasagawa ng test tulad noong Enero, dapat ay aabot sa 1,300 ang cases kada araw.

Batay sa datos ng DOH, bahagyang tumaas sa 21% ang bed occupancy rate sa NCR, kung saan 6,072 beds ang okupado at 22,831 beds ang bakante sa halos 2K ospital at medical facilities.

Kahit ang ilang Government official ay tinamaan din ng COVID-19 gaya nina Pangulong Bongbong Marcos at Justice Secretary Boying Remulla na kapwa nakaranas ng mild symptoms.

Karagdagang 2,018 COVID-19 cases ang naitala ng Department of Health kahapon.

Ito na sa ngayon ang pinaka-mataas na daily COVID-19 cases simula noong Pebrero a – 18 kung kailan nakapagtala ng 2,232 na kaso.

Dahil sa panibagong mga kaso, sumampa na sa 13, 818 ang Active cases sa bansa kumpara sa 13,021 noong Sabado.

Lumobo naman sa 3, 718, 467 ang total case load kabilang ang 3, 644, 009 recoveries makaraang madagdagan ng 1,147 habang nasa 60, 640 na ang death toll.

Sa nakalipas na dalawang linggo, nangunguna pa rin ang National Capital Region sa mga rehiyong may pinaka-maraming infections na 8, 016 cases.

Sinundan ito ng CALABARZON, 3,536; Western Visayas, 1,535; Central Luzon, 1,444 at Central Visayas, 730 cases.

Inamin na ng suspek na si Darwin De Jesus ang pagpatay sa babaeng engineer na natagpuang naaagnas sa masukal na bahagi ng Guiguinto, Bulacan

Ito’y makaraang marekober ang mga ID at ATM card ng biktimang si Princess Dianne Dayor sa bahay ni De Jesus sa Barangay Santor.

Detalyadong isinalaysay ng suspek sa kanyang Extra Judicial confession ang ginawa niyang pagholdap at pagpatay kay Dayor noong Hulyo a –2.

Napag-alamang nawawala ang wallet na naglalaman ng mga ID at ATM card ng biktima nang matagpuan at imbestigahan ito ng mga otoridad sa madamo at gilid ng sapa sa boundary ng Barangay Tabang, Guiguinto at Barangay Tikay, Malolos City.

Dahil dito, lalong nadiin si De Jesus sa naturang krimen at inihayag ng Bulacan Provincial Police Office na nakamit na ni Dayor ang hustisya.

Huling nakitang naglalakad ang biktima umaga noong Hulyo a – 2 habang papasok sana sa kanyang trabaho sa Bayan ng Pulilan.

Bukas si Pangulong Ferdinand “Bongbong” Marcos Jr., sa posibilidad na magdeklara ng State of Emergency o Calamity upang agad na matugunan ang problema sa food security ng bansa.

Ito ang binunyag ng Philippine Chamber of Agriculture and Food Incorporated (PCAFI) matapos pulungin ni pangulong marcos na kasalukuyang kalihim ng department of agriculture.

Kabilang ang agarang pagdedeklara ng State of Emergency o Calamity sa rekomendasyon ng PCAFI bilang solusyon sa gitna ng naka-umang na food crisis.

Ayon kay PCAFI president Danilo Fausto, inatasan na ng punong ehekutibo ang legal team nito upang pag-aralan ang posibleng deklarasyon at tugunan ang ilang sensitibong issue na bumabalot dito.

Kabilang sa mga issue na tututukan ang prayoridad ng mga local government unit, partikular ang mga wala sa rural area at budget making process ng mga LGU.

Layunin ng deklarasyon ng State of Calamity o Emergency na magamit ng Pangulo ang kailangang financial resources upang matiyak na may sapat na pagkain para sa lahat ng Pinoy.

Isinusulong ng Department of Agriculture (DA) ang Nationwide Cropping Calendar upang matiyak na walang masasayang na mga Agri-product.

Inihayag ito ni DA Undersecretary for Consumer and Political Affairs Kristine Evangelista matapos ang ulat na sangkatutak na Kamatis na itinapon ng isang magsasaka sa Bayan ng Lantapan, Bukidnon.

Nag-viral sa social media ang larawan ng mga kamatis na itinambak dahil sa oversupply, bagsak-presyo sa merkado at kakaunti lamang ang bumibili.

Ayon kay Evangelista, kapag mayroong cropping calendar ay makahahanap na ang mga magsasaka ng bibili sa kanilang mga produkto bago ang anihan.

Layunin din ng Cropping calendar na mapigilan ang oversupply ng partikular pananamim dahil malalaman ng mga magsasaka kung ano ang dapat itanim at makapaghahanap ng bibili ng kanilang produkto bago pa anihin.

Samantala, handa ang DA na payagan ang mga koopertaiba na makakuha ng angkop na pasilidad upang iproseso ang mga kamatis sa ibang produkto, tomato sauce o ketchup.

Sa datos ng Philippine Statistics Authority, bumagsak ang produksyon ng kamatis sa 6.1% o katumbas ng 90,000 metric tons sa unang tatlong buwan ng taon kumpara sa 95,870 metric tons sa kaparehong panahon noong 2021.

Humingi ng paumanhin si dating WBC World Featherweight Champion Mark Magsayo sa kanyang fans matapos mabigong ipagtanggol ang kanyang titulo laban kay Rey Vargas ng Mexico.

Bagaman umiskor ang 27-anyos na Pinoy boxer ng knockdown laban sa Mehikano sa Round 9, hindi ito sapat upang iligtas siya sa pagkatalo sa kanilang sagupaan sa Alamodome sa San Antonio, Texas.

Nagpasalamat naman si Magsayo sa lahat ng mga sumusuporta sa kanya at tiniyak na babalik siya sa parisukat na lona at magsusumikap na makasungkit muli ng korona.

Nagwagi si Vargas via split decision at isa ng two-division world champion na may perfect record na 36-0, kabilang ang 22 Knockouts.

Lumagpak pa sa P56 per dollar ang halaga ng piso, ang pinaka-mababang lebel nito sa nakalipas na halos 17 taon.

Sa gitna ito ng pinangangambahang recession o paghina ng economic activity kaya’t unti-unting pumapanig ang mga investor sa US dollar na ligtas umano sa global recession.

Nagsara ang palitan ng piso kontra dolyar sa 56.06 kahapon, kumpara sa P55.67 noong Miyerkules.

Ito, ayon sa Bangko Sentral ng Pilipinas, sa ngayon ang pinaka-malubhang performance ng piso simula noong September 27, 2005 kung saan sumadsad sa 56.29 ang palitan.

Nangangahulugan ito na lumiliit pa ang halaga ng piso o nag-de-depreciate na isang malaking problema para sa Pilipinas, na nalulula na sa imported inflation dulot ng pagsirit ng global energy prices bunsod ng Ukraine-Russia war.

Nakahanda na ang mga miyembro ng Private Hospitals Association of the Philippines Incorporated (PHAPI) sa posibleng pagdami ng na-a-admit na covid-19 patients, partikular ang mga severe at critical ngayong buwan.

Ayon kay PHAPI President Dr. Jose Rene de Grano, ang tangi nilang limitasyon ay ang posibilidad ng kakulangan ng mga healthcare worker.

Batay sa datos ng OCTA Research Group, pitong lalawigan na ang may mahigit 10% positivity rate at patuloy na tumataas sa iba’t-ibang bahagi ng bansa.

Ito ay ang mga probinsya ng Antique, 20.6%; Laguna, 17.3%; Rizal, 16.5%; Pampanga, 17.3%; Cavite, 13.2%; Batangas, 10.7% at Iloilo, 10.1%.

Sa National Capital Region, lumundag sa 9.8% ang positivity rate noong Martes, Hulyo a – 5 kumpara sa 8.3% noong Hulyo a – 2.

Pinaigting na ng Department of Agriculture – Region 7 ang kanilang pagbabantay sa lahat ng pork product sa Central Visayas upang hindi makapasok ang african swine fever virus.

Ito ang tiniyak ni DA-7 OIC–Regional Executive Director Joel Elumba sa kabila ng maling impormasyon na inilabas ng isang reporter sa national television noong Martes na may kaso ng ASF sa Dumaguete City.

Ayon kay Elumba, nananatiling ligtas kontra ASF ang pork products sa rehiyon sa pakikipagtulungan ng Regional Veterinary Quarantine 7 at Bureau of Animal Industry, lahat ng tanggapan ng provincial veterinary at mga beterinaryo.

Umaasa ang DA official na itatama ng tv network ang nauna nilang report.

Idinagdag ni Elumba na ang pagdedeklara ng ASF sa isang lugar ay dapat dokumentado at may lagda ng isang opisyal ng lgu at ng regional executive director ng DA.

Isang pulis ang patay matapos tambangan ng mga hindi nakilalang salarin sa bayan ng Cabagan, Isabela.

Kinilala ni Cabagan Police Chief, Maj. Rodante Albano ang biktimang si Corporal Marnix Baquiran, 34 anyos, residente ng Peñablanca, Cagayan at naka-assign sa Reina Mercedes Police Station sa Isabela.

Minamaneho anya ng biktima ang silver Toyota Fortuner nitong may plakang BBZ-3250 nang paulanan ng bala ng mga hindi nakilalang salarin sa bypass road, barangay Ugad, pasado alas-8 ng umaga.

Nagtamo ng maraming tama ng bala sa iba’t-ibang bahagi ng katawan si Baquiran.

Napag-alaman na unang nadestino sa Cabatuan Police Station ang biktima bago napunta sa Reina Mercedes.

Iniimbestigahan na ng pulisya ang motibo sa pagpatay at sino ang posibleng mga nasa likod ng krimen.