Drew Nacino

Hiniling na ng Philippine Federation of Bakers Association Incorporated (PFBAI) sa gobyerno na payagan na ang panibagong dagdag presyo sa pandesal.

Ayon kay PFBAI spokesman Chito Chavez, unti-unti nang namamatay ang industriya ng pagtitinapay dahil sa lumalaking gastos sa sangkap sa paggawa ng paboritong almusal ng mga Pinoy.

Nananawagan anya ang mga Community Baker na itaas sa P4 ang presyo ng regular pandesal mula sa kasalukuyang P2 habang P8 para sa jumbo pandesal.

Ipinaliwanag ni Chavez na tuwing nagmamahal ang harina, mantika at asukal ay agad nagtataas ng presyo ang mga maliit na panaderya kinabukasan dahil kung sa susunod na linggo pa bibili ng supplies ay malulugi naman ang mga ito.

Ganito rin ang sentimyento ng Asosasyon ng Panaderong Pilipino na aminadong hirap na silang ipagpatuloy ang kanilang operasyon at apektado na rin ang kalidad ng kanilang mga produkto.

Inihayag ni Princess Lunar, Director ng Asosasyon, sumusuko na ang maraming nagtitinapay kahit hindi naman nagbabago ang presyo ng tinapay.

Iginiit ni lunar na kung tutuusin ay maliit lamang ang P4 na hiling ng mga maliit na Community bakery para mabalanse ang kanilang operational cost.

Samantala, umaapela na rin ng tulong mula sa Department of Trade and Industry ang mga nasabing grupo.

Umapela naman ang grupong The Passenger Forum (TPF) sa gobyerno na isaayos ang public transportation sa bansa, lalo sa Metro Manila bago ang full resumption ng face to face classes.

Ayon kay TPF Convenor Primo Morillo na hindi pa handa ang public transportation sa pagbabalik ng klase kaya’t kailangan munang tugunan ang mga problema sa imprastraktura upang maging maayos ang pagbabalik ng mga estudyante sa normal classroom-based education.

Bagaman naiitindihan anya nilang maraming sektor ang nanawagan para sa pagbabalik ng face-to-face classes, dapat mabatid ng gobyerno ang karagdagang demand sa public transport system.

Wala pang tugon ang Department of Transportation sa naturang issue habang nananatiling suportado ng National Parent-Teacher Association Philippines ang pagbabalik ng face-to-face classes.

Ito’y sa kabila ng patuloy na pagtaas ng COVID-19 cases sa bansa, partikular sa Metro Manila.

Nanawagan ang isang grupo ng mga guro sa Department of Education na iurong ang pagbubukas ng susunod na School Year na nakatakda sa Agosto a – 22.

Ito, ayon kay Teachers Dignity Coalition (TDC) Chairperson Benjo Basas, ay upang mabigyan ang mga guro ng sapat na panahon para makapagpahinga sa pagitan ng nagdaan at susunod na School Year.

Una na nang hiniling ng TDC kay Vice President at Education Secretary Sara Duterte noong Biyernes na buksan ang School Year 2022-2023 sa kalagitnaan ng Setyembre o Oktubre.

Bagaman tapos na anya ang mga klase, marami pa ring trabahong pinapagawa sa mga guro kaya’t mabibitin ang dapat sana’y dalawang buwan nilang bakasyon.

Kabilang sa mga ito ang In-service training, enrollment activities at pagsasagawa ng mga remedial at enrichment classes.

Wala pang inilalabas ang DepEd na opisyal na School Calendar para sa nasabing school year at tugon sa hiling ng TDC.

Nasa ‘State of Calamity’ na ang bayan ng Banaue, Ifugao matapos masalanta ng flashfloods at landslides dulot ng malakas na ulan dala ng Habagat noong Huwebes.

Layunin ng deklarasyon na magamit ng Lokal na Pamahalaan ang kanilang pondo sa rehabilitasyon at makapag-abot ng tulong sa mga apektadong residente.

Batay sa datos ng DSWD Field office —CAR, tinatayang 1K pamilya o nasa 3K katao na ang apektado ng kalamidad sa 9 na barangay sa Banaue.

Dalawang bahay naman ang totally damaged habang 332 ang partially damaged.

Lumobo na sa P14.6 million ang halaga ng pinsala sa agrikultura sa lalawigan ng Ifugao matapos ang flashfloods at mudslides dulot ng Southwest monsoon o Habagat.

Batay sa datos ng Department of Agriculture, halos 700 magsasaka, na may production loss volume na 728 metric tons at halos 200 ektaryang taniman na ang apektado.

Kabilang sa mga pinaka-napuruhan ang mga palayan at high-value crops.

Hinikayat ng DA ang Lokal na Pamahalaan na magbigay ng bigas, mais, gamot, assorted vegetable seeds at livestock at poultry.

Ilalarga rin ng Kagawaran ang Survival and Recovery Program ng Agricultural Credit Policy Council habang bibigyan ang mga magsasaka ng pondo mula sa Philippine Crop Insurance Corporation.

Magkakaloob din ang DA ng Quick Response Fund para sa rehabilitasyon ng mga apektadong lugar.

Tinatayang 1K pamilya o nasa 3K katao na ang apektado ng flashfloods at landslides sa 9 na Barangay sa Banaue, Ifugao.

Ayon kay Banaue Municipal Social Welfare and Development Office Chief Aguinaya Cabanayan, nasa 300 kabahayan din ang nawasak o napinsala, matapos ang malakas na ulan noong Huwebes.

Kabilang anya sa mga matinding naapektuhan ang mga Barangay Amganad, Bocos, Gohang at Poblacion.

Nawasak din ang ilang bahagi ng kilalang Banaue Rice Terraces sa Barangay Poitan at mga karatig barangay dahil sa landslides.

Samantala, nagpapatuloy ang pagtulong ng Department of Social Welfare and Development sa mga apektadong pamilya.

Prayoridad ng Pilipinas at Estados Unidos ang pagpapatuloy ng pagtutulungan at kooperasyon sa pagtataguyod ng matibay na supply chains at pagtugon sa climate crisis at paglipat sa paggamit ng clean energy.

Kabilang ito sa mga napagkasunduan nina Foreign Affairs Secretary Enrique Manalo at kanyang counterpart na si US Secretary of State Antony Blinken matapos ang kanilang pulong noong Sabado.

Nagpasalamat naman si Manalo sa commitment ng US sa Pilipinas sa pagsusulong ng kapayapaan, kasaganaan at International Law-based Order sa Indo-Pacific Region.

Binigyang-diin din ng dalawang kalihim ang commitment ng Pilipinas at US sa strategic ties at economic interests ng dalawang bansa.

Hinimok ng Department of Health ang publiko na mag-donate ng dugo para makatulong na makapagligtas ng buhay.

Ito ang inihayag ni Health Undersecretary Maria Rosario Vergeire kasabay ng selebrasyon ng “National Blood Donors Month.”

Ayon kay Vergeire, mas maraming benepisyo kaysa peligro ang hatid ng blood donation, tulad ng pagpapababa sa posibilidad ng heart attack, cancer at pagkakaroon ng mas maayos na mental state.

Hinikayat din ng Health official ang publiko na bisitahin ang Official Facebook page ng DOH-National Voluntary Blood Services Program upang magkaroon ng impormasyon hinggil sa naturang inisyatibo.

Tiniyak ng Department of the Interior and Local Government ang pagtutok sa pagpigil sa mga “future buyers” ng illegal drugs sa pagpapatuloy ng giyera kontra droga.

Inihayag ni DILG Secretary Benhur Abalos na ang special focus ay para sa kabataan na anya ay paboritong puntiryahin ng illegal drugs syndicates.

Kailangan anyang ibahagi ang mensahe at kahalagahan ng buhay at kung paano ang buhay ay magiging maganda na hindi gumagamit ng iligal na droga at hindi nadadawit sa mga iligal na aktibidad.

Idinagdag ng kalihim na ipa-proyoridad ng Kagawaran ang pagkakaroon ng airtight cases sa illegal drugs upang matiyak ang “conviction” ng mga guilty parties.

Inirekomenda na ng PNP – Highway Patrol Group ang pag-regulate sa pagbebenta ng emergency vehicle sirens o “wang-wang” at blinkers upang maiwasan ang pag-abuso.

Ayon kay PNP-HPG Director, Brig. Gen. Francisco Marbil, ipinagbabawal lamang sa batas ang paglalagay ng sirena at blinker sa mga hindi otorisadong sasakyan pero hindi ang pagbebenta ng mga ito.

Umaasa anya sila na magiging bahagi ang kanilang hiling sa Legislative Agenda ng 19^th Congress upang magkaroon ng kapangyarihan ang law enforcement agencies na kontrolin ang paggamit ng mga blinker at wangwang.

Nilinaw naman ni Marbil na hindi sa law enforcement ang issue bagkus ay mismong sa batas nag u-ugat ang problema sa pag-regulate sa emergency devices.

Alinsunod sa Presidential Decree 96 ni dating Pangulong Ferdinand Marcos Sr., hindi pinapayagan ang mga motorista na gumamit ng emergency devices, kabilang ang blinkers at dome lights.

Pinapayagan lamang ang mga ito sa ambulansya, fire trucks at para sa mga tauhan ng PNP, Militar, National Bureau of Investigation at Land Transportation Franchising and Regulatory Board.