Drew Nacino

Binalaan ni Land Transportation Office officer-in-charge at concurrent Executive Director, Atty. Romeo vera cruz ang mga fixer na patuloy na nag-ooperate sa ahensya na ipakukulong ang mga ito.

Banta ito ni Vera Cruz matapos mahuli kamakailan ang isang grupo ng online fixers, na nag-aalok ng non-appearance renewal ng rehistro ng sasakyan sa pamamagitan ng online payment at meet-up.

Tinututukan na anya ng LTO-Investigation and Intelligence Division na pinamunuan ni dating DOTr Director for Investigation Service Renante Melitante at Quezon City-Diliman Anti-Cybercrime Team sa pangunguna ni Michael Bernardo ang kampanya laban sa LTO fixers.

Nasa kustodiya naman ng QC-DACT ang mga suspek na nakatakdang isailalim sa inquest proceedings sa Quezon City Prosecutor’s Office.

Nabunyag ang modus ng grupo nang makipag-transaksiyon ang miyembro ng LTO-QC-DACT joint task force sa mga suspek para sa non-appearance renewal ng sasakyan sa pamamagitan ng Messenger app.

Pinayuhan naman ni Vera Cruz ang mga kliyente ng LTO na diretsong magtungo sa kanilang tanggapan at hindi sa kaduda-dudang social media accounts at indibidwal para sa kanilang proteksiyon.

Naitala sa Central Visayas ang pinaka-maraming COVID-19 cases sa nakalipas na linggo.

Batay sa Bulletin ng Department of Health, aabot na sa 46 ang mga pasyenteng kritikal habang 14 na ang namatay.

Kabilang ang mga ito sa 379 additional cases mula July 3 hanggang 9.

Gayunman, nananatiling mababa ang ICU bed capacity kung saan 13 mula sa 118 lamang ang okupado habang ang nalalabi ay pawang nasa Non-ICU COVID-19 wards.

Dahil sa bahagyang pagtaas ng mga kaso, nagpatupad na ang mga Lokal na Pamahalaan ng ilang polisiya gaya sa Cebu City, kung saan pinaigting na ang implementasyon ng “Toktok Bakuna” o pagbabahay-bahay para bakunahan ang mga unvaccinated.

Sa lalawigan ng Bohol, kinansela na ang Sandugo Festival Street Dancing Competition dahil sa pagtaas ng mga bagong COVID-19 cases.

Umabot sa 10, 271 ang COVID-19 cases ang naitala ng Department of Health sa bansa simula Hulyo a-4 hanggang a – 10.

Batay sa datos ng DOH, nasa 1,467 na ang daily average cases ngayong linggo o mataas ng 39% kumpara noong Hunyo a – 27 hanggang Hulyo a – 3.

Kahapon naman ay nakapagtala ang kagawaran ng karagdagang 1,660 COVID-19 cases dahilan upang sumampa na sa 14,218 ang aktibong kaso.

Ito na sa ngayon ang pinaka-mataas na tally simula noong April 2022.

Umakyat na rin sa 3, 720, 054 ang total case load, kabilang ang 3, 645, 196 recoveries 60, 640 na death toll.

Nangunguna pa rin ang National Capital Region sa mga rehiyong may pinaka-maraming cases sa nakalipas na dalawang linggo na 7,920; CALABARZON, 3,573; Western Visayas, 1,511; Central Luzon, 1,435 at Central Visayas, 711.

Kasalukuyang nakararanas na ang bansa ng “weak surge” ng mga Covid-19 cases.

Ito ang inamin ng Infectious disease expert at vaccine expert panel member na si Dr. Rontgene Solante batay sa projection ng OCTA Research Group.

Pangunahing tinututukan ang National Capital Region kung saan tumaas ng 10% ang positivity rate habang marami nang lugar sa bansa ang lagpas na sa 5% treshold na itinatakda ng World Health Organization.

Inaasahang magpapatuloy ang pagtaas ng mga kaso hanggang sa susunod na tatlo hanggang apat na linggo na dulot ng mga Omicron variant.

Unang inihayag ni Health Undersecretary Maria Rosario Vergeire na ang pagtaas muli ng mga kaso ay dahil sa subvariants, mas maluwag na galaw ng mga tao at bumababang bisa ng mga bakuna sa mga taong hindi pa nagpapa-booster shot.

Kawalan umano ng drainage system ang sanhi ng flashfloods at mudslides sa Banaue, Ifugao dahil sa mga nakatayong bahay.

Ayon kay Bontoc-Lagawe Bishop Valentin Dimoc, naharangan na ng mga bahay ang dapat na daluyan ng tubig kaya noong umulan dulot ng habagat ay sa mga kalsada na dumaan ang naipong tubig.

Wala anyang sapat na daluyan kaya’t umagos ang tubig at putik mula sa bundok.

Ipinanawagan naman ni Dimoc sa mga otoridad na maglagay ng drainage system nang sa gayo’y maging maayos ang pagdaloy ng tubig mula sa bundok patungo sa ilog.

Hinimok din ng Obispo ang mga residente na iwasan nang magtayo ng mga istruktura tulad ng mga bahay sa mga mapanganib na lugar upang maiwasan ang pinsala sa kalikasan.

Pinag-aaralan na ng Department of Transportation ang posibilidad nang pagtatalaga ng karagdagang ruta para sa inaasahang pagbabalik ng full face-to-face classes sa Setyembre.

Ayon kay Transportation secretary Jaime Bautista, tinitingnan na nila ang fleet rationalization para magamit ang mga ruta at makakuha ng mas maraming load factor kada biyahe.

Napag-usapan din anya na dapat ituloy ang rationalization at kailangan ng mga tamang impormasyon kung ano ang mga availability ng mga sasakyan na gagamitin at mga maaaring gawin.

Una nang inihayag ng DOTr na karamihan sa mga ruta lalo sa Metro Manila ay masyadong mahaba o overlapping na nagreresulta sa hindi maayos na mga biyahe at nangangailangan ng pag-optimize ng ruta.

Idinagdag ng kalihim na kasalukuyang pino-proseso ng isang grupo ang pagkumpleto ng isang pag-aaral sa fleet rationalization bago ang pagbabalik ng face-to-face classes.

Bumuo na rin ng Ad Hoc Committee na pinamumunuan ng Undersecreatary for Roads kasama ang mga miyembro kabilang ang mga kinatawan mula sa Department of Education, Commission on Higher Education, Metropolitan Manila Development Authority at iba pang ahensya.

Tatlong sibilyan ang sugatan sa mga pagsabog na sinundan ng sunog sa ammunition depot ng Philippine Army sa Cagayan De Oro City.

Dakong 12 kaninang hatinggabi nang yumanig ang mga pagsabog sa Magazine 5 sa loob ng Ammo Complex ng Army sa Camp Edilberto Evangelista, Barangay Patag.

Ang nasabing lugar ay kampo ng 4^th infantry division ng Hukbong Katihan.

Ayon kay Philippine Army – Division Public Affairs Office Chief, maj. Francesco garello, pawang mga mortar at small arms ammunition ang nasa Magazine 5 na main repository ng Army.

Inaalam na anya ng Armed Forces of the Philippines ang sanhi ng pagsabog.

Naniniwala si dating Agriculture Secretary Manny Piñol na hindi pa kailangang magdeklara ni Pangulong Bongbong Marcos ng State of Calamity o Emergency sa gitna ng nagbabadyang Global Food Crisis.

Tugon ito ni Piñol, Food Security Adviser ni National Security Adviser Clarita Carlos sa hirit ng Philippine Chamber of Agriculture and Food Incorporated kay PBBM na magdeklara ng Nationwide State of Calamity.

Ayon sa dating Kalihim, nasa Pangulo ang lahat ng kapangyarihan at marami pa namang pwedeng paraang maaaring ilatag upang tugunan ang nagbabadyang problema.

Samantala, malaking tulong din anya sa produksyon at pagpapataas ng supply ang food terminal incorporated.

Hindi na dapat maudlot pa ang pagbabalik sa 100% ng in-person face-to-face classes ng mga estudyante sa gitna ng COVID-19 pandemic.

Ito ang reaksyon ni National Parent-Teacher Association Philippines (PTA) Secretary-General Elma Estrada-Caber sa panawagan ng Teacher’s Dignity Coalition na iurong ang pagbabalik ng klase.

Ayon kay Caber, magkakaroon lamang ng epekto sa pag-iisip at emosyon ng bata kung patatagalin pa ang pagbabalik nila sa mga paaralan.

Suportado pa rin ng National Parent-Teacher Association Philippines (PTA) ang pagpapatupad ng face-to-face classes sa susunod na pasukan, kahit patuloy ang pagtaas ng mga kaso ng Covid-19 sa bansa.

Inihayag ni PTA President Willy Rodriguez na batay sa resulta ng isinagawa nilang Online survey, 100% ng mga respondent ang nais nang ibalik ang face-to-face classes sa pribado at pampublikong paaralan.

Halos wala na rin anyang natututunan ang mga estudyante sa Online classes at apektado ang kanilang social life dahil hindi sila nakalalabas ng bahay.

Ipinunto pa ni Rodriguez na marami na rin namang mag-aaral ang bakunado na laban sa Covid-19.

Sa ngayon, hindi pa requirement ang Covid-19 vaccination sa mga estudyante para makadalo sa face-to-face classes, pero mandatory ito sa mga school personnel para makapagturo ng in-person classes sa public schools.

Samantala, iminungkahi ni Rodriguez na kung matutuloy ang face-to-face classes ay ihiwalay na lamang ang mga unvaccinated, sa mga bakunadong mag-aaral habang ang mga hindi bakunadong teacher ay maaaring magturo sa hybrid setup.