Drew Nacino

Posibleng maabot ang panibagong “rurok” o peak ng arawang kaso ng COVID-19 sa bansa o sumampa sa 11k hanggang 17k kada araw sa katapusan ng buwan.

Ito’y kung patuloy na bababa ang bilang ng sumusunod sa health protocols, mananatili ang lebel ng mobility at mababang bilang ng nagpapa-booster kasabay ng tumataas ding kaso ng Dengue.

Ayon kay Health Undersecretary Maria Rosario Vergeire, batay sa kanilang projections ay pinaka-mababa na ang 1,800 cases per day at maaaring maramdaman ang peak sa ikatlong linggo ng Hulyo.

Gayunman, wala pa naman itong katiyakan at maaari pang magbago depende sa pagtalima ng publiko sa minimum public health standard at pagpapanatili ng kasalukuyang mobility patterns.

Mahalaga anyang mapataas muli ang immunity ng publiko laban sa nakamamatay na virus, lalo’t bumababa ang bisa ng mga itinuturok na bakuna habang tumatagal.

Muling nalubog sa baha, dulot ng pag-ulang dala ng Low Pressure Area na pinalala ng habagat, ang ilang mababang lugar sa Pampanga.

Kabilang sa mga binaha ang Bayan ng Masantol, gaya sa Bagang Elementary School, ilang araw bago ang muling pagbubukas ng klase.

Ayon kay Masantol Mayor Jose Antonio Bustos, hindi lang naman ulan ang sanhi ng pagbaha sa kanilang lugar dahil sadyang mababa ang lokasyon nito bukod pa sa napapalibutan ng ilog at dagat.

Naka-apekto rin anya ang high tide na paiba-iba ang lebel ngayong buwan habang inaasahang mararanasan bukas hanggang sabado ang pinaka-mataas na lebel nito na lalampas ng limang talampakan.

Inabisuhan naman ni Bustos ang mga residente na itaas na ang kanilang kagamitan sa bahay at lumikas ang mga naninirahan sa tabing-ilog.

Bukod sa Masantol, pawang nasa mababang lokasyon din ang mga karatig Bayan ng Macabebe, Sasmuan, Minalin at Apalit.

Hindi pa kailangang ibalik ang mas mahigpit na border restrictions sa Pilipinas matapos madiskubre ang mga bagong sub-variant ng Omicron sa ibang bansa.

Nilinaw ni Health Undersecretary at spokesperson Maria Rosario Vergeire na bagaman hindi pa naman nila inirerekomendang maghigpit muli, mananatili silang mapagmatyag.

Ayon kay Vergeire, nakatutok din sila sa sitwasyon at handa ang healthcare system ng bansa, partikular ang mga ospital sakaling magtuloy-tuloy ang pagtaas ng mga bagong kaso ng COVID-19.

Kailangan anyang matiyak na nananatili sa minimum level ang bilang ng severe at critical patients at hindi pa dapat mangamba sa ngayon ang publiko dahil epektibo pa naman ang mga bakuna bilang proteksyon.

Kamakailan ay nadiskubre ang Omicron BA.2.75 (Centaurus), na posibleng mas nakahahawa sa India, US at iba pang bansa habang natukoy din ng World Health Organization sa Shanghai ang Omicron subvariant BA.5.2.1.

Nalaglag sa 4th place sa matatapos ng 2022 FIBA Asia Cup 3×3 ang Gilas Pilipinas 3×3 na ginanap sa Singapore nitong linggo.

Natalo ang Pilipinas sa China, 20-18, sa labanan para sa ikatlong puwesto ng torneo.

Ayon sa ulat, ito na ang ikalawang paghaharap ng pilipinas at china sa torneo, kasunod ng kanilang laban sa pool game noong Sabado.

Nauna rito, natibag din ang Gilas Pilipinas sa New Zealand, 21-13, sa semis.

Sa Torneo, naitala ng Gilas ang kabuuang apat na panalo at tatlong talo.

Maghaharap ang New Zealand at Australia sa finals.

Ang Gilas Pilipinas ay binubuo nina Almond Vosotros, Samboy de Leon, Lervin Flores, at Joseph Eriobu.

Naihatid na sa kanyang huling hantungan ang abo ni Atty. John Albert Laylo sa National Shrine of the Sacred Heart sa Makati City, kahapon.

Isang misa at Celebration of Life o paggunita sa naging buhay ni Laylo ang idinaos sa New Life-Alabang simula alas 10 ng umaga hanggang alas-4 ng hapon.

Hiniling naman ng pamilya Laylo, lalo ng ina ni Attorney John na si Leah ang agarang pagkamit ng katarungan para sa pagkamatay ng kanyang anak.

Hunyo a – 18 nang pagbabarilin ng hindi pa nakikilalang salarin sina laylo at leah habang sakay ng kotse sa Philadelphia, USA.

Kumikilos na ang mga kaibigang abogado ni Laylo sa Pilipinas upang tumulong sa pagkamit ng agarang hustisya.

Nagbalikan na sa kani-kanilang bahay ang mga residenteng naapektuhan ng flashfloods at mudslides sa Banaue, Ifugao.

Naging abala ang mga residente sa paglilinis sa kanilang mga bahay na nabalot ng putik.

Mahigit 1k pamilya o nasa 3k katao ang apektado sa mga Barangay Amganad, Bocos, Gohang, Poblacion, Puwitan, San Fernando, Yuhaj, Tam-An at View point.

Inihayag naman ni Banaue Mayor Joel Bungallon na nagpapatuloy ang relief operations at inaasahang maibabalik na rin power at water supply.

Kasalukuyang nasa State of Calamity ang nasabing bayan dahil sa epekto ng flashfloods at landslides dulot ng malakas na ulan dala ng Habagat.

Sumampa na sa P20.17 million ang halaga ng pinsala sa agrikultura ng flashfloods at mudslides na dulot ng malakas na ulang dala ng habagat sa Lalawigan ng Ifugao.

Ayon sa Department of Agriculture, aabot na sa 928 metric tons ang total volume loss ng nasa 800 magsasaka at 356 na ektaryang tanim na ang apektado.

Pinaka-napuruhan ang mga high-value crop at iba’t ibang uri ng gulay na aabot sa 489 metric tons habang pangalawa ang mga palayan na 439 metric tons.

Kabuuang 83 livestock heads ang nangamatay, partikular ang mga baboy.

Muli namang tiniyak ng DA ang ayuda sa mga apektadong magsasaka.

Tiniyak ng SM Supermalls sa publiko na tinatanggap pa rin sa kanilang mga SM Retail Store branches ang mga nakatuping bagong 1,000 peso polymer bill.

Ito ang tugon ng SM sa viral social media post ng isang netizen na inireklamo ang hindi pagtanggap ng SM sa kanyang bagong pero nakatuping P1-K.

Ayon sa pamunuan ng mall, tanging ang mga mutilated o gula-gulanit at may punit dahil sa pagkakatanggal sa staple wire ang hindi nila tinatanggap.

Ang nasabi anilang polisiya ay alinsunod sa guidelines ng Bangko Sentral ng Pilipinas.

Hinimok naman ng sm ang publiko na iwasang maniwala sa mga misleading social media posts.

Viral sa social media ang post ng isang netizen hinggil sa bagong 1,000 peso polymer note makaraang hindi ito tanggapin sa isang mall.

Dismayado ang Facebook user na si Reylen Lopez nang hindi tanggapin sa SM ang naturang pera dahil nakatupi o tiklop umano ito.

Nagpunta si Lopez sa isang branch ng SM retail store  mag-a-ala- 7 ng gabi noong Biyernes, Hulyo a – 8 para magbayad.

Gayunman, sinabi anya ng teller na alinsunod sa policy ng mall ay hindi sila tumatanggap ng nakatuping 1,000 peso polymer bill.

Iginiit ng netizen na hindi naman sobra ang pagkakatupi sa pera dahil nakalagay ito sa kanyang folding wallet.

Inabisuhan na ng Bangko Sentral Ng Pilipinas (BSP) ang mga tindahan at bangko na dapat tanggapin ang mga nakatuping pera, papel man ito o polymer.

Ito ang nilinaw ng BSP matapos lumabas ang ulat na isang mall umano ang hindi tumanggap ng ibinayad na 1,000 peso polymer bill dahil itinupi ito.

Ipinaalala ng BSP sa publiko na kahit nakatupi na ay maaari pa namang gamitin ang mga paper at polymer bills basta’t hindi gula-gulanit tulad ng pagkakaroon ng punit.

Magugunitang nag-viral sa social media ang post ng isang netizen na hindi umano tinanggap ng sm ang kanyang bagong 1,000 peso polymer banknote dahil nakatiklop na ito.

Naglabas naman ng pahayag ang SM at nilinaw na tatanggapin nila ang polymer bills basta hindi “mutilated” gaya ng pagkakaroon ng punit dahil sa pag-alis ng staple wire.

Noong isang linggo ay naglabas ng panuntunan ang BSP sa tamang pag-iingat sa bagong P1-K papel at kabilang dito ang paglalagay nito sa wallet na tama ang laki para ito magkasya at panatilihing malinis.