Drew Nacino

Isang babaeng edad pito ang hinalay at pinatay umano ng dalawang kapwa menor de edad sa San Pedro City, Laguna.

Kinilala ni Col. Cecilio Ison Junior, Acting Director ng Laguna Provincial Police Office ang biktimang si alyas ‘Ava’ at mga suspek na sina alyas ‘Totoy’ at ‘Brocoli’.

Alas-10 ng gabi noong Miyerkules, Hulyo a – 6 nang maganap umano ang krimen sa isang abandonadong bahay sa Purok 6, Barangay Landayan.

Batay sa imbestigasyon, umiinom ng alak si alyas ‘Brocoli’ nang dumating si ‘Totoy’ kasama ang biktimang si ‘Ava’ na nakatali ng tela ang bibig.

Kapwa kinarga ng dalawang suspek ang biktima patungo sa ikalawang palapag ng bahay tsaka ginahasa at sinakal na naging sanhi ng kanyang kamatayan.

Nang mahuli si ‘Broccoli’ ng mga Barangay tanod dahil sa isang ninakaw na cellphone, umamin ito sa panghahalay sa biktima na natagpuan sa loob ng bakanteng bahay, habang si ‘Totoy’ ang sumakal sa paslit.

Dinala ang bangkay ng biktima sa Miraculous Funeral Parlor para i-autopsy habang hawak na ng City Social Welfare Development ang dalawang menor de edad na suspek.

Pursigido ang pamunuan ng Land Transportation Franchising and Regulatory Board (LTFRB) na resolbahin ang mga problemang bumabalot sa EDSA Bus carousel.

Tiniyak ito ni LTFRB chairperson, Atty. Cheloy Garafil matapos siyang sumakay sa Edsa Carousel mula Monumento, Caloocan City hanggang PITX, Parañaque City, kahapon.

Dakong ala-7 ng umaga nang sumakay ng bus sina Garafil kasama ang ilan pang opisyal ng ahensya upang maranasan ang araw-araw na pinagdaraanan ng mga commuter, lalo kapag rush hour.

Ayon kay Garafil, natuklasan nila ang ilang issue sa pagsakay sa bus carousel kaya’t gusto nilang ayusin ang mga ito upang maging seamless ang biyahe at makita ang viability ng ruta.

Kasalukuyan na rin anya silang bumubuo ng road rationalization plan, sa gitna na rin ng pagbabalik ng in-person classes.

Samantala, nakikipag-usap na ang LTFRB sa iba’t ibang transport groups upang matugunan ang kanilang mga concern sabay pagtiyak na laging bukas ang tanggapan ng ahensya sa anumang reklamo o suhestyon ng mga nasa sektor ng transportasyon.

Suportado ni Pangulong Bongbong Marcos ang mga panukalang tingnan ang education curriculum ng bansa upang magbigay sa mga estudyante ng skills na kailangan sa iba’t ibang industriya at tugunan ang job mismatch.

Ayon kay Press Secretary Trixie Cruz-Angeles, ang mga issue sa worker skills, competencies at paraan ng Pilipinas na mag-produce ng mga graduate ay kabilang sa mga tinalakay sa weekly cabinet meeting, kahapon.

Isa anya sa mga naging rekomendasyon ay magkaroon ng reporma sa kasalukuyang curriculum lalo’t naging banta sa maraming trabaho ang automation.

Ipinag-utos ni Pangulong Marcos sa kanyang gabinete na dapat magkaroon ng improvement sa basic education skills at knowledge upang maihanda ang mga estudyante sa mas mataas na lebel ng pag-aaral.

Sa panig naman ni Trade Secretary Alfredo Pascual, binigyang-diin nito ang kahalagahan ng pag-review sa basic at tertiary education ng bansa.

Dapat anyang magkaroon ng basic skills ang mga mag-aaral kaya’t puspusan na ang Department of Trade and Industry sa pagtulong sa mga pamantasan na bumuo ng Micro-Credentialing Systems upang makasabay sa mabilis na technological advancements.

Bukod dito, inirekomenda rin ng Kalihim ang pagpapadala ng mga Filipino teacher sa ibayong dagat para sa training.

Sa pagtugon naman sa job mismatch ay makikipag-ugnayan ang DTI sa Department of Education, Commission on Higher Education at TESDA para sa skills development, re-skilling at upskilling ng workforce sa pamamagitan ng Philippine Skills Framework.

Nanganganib na tumaas muli ang presyo ng kada piraso ng itlog sa mga susunod na linggo.

Ito ang ibinabala ng Agricultural Sector Alliance of the Philippines Incorporated (AGAP) at Pork Producers Federation of the Philippines Incorporated (PPFPI) dahil sa taas ng production cost at mga kaso ng Bird flu.

Ayon kay dating AGAP partylist Rep. Nicanor Briones, Vice President ng PPFPI, dapat mapigilan ang pagkalat ng bird flu sa lalong madaling panahon, partikular sa mga lugar na pangunahing supplier ng manok.

Kulang na anya ang supply ng manok, tinatamaan pa ng bird flu ang mga manukan kaya’t magkakaroon ito ng malaking epekto sa demand.

Kahit nagpatupad na ng Oil price rollback sa nakalipas na dalawang linggo, mananatili pa ang hirit ng mga transport group na dagdagan ang singil sa pasahe.

Nilinaw ni Pasang Masda President Obet Martin na bagaman mas mababa ang natapyas sa presyo ng produktong petrolyo, malaki pa rin ang iminahal nito nang magsimula ang taon.

Ayon kay Martin, kung tutuusin ay hindi pa rin sapat ang tapyas presyo sa diesel.

Simula Enero ay nasa P36.80 centavos na kada litro ang itinaas ng diesel habang nasa P24.30 centavos ang nadagdag sa gasolina.

Umaasa naman ang grupo ng mga jeepney driver na pagbibigyan ang kanilang hiling na dagdag P3 sa minimum fare.

Kasalukuyang P11 ang minimum na pasahe sa jeep habang nakatakdang dinggin ng Land Transportation Franchising and Regulatory Board ang apela ng mga transport group sa July 27.

Nanindigan din ang grupo ng mga bus na Samahan ng Transport Operators ng Pilipinas (STOP) na hindi nila i-aatras ang kanilang petisyon lalo’t noon pang 2011 huling nagkaroon ng pisong provisional increase.

Iginiit ni STOP spokesperson Juliet De Jesus na ilang beses na silang nagsumite ng petisyon pero hindi naman nareresolba.

Kahapon sana diringgin ang apela ng mga bus operator sa LTFRB subalit pa nabubuo ang mga board member ng ahensiya kaya’t ipagpapaliban muna ito.

Hinimok ng Local Government ng Baguio ang mga barangay official sa lungsod na agarang i-ulat ang anumang maaaring magdulot ng peligro sa mga residente at ari-arian, lalo tuwing may bagyo o malakas na ulan.

Inihayag ni City Information Officer Aileen Refuerzo na ang nasabing panawagan ng special services division ng tanggapan ni Mayor Benjamin Magalong ay bahagi ng flood management initiative ng lungsod.

Dapat anyang ipagbigay-alam ng mga barangay ang mga makikitang sala-salabat na kable ng kuryente, barado o umaapaw na kanal at mga patay o nagtumbahang puno na dulot ng malakas na ulan.

Hinikayat din ang mga residente na sumunod sa kautusan sa tamang pagtatapon ng basura lalo’t ang hindi wastong garbage disposal ay nagiging sanhi ng baradong mga kanal at ilog na nagdudulot ng pagbaha.

Samantala, batay sa datos ng NDRRMC ay aabot na sa P16.6 million ang halaga ng pinsalang idinulot ng pagbaha at landslides bunsod ng pag-ulang dala ng habagat sa sektor ng agrikultura sa Benguet.

Nananatiling pinaka-mainam na paraan ang diplomasya upang tugunan ang issue sa maritime dispute sa West Philippine Sea.

Ito ang inihayag ni Philippine Ambassador to US Jose Manuel Romualdez kasabay ng ika-anim na anibersaryo ng Arbitral Ruling na nagpatibay sa soberanya ng Pilipinas sa mga pinag-aagawang teritoryo sa Spratly Islands.

Gayunman, tiniyak ni Romualdez na sakaling tumindi ang panghaharass, partikular ng China ay handa naman ang Pilipinas na pigilin ito.

Dapat anyang suportahan ng lahat ng stakeholders ang nasabing desisyon ng Permanent Court of Arbitration at iwasan ang tensyon sa halip ay panatilihin ang kooperasyon.

Aminado naman si Romualdez na ang China at Maritime dispute sa West Philippine Sea ang pinaka-malaking hamon sa foreign policy ng Pilipinas sa panahon ni Pangulong Ferdinand “Bongbong” Marcos Jr.

Posibleng malapit na sa rurok o maaaring umabot na sa peak ang COVID-19 wave sa National Capital Region dahil sa pagbaba ng weekly growth rate.

Ayon kay OCTA Research Fellow, Dr. Guido david, bumaba na sa 32% noong Lunes mula sa 57% noong July 4 ang growth rate.

Indikasyon anya ito na bumabagal ang hawahan at may tsansang patungo na sa rurok o naabot na ang peak ng COVID-19 cases sa NCR.

Ipinunto ni David na asahang mas magiging malinaw ang trends sa susunod na linggo.

Naitala naman ang 10% positivity rate noong linggo, Hulyo a – 10.

Samantala, tumaas ang Healthcare Utilization Rate sa rehiyon sa 28% habang 20% ng Covid-19 ICU beds sa Metro Manila ang okupado.

Lumobo na sa P48.8 million ang halaga ng pinsala ng flashfloods at mudslides sa sektor ng agrikultura sa Ifugao, partikular sa Bayan ng Banaue.

Ayon sa Department of Agriculture, nasa 600 magsasaka ang apektado o katumbas ng 728 metric tons na volume loss.

Kabilang sa mga pinadapa ang mga palayan, maisan, high-value crops, gaya ng repolyo, kamatis at bell pepper.

Bukod sa mga gulayan, naapektuhan din ang mga babuyan at manukan sa Banaue.

Tiniyak naman ng DA na makatatanggap ng ayuda ang lahat ng magsasakang apektado

Huwebes nang makaranas ng malakas na ulang dulot ng habagat ang lalawigan na nagresulta sa pagbaha at pag-agos ng putik dahilan naman ng pagkasugat ng tatlo katao at paglikas ng nasa isanlibong pamilya.

Muling tiniyak sa publiko ng Department of Agriculture na nananatiling stable ang supply at presyo ng gulay sa kabila ng epekto ng flashfloods at mudslides sa ekta-ektaryang taniman sa Ifugao.

Ayon sa DA – Cordillera, sapat ang supply sa ngayon ng mga highland vegetable, tulad ng Repolyo, Letsugas, Broccoli at Cauliflower kaya’t wala pang dapat ipangamba ang publiko.

Sa datos ng Philippine Statistics Authority noong 2020, nasa 58K pamilya sa Ifugao, mga karatig lalawigan ng Benguet at Mountain Province ang umaasa sa pagtatanim ng gulay bilang hanapbuhay.

Halos 80% ng highland vegetable supplies ng bansa ay mula sa tatlong nabanggit na probinsya o nasa 130,538 metric tons ng Repolyo, Patatas, Kamatis, Kamote, Kamoteng Kahoy, Talong at Sibuyas ang produksyon noong 2020.

Gayunman, nangangamba si Adrian Albano, Administrator ng Ifugao Highland Farmers Forum, na maaaring makaranas ng shortage sa mga susunod na araw dahil sa limitadong produksyon.

Sa pagtaya ng DA – Cordillera, aabot na sa P48.8 million ang halaga ng pinsala ng flashfloods at mudslides sa sektor ng agrikultura sa Ifugao, partikular sa Bayan ng Banaue.

Katumbas ito ng 728 metric tons na volume loss ng tinatayang 600 magsasaka at mag-gugulay.