Drew Nacino

Isang bahagi ng kalsada sa bulubunduking barangay sa Talisay City, Cebu ang pansamantalang ipinasara makaraang makaranas ng landslide bunsod ng malakas na pag-ulan.

Kinumpirma ni Talisay City Traffic Operations and Development Authority Chief Joy Tumulak na sarado ang bahagi ng Cebu-Toledo-Tabunok Road sa Sitio Langoyon, Barangay Manipis.

Ayon kay Tumulak, magsasagawa ng clearing operations ang Department of Public Works and Highways sa nasabing lugar sakaling gumanda na ang panahon.

Inabisuhan naman ng opisyal ang mga motorista na dumaan na lamang sa mga alternatibong ruta.

Ang pag-ulang nararanasan sa lalawigan ng Cebu ay dulot ng habagat na pinaigting ng low pressure area.

Nalubog din sa baha ang bahagi ng Maharlika Highway sa bayan ng San Fernando, Camarines Sur.

Umabot hanggang Bukong-Bukong ang tubig sa mga barangay ng Bonifacio at Rizal, kaya’t nakadaan pa rin ang lahat ng sasakyan.

Ayon kay Lt. Anthony Bueza, Officer in Charge ng San Fernando Municipal Police, umulan nang malakas sa mga bulubunduking barangay kaya’t umapaw ang mga ilog at waterway na dumadaloy patungo sa mga mababang lugar.

Agad naman anyang humupa ang baha habang aniya pa, naka-standby para umalalay ang Municipal Disaster Risk Reduction and Management Office-San Fernando sa mga motorista sakaling muling bumaha sa highway.

Pansamantalang mawawalan ng supply ng tubig ang ilang bahagi ng Metro Manila dahil sa nasirang pipeline ng Maynilad.

Ayon kay Maynilad Spokesperson Jennifer Rufo, ang nasirang pipeline ay nasa Pureza, Maynila na kasalukuyang lubog sa tubig.

Aksidente anyang tinamaan ang tubo ng isang private contractor ng drainage project sa naturang lugar.

Asahan na ang water interruption simula alas onse ng umaga bukas hanggang alas onse ng umaga sa Sabado.

Kabilang sa mga maaapektuhan ang mga lungsod ng Maynila, Pasay, Paranaque at Las Piñas.

Idinagdag ni Rufo na hindi pa mabatid kung gaano katagal ang pagsasaayos sa nasirang tubo.

Binulaga ng baha ang maraming residenteng naninirahan sa mga mababang lugar, malapit sa ilog at baybayin sa Bulacan at ilang bahagi ng mga lungsod ng Caloocan at Maynila.

Ito’y makaraang bumuhos ang malakas na ulang dala ng habagat na pinaigting ng low pressure area at sinundan ng high tide.

Dakong alas-8 ng umaga kahapon nang tumaas ang tubig na halos 5 talampakan sa Malolos at Meycauayan Cities, mga mababang lugar sa mga bayan ng Obando, Marilao, Bocaue, Balagtas, Bulakan, Guiguinto, Malolos, Paombong, Hagonoy at Calumpit.

Binaha rin ang isang bahagi ng A. Mabini street sa Maypajo, Caloocan City hanggang sa kanto ng Hermosa at Juan Luna streets dahil sa bahagyang pag-apaw ng ilang bahagi ng estero de sunog apog dala ng high tide at malakas na pag-ulan.

Samantala, apektado rin ng high tide ang ilang bahagi ng Pampanga gaya sa mga bayan ng Masantol, Macabebe, sasmuan at Guagua.

Sa pagtaya ng Pagasa, posibleng abutin ng halos 5 talampakan ang taas ng tubig sa mga nasabing lugar, ngayong umaga.

Bukas ang gobyerno sakaling muling isulong sa Kongreso ang pagrepaso sa Visiting Forces Agreement (VFA) sa pagitan ng Pilipinas at Estados Unidos.

Ayon kay Philippine Ambassador to U.S Jose Manuel Romualdez, walang problema sa plano ng mga senador o mga Kongresista sa 19th Congress na mabusisi ang VFA.

Sa katunayan anya ay mayroon silang mekanismo kaugnay rito bukod pa sa pagsasagawa ng taunang review ng VFA.

Idinagdag pa ni Romualdez na mayroong mutual defense board na bumibusisi sa VFA, Mutual Defense Treaty at Enhanced Defense Cooperation Agreement (EDCA).

May mga pagbabago naman anyang nagawa at patuloy na pinalalakas ito kasabay ng bilateral strategic dialogue kada taon.

Muling nakapagtala ng mga pagyanig sa bulkang Bulusan sa Sorsogon.

Anim na volcanic earthquakes ang naitala ng Phivolcs sa Bulusan sa nakalipas ng 24 oras.

Bahagya ring nagbuga ang bulkan ng usok na may taas na hanggang 100 meters at naglabas ng 574 tons ng sulfur dioxide.

Muling pina-alalahanan ng Phivolcs ang publiko na iwasan ang pagpasok sa 4-kilometer radius permanent danger zone maging sa extended danger zone.

Ipinagbabawal din muna ang pagpapalipad ng aircraft malapit sa bulkan dahil sa posibilidad nang biglaang steam-driven o phreatic eruptions.

Mahalagang magkaroon ng guidelines sa sandaling muling payagang magamit ang Dengvaxia vaccine.

Ito ang inihayag ni Infectious Disease Expert at Vaccine Panel Member Dr. Rontgene Solante, sa harap ng pagtaas ng kaso ng dengue sa bansa.

Ayon kay Solante, sa pamamagitan ng guidelines ay mailalahad sa publiko ang benepisyo at kahalagahan ng bakuna, lalo para sa mga indibiduwal na nasa kategoryang high risk na tamaan ng sakit at high-risk na madala sa pagamutan.

Bukod dito, mailalahad din anya ng guidelines ang kahalagahan sa pagsugpo sa dengue virus infection.

Magugunitang sinabi ni Solante na panahon nang muling irekonsidera ng gobyerno ang pagpapatuloy at paggamit ng Dengvaxia, lalo’t ginagamit na rin naman ito sa ibang mga bansa gaya sa Singapore, Malaysia, Thailand at Indonesia.

Hindi pa tuluyang nagwawakas ang COVID-19 pandemic.

Ito ang ibinabala ni World Health Organization chief Tedros Ghebreyesus sa gitna ng panibagong wave ng infections dala ng sub-variants ng Omicron.

Nangangamba si Ghebreyesus na dahil sa patuloy na pagtaas muli ng mga kaso habang bumibigat ang trabaho ng health systems at workers.

Kasabay anya ng pagtaas muli ng COVID-19 transmission at hospitalization, dapat mag-deploy ang mga pamahalaan ng mga “tried and tested measures” tulad ng pagsusuot ng face mask, pagsasaayos ng ventilation at test and treat protocols.

Sa pagtaya ng WHO, tumaas ng 30% ang COVID-19 cases sa nakalipas na dalawang linggo dahil sa mga Omicron sub-variants BA.4, BA.5 at pagtanggal ng public health at social measures.

Nagbanta ang ilang Russian politicians na kaalyado ni President Vladimir Putin na babawiin ang Alaska mula sa U.S.

Ito’y kung patuloy na magpapataw ng sanctions ang western countries, sa pangunguna ng Amerika at European union sa Russia bilang parusa sa pag-atake sa Ukraine.

Ipina-alala ni Vyacheslav Volodin, speaker ng State Duma na anumang hakbang ng Estados Unidos ay may tugon ang Russia.

Ang Alaska ay dating bahagi ng Russia at ibinenta sa U.S. noong 1867.

Sa kauna-unahang pagkakataon, nabigo ang Philippine Women’s National Football Team sa 2022 AFF Women’s Championship, sa kamay ng Thailand.

Hindi naka-porma ang Malditas sa Thailand sa score na 1-0 sa kanilang paghaharap sa semi-finals sa Rizal Memorial Stadium,  sa Maynila, kagabi.

Nag-ambag ng panalo para sa Thai Team si Kanyanat Chetthabutr.

Tinangkang tumabla ng Malditas subalit kinapos sila ng oras.

Sunod na makakaharap ng Pilipinas ang mananalo sa sagupaan ng Vietnam at Myanmar, mamaya.