Drew Nacino

Nanindigan ang China na hindi nito kikilalanin ang July 12, 2016 ruling ng Permanent Court of Arbitration na pumapabor sa territorial claims ng Pilipinas sa West Philippine Sea.

Tinawag ni Chinese Foreign Ministry Spokesman Wang Wenbin ang nasabing pasya o award na iligal at hindi magtatagumpay.

Nagbanta rin si Wang sa sinumang magtatangkang tumalima o ipatupad ang ruling ng International Arbitral Court na tiyak na may kaakibat na tugon dito ang Tsina.

Nito lamang Martes ay inihayag ni Foreign Affairs Secretary Enrique Manalo sa ika-anim na anibersaryo ng ruling na final at indisputable na ang South China Sea Arbitration.

2 traffic enforcer sa Cardona, Rizal ang patay habang isa pa ang sugatan matapos pagbabarilin ng riding-in-tandem na kanilang sinita dahil walang plaka.

Kinilala ng Police Regional Office 4-A ang mga napatay na biktimang sina gil tancingco at Marcial Julian at sugatang si Kevin Jerome Cruz.

Dakong alas-4 ng madaling araw kahapon nang sitahin ng tatlong traffic enforcer ang dalawang lalaking sakay ng motorsiklo sa national road sa Barangay Real.

Bumaba ang angkas ng motorsiklo at pinaputukan ang tatlong biktima.

Dead on the spot sina Tancingco at Julian habang naisugod pa si Cruz sa Morong Provincial Hospital.

Patuloy naman ang imbestigasyon ng pulisya.

Nalunod ang isang 9 na buwang-gulang na sanggol makaraang anurin ng baha sa bayan ng Macabebe, Pampanga.

Dakong alas nwebe ng umaga kahapon nang tangayin ng tubig dulot ng high tide ang sanggol habang natutulog sa kama kasama ang ama nito sa kanilang bahay sa Purok Bukangliwayway, Barangay Candelaria.

Ayon sa Macabebe Municipal Disaster Risk Reduction and Management Office, hindi namalayan ng ama na nahulog na pala ang bata mula sa kama habang tumataas ang tubig sa bahay.

Wala naman ang ina ng sanggol na noo’y pumunta sa munisipyo upang kumuha ng ayuda.

Isinugod pa sa ospital ang bata pero idineklarang dead on arrival ng mga doktor.

Umapela ng pang-unawa ang Philippine Postal Corporation sa publiko hinggil sa pagkakaroon ng delay sa delivery ng mga national id.

Ipinaliwanag ni Norman Fulgencio, Postmaster General at CEO ng Philippine Post Office na nagkaroon ng delay sa pagpapadala ang ahensiya dahil sa Covid-19 pandemic.

Nasa 94% na anya ng mga national id na ang kanilang nai-deliver o katumbas ng 14.8 million.

Iginiit naman ni Fulgencio na hindi sila dapat sisihin sa delay lalo’t nagkaroon ng pandemya.

Nais ni Pangulong Ferdinand “Bongbong” Marcos, Jr. na dagdagan ang bilang ng mga pulis sa iba’t-ibang tourist destination sa bansa.

Ayon kay Pangulong Marcos, makabubuting magkaroon ng maraming pulis sa mga beach upang may matakbuhan agad ang mga turista sakaling kailanganin ang serbisyo ng mga nasabing law enforcer.

Bukod dito, nais din ng punong ehekutibo na magkaroon ng health facilities ang mga tinaguriang big tourist destinations, gaya sa isla ng Boracay.

Ang ganito anyang klase ng arrangement ay ipinatutupad din sa mga beach sa Hawaii at Thailand.

Kabilang ang turismo sa mga pangunahing sektor sa bansa at isa rin sa mga may pinaka-malaking ambag sa ekonomiya.

Walang nakikitang problema si Vice President at Education Secretary Sara Duterte-Carpio kung magsama ang mga bakunado at hindi bakunadong estudyante sa loob ng silid-aralan.

Ito’y sa gitna ng desisyon ng DepEd na itakda sa Agosto a – 22 ang pagbabalik ng face-to-face classes at full face to face classes sa Nobyembre sa kabila ng pagdami muli ng Covid-19 cases.

Ayon kay VP Inday, nagsasama rin naman ang mga estudyante sa labas ng paaralan at naghahalo rin ang mga vaccinated at unvaccinated, tulad na lamang sa mga mall.

Kaugnay naman sa iba pang ilalatag na hakbang sa pagbabalik ng face to face classes, inihayag ni duterte na nagpapatuloy pa ang pulong ng DepEd hinggil dito.

Iniimbestigahan na ng Manila Police District ang ilang lady security guard matapos mahulog mula sa ika-apat na palapag ng Mabini Hall ng Malacañang compound ang administrative aide ng palasyo na si Mario Castro.

Pawang nakatalaga ang mga guwardya sa nasabing palapag ng gusali nang maganap ang insidente, kahapon.

Ayon kay Lt. Adonis Aguila, hepe ng MPD – Homicide Section, dakong umaga nang nakarinig ng kalabog ang ilang sekyu na nasa ilalim ng Agilex Security Agency.

Inaalam na anya kung nagkaroon ng foul play habang isinailalim sa otopsiya ang bangkay ni Castro.

Ang biktima ay nakatalaga sa Information Communications Technology Office sa ilalim ng Deputy Executive Secretary for Finance and Accounting.

Tiniyak naman ni Press Secretary Trixie Cruz-Angeles na nakikipag-ugnayan na ang presidential security group sa Philippine National Security Force Unit para sa imbestigasyon.

Gagawin din anya nila ang lahat ng kanilang makakaya upang matulungan ang pamilya ni Castro.

Nahaharap sa patung-patong na kaso ang isang negosyante na unang naaresto dahil sa paglabag sa batas trapiko matapos tangkaing manuhol ng P500,000 sa mga tauhan ng Manila Police District.

Kinilala ni MPD – Station 9 Commander Lt. Col. Salvador Tangdol ang suspek na si Mark Rovel de Ocampo.

Dakong alas dos y medya ng madaling araw noong Miyerkules, Hulyo a – 13 nang masita si De Ocampo sa kanto ng San Andres Street at Quirino Avenue, sa Malate.

Lulan ang suspek ng kanyang ng puting Subaru sedan nang pasukin ang “one way” sa naturang lugar dahilan para siya ay habulin ng mga tauhan ng patrol unit.

Bukod sa traffic violation, nakita rin sa sasakyan ni De Ocampo ang isang glock 17 gen 4 caliber 9mm pistol; pistol magazine at labingwalong piraso ng live ammunition.

Habang patungo sa presinto ay tinangka umanong manuhol ng suspek pero kanya itong itanggi.

Maliban sa baril, ilang bungkos ng tig-P1,000 naman ang narekober at gagamiting ebidensya laban kay De Ocampo na napag-alamang sangkot sa kidnap for ransom.

Mahaharap ang suspek sa mga kasong kasong paglabag Comprehensive Law on Firearms and Ammunition, New Anti-Carnapping Act of 2016 at Comprehensive Drugs Act.

Ipinagdiwang ng Department of Environment and Natural Resources (DENR) ang pagkakabilang ng isla ng Boracay sa ‘50 world’s greatest places of 2022’ ng Time magazine.

Ayon kay DENR OIC Secretary Ernesto Adobo, Jr, ang parangal mula sa award-winning publication ay patunay ng tagumpay ng pagsasaayos ng Boracay sa ilalim ng Duterte administration.

Sa July 25 hanggang August 1 issue ng Time magazine, isinama ang naturang isla sa 50 “top spots to visit this year” sa buong mundo.

Nagmula ang mga nominasyon sa network ng correspondents at contributors ng nasabing American News Magazine.

Mayo a – 8 noong 2018 inilabas ni dating Pangulong Rodrigo Duterte ang Executive Order 53 na bumuo sa Boracay Inter-Agency Task Force (BIATF) Na layuning bumuo, pangasiwaan at mahigpit na ipatupad ang mga batas at ordinansa para sa rehabilitasyon ng bora.

Kinilala rin ni Adobo na dating BIATF Secretariat head, ang pamumuno ni dating DENR Secretary at Task Force Chairman Roy Cimatu, mga co-chair na sina dating Secretaries Eduardo Año ng DILG at Bernadette Romulo-Puyat ng DOT Sa tagumpay ng rehabilitasyon ng isla.

Nabaliwala ang karapatan ng mga guro na makapagpahinga sa ikinakasang pagbabalik ng face-to-face clasess sa Agosto a – 22.

Tugon ito ni Teacher’s Dignity Coalition (TDC) Chairman Benjo Basas sa desisyon ng Department of Education na itakda ang pagbabalik ng klase sa nasabing petsa.

Ayon kay Basas, alinsunod sa mga panuntutunan ay dapat ay magkaroon muna ng bakasyon o pahinga ang mga guro bago bumalik sa klase.

Sa katunayan anya ay hindi pa tapos ang kanilang mga trabaho at hindi pa nakapaghahanda ang maraming mga guro, lalo sa mga pampublikong paaralan.