Drew Nacino

Magsasanib-puwersa na ang Department of Agriculture at Japan International Cooperation Agency (JICA) para sa implementasyon ng isang improved vegetable value chain project.

Ito’y bilang pagtalima sa kautusan ni Pangulong Ferdinand “Bongbong” Marcos Jr. na nagsisilbi ring kalihim ng kagawaran, na makamit ang food security.

Ayon sa DA., layunin ng Market-Driven Enhancement of Vegetable Value Chain (MV2C), katuwang ang JICA, na isulong ang “higher yield and income” para sa mga magsasaka at makamit ang food security, availability, accessibility at affordability sa bawat Pinoy.

Sa loob ng limang taon, bubuuin ang isang vegetable value chain roadmap, na tutukoy sa mga hamon at solusyon sa value chain.

Lumarga ang nasabing proyekto kasabay ng isang value chain survey sa ilang vegetable-producing provinces, gaya ng Benguet at Quezon, kung saan inaasahang ipatutupad ang MV2C pilot programs.

Naunsyami ang pagpapatupad ng 33-ton weight limit at rerouting ng mga sasakyan sa bahagi ng North Luzon Expressway-Southbound Candaba Viaduct na magsisimula sana noong isang linggo.

Ito’y makaraang umapela sa NLEX ang grupo ng truckers at Pampanga Provincial Government dahil sa epekto ng rerouting sa negosyo at daloy ng trapiko.

Ayon kay Teodorico Gervacio, pangulo ng Inland Haulers and Truckers Association, malulugi sila sa pagdaan sa mas mahabang ruta.

Magpapatupad sana ng diversion sa Angeles-San Fernando-Candaba Viaduct-Balagtas route kung saan lalabas ng San Fernando exit papuntang Gapan at tatagos muli sa Balagtas.

Ipinunto ni Gervacio na mula sa 32,000 pesos na krudo ng truck na may diretsong biyahe mula Clark-Manila, madaragdagan ito ng 6,000 pesos na tiyak aalmahan ng mga negosyante ng buhangin, gulay at ilang produkto.

Iaapela rin ng Pampanga government ang planong rerouting at weight limit dahil bukod sa dagdag pasakit sa mga negosyante ay lalala umano ang daloy ng trapiko sa lalawigan na magiging exit point ng mga truck.

Samantala, sa kabila ng pagpayag ng NLEX sa “status quo” sa pagpapatupad ng weight limit at rerouting, kanilang ipinunto na may mga bitak na ang Candaba Viaduct kaya’t dapat lamang itong isailalim sa repair.

Muling nagka-landslide sa bahagi ng Cebu City matapos ang malakas na ulan kahapon.

Dakong hapon nang gumuho ang lupa sa Sitio Sapang Kumonidad, barangay Guadalupe.

Nagsilikas ang mga residente habang naka-kordon na ang naturang lugar.

Wala namang naiulat ang Cebu City Disaster Risk Reduction and Management Office na nasugatan sa landslide.

Ito na ang ika-apat na landslide sa lungsod sa loob ng dalawang linggo.

Una nang inihayag ng PAGASA na ang malakas na pag-ulan ay dulot ng Habagat.

Pinagbigyan ng Paris Court of Appeals ang hirit ng Malaysia na “stay order” laban sa pagpapatupad ng isang French arbitration court ruling na nag-uutos sa Malaysian government na magbayad ng 14.9 billion dollars sa mga kaapo-apuhan ng Sultan ng Sulu.

Kaugnay ito sa nilagdaang kasunduan sa pagitan ni Sultan Jamalul Kiram II, kahuli-hulihang Sultan ng Sulu at isang British trading company noong 1878 para sa pagpaparenta sa Sabah.

Ipinunto ng French appellate court na maaaring malabag ang soberanya ng Malaysia sa oras na ipatupad ang desisyon ng arbitration court.

Ayon kay Malaysian law minister Wan Junaidi Tuanku Jaafar, naghahanda na rin silang isantabi muna ang pasya ng korte.

Inilabas ang stay order ilang araw matapos tangkain ng mga abogadong kumakatawan sa mga tagapagmana ng Sultan na bawiin ang dalawang assets ng Malaysian state oil firm Petronas sa Luxembourg.

Samantala, wala pang tugon ang British law firm na kumakatawan sa mga kaapu-apuhan ng Sultan.

Nanindigan ang Malaysian State Oil Company Petronas na dedepensahan nito ang kanilang legal na posisyon makaraang tangkaing i-sequester ang dalawa sa kanilang subsidiaries sa Luxembourg.

Ang units ng Petronas Azerbaijan at Petronas South Caucasus ay nakatakda na sanang bawiin ng mga abogado ng mga tagapagmana ni Sultan Jamalul Kiram II, ang kahuli-hulihang sultan ng Sulu.

Ito’y makaraang ipag-utos ng French Arbitration Court noong Pebrero sa Malaysia na magbayad ng 14.9 billion dollars sa mga heredero o heredera ng huling Sultan ng Sulu, bilang pagkilala sa nilagdaang land lease sa Sabah sa isang British trading company noong 1878.

Ang nasabing kasunduan ay minana ng Malaysia nang makalaya ito sa pananakop ng Britanya at kalauna’y nagbabayad ng taunang renta para sa paggamit sa lupain ng Sabah na pag-aari ng Sultan.

Gayunman, itinigil ang pagbabayad simula noong 2013, dahil sa argumento ng Malaysian government na wala umanong may karapatan sa Sabah, sapagkat bahagi umano ito ng teritoryo nila.

Iginiit ni Malaysian prime minister Ismail Sabri Yaakob na sasalagin nila ang naging desisyon ng French court at hindi nila papayagan ang anumang claim sa Sabah.

Tinawag naman ng Petronas na walang basehan ang seizure o pagbawi ng mga tagapagmana ng Sultan sa nasabing assets, at handa rin ang nasabing state oil company na ipagtanggol ang kanilang karapatan.

Mahigit 100 residente ng bayan ng San Jose, Occidental Mindoro ang naglunsad ng kilos-protesta kontra malawakang rotational brownouts sa lalawigan.

Dakong ala-6:30 kagabi nang magtipon ang mga residente bilang “Samahan ng mga Consumers in Occidental Mindoro” para sa tatlong oras na solidarity walk.

Ito na ang ikalawang sunod na beses na naglunsad ng naturang aktibidad ang mga consumer simula noong Sabado at plano ring isagawa sa loob ng limang gabi o hanggang Miyerkules.

Layunin nitong mabigyang-pansin ng national government ang kanilang sitwasyon sa gitna ng rotational brownout makaraang isailalim sa state of power crisis ang lalawigan.

Umaabot ng 12 hanggang 14 na oras ang power outages bunsod ng kakulangan sa power supply na labis na naka-apekto sa kanilang araw-araw na mga aktibidad sa lahat ng sektor.

Kinundena rin ng grupo ang kawalang-kakayahan ng electric service ng lalawigan na pinalala nang magsara ang power provider na Occidental Mindoro Consolidated Power Corporation noong June 25, dahilan upang maapektuhan ang mahigit 80,000 residente.

Sa ika-apat na sunod na araw, muling sumampa sa mahigit 2,000 ang daily COVID-19 cases sa bansa.

Nakapagtala kahapon ang Department of Health ng karagdagang 2,560 cases dahilan upang lumobo sa 19,873 ang mga aktibong kaso.

Gayunman, mababa ang nasabing bilang sa naitalang infections noong Sabado na 2,578, pero mataas sa average daily cases na naitala naman noong July 4 hanggang 10 na 1,467.

Umakyat naman sa 3,733,101 ang total case load, kabilang ang 3,652,587 recoveries at 60,641 deaths.

Nananatili ang Metro Manila sa mga rehiyong may pinaka-maraming cases sa nakalipas na dalawang linggo na 9,713; sinundan ng CALABARZON, 5,420 at Western Visayas na may 2,261.

Samantala, nangunguna ang Quezon City sa mga lugar sa National Capital Region na may pinaka-mataas na kaso sa nakalipas na dalawang linggo na 1,886.

Dalawang dalagita ang nasawi makaraang anurin ng baha matapos ang malakas na pag-ulan sa Quezon City.

Dakong alas-12 kahapon ng hatinggabi nang matagpuan ng barker na si Jeffrey Fariñas ang hindi pa nakikilalang biktima sa Pasong Tamo Bridge 3 sa Mindanao Avenue, barangay Bahay Toro.

Naisugod pa sa Quezon City General Hospital ang biktima pero binawian din ito ng buhay.

Bagaman hindi pa nakikilala ang nasawi, isang Justin Mark Dimacal ang nagsabing live-in-partner umano nito ang 15 anyos na biktima pero hindi ito pinayagang makuha ang bangkay dahil tanging kaanak ang pinapayagan ng ospital.

Samantala, dakong alas-3 naman ng madaling araw kahapon, isang 15 anyos na babae rin ang narekober sa tabing-ilog sa Lorraine Street, Parkway Village, Barangay Apolonio Samson.

Kinumpirma ni Salvacion Napiri Peralta, na anak niya ang ikalawang biktima na natutulog kasama ang isa pang nasawing dalagita sa ilalim ng tulay sa barangay Culiat nang anurin ng baha bunsod ng malakas na ulan noong Sabado ng gabi.

Asahan na ang pagbabalik sa face-to-face work ni Pangulong Ferdinand ‘Bongbong’ Marcos, Jr. ngayong araw matapos makumpleto ang 7-day isolation period.

Una nang inihayag ni Dr. Samuel Zacate, lead physician ni Pangulong Marcos na kung walang re-appearance ng anumang sintomas ng Covid-19 ay maaari nang i-release si PBBM mula sa isolation.

Nito lamang miyerkules ay sinabi ni Press Secretary Trixie Cruz-Angeles na natapos na ng punong ehekutibo ang lahat ng medication nito.

Batay anya sa pagsusuri ni Dr. Zacate ay handa nang bumalik si Pangulong Marcos sa gitna ng sangkaterbang trabahong naghihintay sa kanya at kahit naman noong naka-isolate hindi ito napigilang maglingkod sa bayan.

Aminado ang Department of Transportation na hindi makausad ang konstruksyon ng ilang railway project na suportado ng China, sa ilalim ng “Build, Build, Build Program”.

Ito, ayon kay Transportation Undersecretary for Rails Cesar Chavez, ay dahil hindi pa napopondohan ang mga nasabing proyekto.

Kabilang anya sa mga wala pang pondo ang mga planong train systems mula Laguna hanggang Bicol, Clark to Subic at Mindanao Railway, na campaign promise ni dating Pangulong Rodrigo Duterte.

Pinaka-malaki sa mga nasabing kontrata ang 380 kilometer PNR package 1 mula Calamba, Laguna hanggang Daraga, Albay na P142 billion; P83 billion para sa Mindanao Railway habang P51 billion Clark-Subic Railway.

Noon lamang January 18 ay ini-award ng DOTr ang kontrata para sa PNR Bicol package 1 sa Chinese Joint Venture China Railway Group limited, China Railway number 3 Engineering Group Limited at China Railway Engineering Consulting Group Limited.

Inaasahang matatapos ang konstruksyon ng package 1 sa taong 2024 at magsisimula ang operasyon sa ikatlong quarter ng 2025.

Gayunman, walang tugon ang Chinese government kahit lumiham na noong Pebrero si dating Finance Secretary Carlos Dominguez hinggil sa loan application kung saan nakasaad na kung hindi i-ga-grant ang loan ay ikukunsidera na itong withdrawn.