Drew Nacino

Pinag-aaralan na ng Department of Health ang pagbili ng mga bakuna kontra dengue sa ibang bansa.

Sa gitna ito nang tumataas na kaso ng dengue sa bansa na kasalukuyang nasa 65,000 na.

Tiniyak naman ng DOH na daraan sa proseso ang procurement ng dengue vaccine.

Kabilang sa mga tinitingnan ng kagawaran ang pag-a-apply ng manufacturers ng certificate of product registration sa Pilipinas na isasailalim sa masusing evaluation.

Nito lamang Martes ay idineklara na ang dengue outbreak sa lalawigan ng Occidental Mindoro habang nasa state of calamity na ang antique dahil sa tumataas ding kaso ng nasabing sakit na nakukuha sa kagat ng lamok.

Kasado na ang lahat ng preparasyon ng PNP para sa kauna-unahang State of the Nation Address ni Pangulong Ferdinand “Bongbong” Marcos sa Lunes, Hulyo a – 25.

Tiniyak ni PNP Spokesperson Col. Jean Fajardo na nakalatag na ang lahat ng seguridad sa loob at labas ng Batasan Pambansa sa Quezon City.

Nakikipag-ugnayan na rin anya sila sa MMDA para sa pagsasara ng ilang kalsada at pagtatakda ng mga alternatibong ruta upang maiwasan ang mabigat na daloy ng trapiko.

Samantala, nilinaw ni NCRPO Spokesperson Lt. Col. Jenny Tecson na ipinagbabawal ang pagsasagawa ng kilos-protesta sa commonwealth avenue dahil may mga itinalaga namang mga lugar na maaaring pagdausan ng demonstrasyon, gaya ng Quezon Circle.

Nanindigan si Public Attorney’s Office Chief Persida Rueda-Acosta na hindi dapat gamitin ang Dengvaxia sa bansa dahil sa masamang epekto nito sa kalusugan, lalo sa mga bata.

Ayon kay Attorney Acosta, dapat ay bumili na lamang ang gobyerno ng mga subok na bakuna kontra dengue sa halip na mag-procure ng mga experimental drug, gaya ng Dengvaxia.

Sa kabila nito, kinuwestyon naman ni Iloilo Province 1st District Rep. at dating DOH Secretary Janet Garin ang mga akusasyon ni Acosta.

Aminado si Garin na nagtataka siya kung bakit pilit kinukwestyon ni Acosta ang kredibilidad ng Dengvaxia gayong ginagamit naman ito sa ibang bansa.

Marami pang kaso kaugnay sa kontrobersyal na Dengvaxia vaccine ang asahang susulpot.

Ito ang inihayag ni Public Attorney’s Office (PAO) Chief, Atty. Persida Rueda-Acosta sa gitna ng panawagang gamitin muli ang nasabing bakuna lalo’t tumataas na naman ang mga kaso ng dengue.

Ayon kay Acosta, marami pang mga bangkay ng mga batang namatay ang isasailalim sa pagsusuri upang mapatunayan kung pagtuturok ng dengvaxia ang ikinamatay ng mga ito.

Gayunman, may ilan anyang mga magulang ang nagpasyang manahimik na lamang dahil binayaran ng 50,000 pesos.

Pinag-aaralan na ng Department of Agriculture (DA) ang pagtatakda ng Suggested Retail Price (SRP) sa asukal.

Dahil ito sa pagtaas ng presyo sa mga pamilihan bunsod nang kakulangan sa produksyon dulot ng pagkasira ng mga sugarcane plantation dahil sa mga nagdaang bagyo.

Ayon kay DA Undersecetary Kristine Evangelista, batay sa kanilang pag-aaral ay dapat ilagay sa P72.50 centavos ang presyo ng asukal kada kilo sa mga supermarket.

Maliban sa pagtatakda ng SRP, nakikipagtulungan na rin sa DA ang mga stakeholders para mapababa ang presyo ng asukal.

Ikinakasa na rin ng gobyerno ang pag-aangkat muli ng asukal sa gitna ng problema sa supply.

Aminado si agriculture undersecretary Kristine Evangelista na kung mapapatunayang mayroong kakulangan ng supply ng asukal ay ilalarga nila ang panibagong importasyon.

Alinsunod anya ito sa rekomendasyon ng sugar regulatory administration at mga stakeholder.

Umaasa si Evangelista na mas makikinabang ang mga household consumer sa oras na muling mag-angkat ng asukal.

aminado naman ang DA official na sadyang hindi sapat ang kasalukuyang sugar supply sa demand, lalo’t napinsala ang maraming sugarcane plantation ng mga nagdaang bagyo.

Muling nakaranas ng pagkatalo ang Gilas Pilipinas sa 2022 FIBA Asia Cup.

Hindi nakapalag ang Gilas sa mas matatangkad na kalaban sa score na 92-75 sa kanilang paghaharap sa Group D, sa Jakarta, Indonesia, kagabi.

Nagpakawala ng 17 points si Kiefer Ravena para sa Philippine National Team pero hindi ito naging sapat upang makahabol.

Durog ang depensa ng mga Pinoy sa matinding puwersa ng opensa ng New Zealand na humakot ng rebound.

Dahil dito, hawak na ng gilas ang kartadang 1-2 at nakatakdang harapin ang Japan sa playoffs, bukas.

Lima ang nasawi sa malakas na pagsabog ng bombang itinanim sa sasakyan sa Jowhar, Somalia.

14 naman ang nasugatan sa naturang insidenteng naganap sa labas ng Nur-Doob hotel, na madalas pasyalan ng mga mambabatas at iba pang local official.

Ayon sa Somali police, nadamay rin sa pagsabog ang mga katabing gusali Al-Qaeda.

Itinuturong nasa likod ng pambobomba ang teroristang grupong Al-Shabaab, na kapanalig ng Al-Qaeda.

Tumaas pa ng 30 pesos kada kilo ang presyo ng karneng baboy at manok sa ilang pamilihan sa Metro Manila sa gitna ng namemesteng African Swine Fever (ASF) at bird flu outbreaks.

Ayon kay Pork Producers Federation of the Philippines Incorporated vice president Nicanor Briones, inaasahan na nilang bahagya pang tataas ang presyo ng karne ng manok at baboy dahil lumalakas ang demand.

Gayunman, hindi naman anya marami ang karagdagang supply dahil mayroon pa ring banta ng ASF at bird flu.

Sa pag-iikot ng DWIZ sa Balintawak Market sa Quezon City at Divisoria sa Maynila, naglalaro na sa 330 hanggang 360 pesos ang kada kilo ng kasim at pigue;

Liyempo, 400 hanggang 420 pesos mula sa dating 380 habang ang isang buong manok ay 210 hanggang 220 pesos kada kilo na halos kaparehas na ng presyo sa supermarket.

Sa kabila nito, muling tiniyak ng Department of Agriculture na walang shortage ng supply ng karneng baboy at manok.

Nag-positibo sa COVID-19 ang designated secretary ng Department of Energy na si Atty. Raphael Lotilla.

Kinumpirma ng Department of Energy na sumasailalim na sa gamutan at self-isolation sa bahay si Lotilla.

Inabisuhan na rin ng opisyal ang Malakanyang sa kanyang kondisyon at patuloy na magbibigay ng updates.

Hindi naman idinetalye ng kagawaran kung paano at saan nahawa si Lotilla.

Si Lotilla ay dati na ring naging kalihim ng DOE noong panahon ni dating Pangulo at ngayon ay Pampanga 2nd district Rep. Gloria Arroyo.

Una nang nagpositibo sa COVID-19 ang iba pang cabinet member ni Pangulong Bongbong Marcos, tulad nina secretaries Boying Remulla ng justice at Toots Ople ng Migrant Workers.