Drew Nacino

Hindi bababa sa 15 ang na-ospital matapos malason umano sa kinaing chicken mami sa Tondo, Maynila.

Kinumpirma ni Dr. Ted Herbosa, hepe ng emergency medicine ng U.P. – P.G.H. na ilan sa mga biktima ay isinugod sa kanilang pagamutan matapos makaranas ng pananakit ng tiyan, pagkahilo, pagsusuka at pagtatae.

Pawang mga suki umano ang mga biktima sa mamihan ng kanilang kapitbahay sa Callejon street, Gagalangin. Naisugod naman ang ilan pang biktima sa Tondo General Hospital, Chinese General Hospital at Jose Reyes Memorial Hospital. Inaalam na ng mga otoridad kung ano ang tunay na sanhi ng food poisoning.

Naniniwala si dating National Task Force Against Covid-19 Medical Adviser Dr. Ted Herbosa na maaaring nasa endemic stage na ang naturang sakit sa bansa.

Gayunman, nilinaw ni Herbosa, hepe ng emergency medicine ng U.P. – P.G.H. Na kailangan pa ring hintayin ng Pilipinas ang rekomendasyon ng World Health Organization bago magdeklara ng endemic stage.

Hangga’t mayroon anyang mga sumusulpot na mga bagong sub-variant ng omicron ay tila malabo pang tumungtong sa nasabing estado ang bansa.

Sumampa na sa 969 ang dengue cases, kabilang ang 5 namatay, sa Davao City simula Enero hanggang sa unang bahagi ng Hulyo ngayong taon.

Ayon sa Davao City Health Office-Tropical Diseases Prevention and Control Unit, kontrolado naman nila ang sitwasyon ng dengue sa lungsod.

Gayunman, maaaring lumala ang sitwasyon kapag napabayaan at kulang sa kooperasyon ang publiko.

Muling ipinaalala ng City Health Office sa mga residente na manatiling alerto kontra dengue sa gitna ng maulang panahon.

Simula pa noong pagpasok ng taong 2022 ay pinaigting na ng City Health Office ang kanilang dengue surveillance sa mga barangay.

8 sa bawat 10 Filipino ang umaasang hindi na lalala ang covid-19 pandemic.

Batay sa Social Weather Stations (SWS) Survey noong April 19 hanggang 27, aabot sa record-high 83% ng respondents ang naniniwalang hindi na lalala ang pandemya.

Kumpara ito sa 80% noong December 2021 survey at 44% noong May 2020 survey.

Bumaba naman sa 16% ang nangangambang lumala pa ang pandemya kumpara sa 19% noong December 2021.

Isinagawa ang survey sa 1,440 respondents ilang buwan matapos ang omicron surge na nakapagtala ng record-high na mga bagong covid-19 cases.

Pinaka-mataas na bilang ng mga umaasang hindi na lalala ang covid-19 pandemic ay mula sa Mindanao, 86%, sinundan ng Metro Manila at buong Luzon, kapwa 82% at Visayas, 81%.

Pinakamarami naman sa mga nangangamba ay mula sa Visayas at balance Luzon, 18%; Metro Manila, 17% at Mindanao, 12%.

Plano ng Land Transportation Franchising and Regulatory Board (LTFRB) na buksan ang mga lumang ruta ng bus bago ang pagbabalik ng face-to-face classes.

Tugon ito ng LTFRB sa inaasahang pagdagsa ng mga biyahero, partikular ng mga estudyante sa pagsisimula ng klase sa Agosto a – 22.

Ayon kay LTFRB Chairperson Cheloy Garafil,  35 ruta na ang kanilang natukoy na bubuksan bago ang face to face classes.

Gayunman, 30% lamang anya ng mga lumang bus routes ang ibabalik, kabilang ang mga bumibyahe sa University belt, Lawton at Commonwealth Avenue.

Aminado naman si Garafil na isang malaking hamon na ibalik sa 100% ang mga lumang ruta lalo’t may biyahe pa ang EDSA bus way carousel hanggang katapusan ng taon.

Sakaling ituloy, posibleng sa susunod na taon pa makamit ang total capacity sa reopening ng mga lumang bus route.

Nagbitiw sa pwesto si Pulupandan, Negros Occidental Mayor Lorenzo Eduardo Mario Antonio Suatengco dahil sa problema sa kalusugan.

Sa kaniyang liham kay Governor Bong Lacson kahapon, inihayag ni Suatengco na hindi na niya magagampanan ang kanyang mga tungkulin bunsod ng iniindang karamdaman.

Ipinagkakatiwala naman ni Suatengco ang kanyang tungkulin sa pinsang si Vice Mayor Miguel Antonio Peña na dati na ring naging alkalde ng bayan na naka-tatlong termino.

Uupo naman bilang bise alkalde ang numero unong konsehal na si Anthony Gerard Suatengco.

Samantala, hindi idinetalye ng nagbitiw na alkalde kung ano ang kanyang sakit.

Muling ipinanawagan ng independent group na nagtataguyod ng mga karapatan ng mga ordinaryong mamamayan na Citizenwatch Philippines sa Kongreso ang pagsasabatas ng sim card registration bill.

Kasunod ito ng refiling ng kahalintulad na panukala sa mababang kapulungan ng Kongreso.

Sa ilalim ng bill, i-re-require na ng telecommunication companies sa publiko na i-register ang kanilang mga biniling sim card at i-activate upang ma-protektahan ang mga user laban sa cyber scams at ibang krimen.

Ayon kay Atty. Tim Abejo, co-convenor ng Citizenwatch Philippines, kailangan ang nasabing bill dahil sa paglipana ng mga scammer, trolls at disinformation agents.

Kung irerehistryo anya ang mga sim card, na naka-link sa social media accounts, matutukoy na ang pagkakakilanlan ng mga online scammer, trolls at disinformation peddlers at makakasuhan na ang mga ito.

Magugunitang vineto ni dating Pangulong Rodrigo Duterte ang naunang bersyon ng sim card registration bill, noong Abril.

Maliit ang posibilidad na makapasok sa bansa ang Marburg virus.

Ito ang tiniyak ni Health Officer-in-Charge Maria Rosario Vergeire matapos mapaulat na mayroong dalawang nasawi sa bansang Ghana dahil sa nasabing virus.

Ipinaliwanag ni Vergeire na ang naturang sakit ay endemic o matatagpuan lamang sa ibang kontinente, gaya ng Africa.

Gayunman, dapat pa rin anyang maging handa gaya ng DOH mula nang makatanggap ng ulat sa international health regulations process.

Ang dalawang kaso ng marburg na halos katulad ng ebola ay natukoy sa ghana kung saan walang gamot o bakuna para rito.

Kasama sa mga sintomas nito ang mataas na lagnat at internal o external bleeding.

3 ang patay habang 4 ang sugatan sa salpukan ng tricycle at van sa Maharlika Highway sa San Miguel, Bulacan.

Kinilala ang mga nasawi na sina AJ Maniquiz, 5 taon; Miguel Maniquiz, 7 taon at kanilang nanay na si Monica Ramos, 29 na taon.

Ayon kay Bulacan Provincial Police Director Col. Charlie Cabradilla, dead on arrival na sa San Miguel District Hospital ang magkapatid habang sa PJG Hospital sa Cabanatuan City, Nueva Ecija binawian ng buhay si Monica.

Sugatan naman ang trese anyos na driver ng tricycle at tatlong iba pa, kabilang ang isang taong gulang na lalaki.

Patungo sana ang mga biktima sa isang vaccination site nang salpukin ng van ang kanilang tricycle sa barangay Buliran, kahapon.

Batay sa imbestigasyon, tinangkang umiwas ng menor de edad na trike driver sa isa pang sasakyan na sinubukang mag-overtake bago naganap ang aksidente.

Agad namang naaresto ang van driver, na si Angelo Paras, sisenta’y uno anyos, ng San Leonardo, Nueva Ecija at nahaharap na sa mga kasong homicide at multiple serious injuries at reckless imprudence and damage to properties.

Inihayag naman ni San Miguel Police Chief Col. Jason San Pedro na ang nasabing aksidente ay dapat magsilbing paalala sa publiko na huwag payagang magmaneho ng mga sasakyan ang mga menor de edad.

Pabor ang Philippine Medical Association na i-rekunsidera ng Department of Health ang muling paggamit ng Dengvaxia vaccines bunsod ng tumataas na kaso ng dengue sa bansa.

Sa kabila ito ng kontrobersyang bumabalot sa nasabing bakuna na itinuturong dahilan umano ng pagkamatay ng ilang batang tinurukan nito.

Binigyang-diin ni dating PMA President Dr. Benito Atienza na mahalaga ang papel ng mga bakuna upang mapababa ang bilang ng mga nagkakasakit, lalo ngayong magkasabay kumakalat ang dengue at covid-19.

Wala pa naman anyang “siyentipikong ebidensya” na Dengvaxia talaga ang sanhi ng pagkamatay ng ilang batang tinurukan nito noong 2017 at kailangan pa ng mas malalim na pag-aaral bago ito patunayan.