Drew Nacino

Tiniyak ni Environment Secretary Toni Yulo-Loyzaga na kabilang sa kanyang magiging prayoridad ang paglaban sa climate emergency at pangangalaga sa indigenous species.

Ayon kay Loyzaga, dapat labanan ang climate emergency sa pamamagitan ng climate adaptation measures at paggamit ng siyensya.

Dapat din anyang magsikap upang maipagpatuloy ang pangangalaga sa indigenous species bilang bahagi ng ating natural heritage kasabay ng paggamit sa resources para sa ika-uunlad ng bansa.

Kabilang ang climate change sa pinaka-malaking hamon sa buong mundo at matatandaang inihayag ni dating pangulong Rodrigo Duterte na umaasa siyang mas magiging maayos ang pagharap ng Marcos administration sa naturang issue.

Bago naging kalihim ng DENR, nagsilbi si Yulo-Loyzaga bilang chairperson ng international advisory board ng Manila Observatory at Advocate ng Advanced Research para sa climate at disaster resilience.

Nito lamang Martes ay nanumpa si Yulo-Loyzaga kay Pangulong Bongbong Marcos sa Malakanyang.

Nagtaas na rin ng presyo ang ilang nagtitinda ng litson manok sa Metro Manila.

Sa pag-iikot ng DWIZ sa hanay ng mga tindahan ng litson manok sa A. Mabini street, Caloocan City, tumaas na ng hanggang P20 ang kada isang buong manok.

Naglalaro na sa P350 hanggang P360 ang jumbo litson manok mula sa dating P330 hanggang P340 habang ang super-half ay nasa P180 hanggang P190.

Ganito rin ang sitwasyon sa ilan pang tindahan ng litson manok sa Pasig City.

Ipinaliwanag naman ng mga nagtitinda na gasolina ang isa sa dahilan kaya sila nagtaas ng presyo.

Sa kabila nito, malakas pa rin anila ang bentahan at patuloy pa silang tinatangkilik ng kanilang mga suki.

Namemeligrong magkaroon ng rotational brownout kung titigil sa pag-susuplay ng kuryente ang dalawang malaking power plant sa Luzon.

Ito ang ibinabala ng Meralco sakaling hindi pagbigyan ang hirit nila at ng dalawang power plant na i-adjust ang kontrata para masalo ang pagtaas ng presyo ng krudo na nagpapatakbo sa mga planta.

Aminado si Meralco Regulatory Management Head Ronald Valles na kung mayroon man silang makuha, mas malaki naman ang presyo at mas malaki ang babayaran ng customers kumpara sa kini-claim ng san miguel corporation na P5.25 billion.

Gayunman, tutol ang grupong power 4 people sa petisyon ng Meralco at San Miguel power plants dahil paglabag umano ito sa kontrata.

Handa namang pag-aralan ng Energy Regulatory Commission ang hirit ng Meralco at dalawang power plant lalo’t may epekto ito sa singil sa kuryente sa gitna ng nagtataasang presyo ng mga bilihin at serbisyo.

Tiniyak ni ERC Commissioner Rexie Baldo-Digal na hihimayin nilang maigi ang petisyon ng Meralco at San Miguel upang ma-protektahan ang kapakanan ng mga consumer na bugbog na sa tila walang katapusang pagtaas ng presyo ng mga bilihin at serbisyo.

Humihiling ng dagdag singil sa gobyerno ang mga operator sa EDSA bus carousel na nagbibigay ng libreng sakay.

Ayon kay Land Transportation Franchising and Regulatory Board Chairperson Cheloy Garafil, dalawang bus consortium sa EDSA runway ang umaalma para sa dagdag-singil ng kanilang libreng sakay.

Ito’y bunsod ng pagtaas ng presyo ng diesel sa kabila ng tatlong magkasunod na linggo namang rollback.

Iminungkahi ng E.S. Transport at Mega Manila Bus Operator na itaas ang bayad sa kanila batay sa layo ng pasada ng bawat bus lalo’t otsenta pesos ang kada litro ng diesel.

Kamakailan ay inihayag ng LTFRB Na nagbayad na ang pamahalaan ng P659-million sa mga bus operator para sa sampung linggong libreng sakay sa EDSA.

Hindi pinagbigyan ng Quezon City Department of Public Order and Safety (DPOS) ang permit to rally ng grupong Bagong Alyansang Makabayan o Bayan para sa unang State of the Nation Address ni Pangulong Ferdinand “Bongbong” Marcos, Jr.

Sa aplikasyon ng Bayan, hinihiling nitong makapagsagawa ng rally sa Batasan road sa Commonwealth Avenue, Quezon City sa Lunes.

Gayunman, ibinasura ng DPOS ang hirit ni Bayan Secretary General Renato Reyes, Jr. batay na rin sa rekomendasyon ng Quezon City Police District.

Ipinunto ng DPOS na hindi isang freedom park ang Batasan road para magsagawa ng kilos-protesta o anumang mass gatherings; maka-aapekto ang aktibidad ng Bayan sa normal na daloy ng trapiko para sa mga dumaraan sa Batasan o Commonwealth Avenue.

Nananawagan ng formal dialogue ang iba’t-ibang transport group kay bagong Land Transportation Franchising and Regulatory Board Chairperson Cheloy Garafil upang ma-plantsa ang mga issue sa sektor.

Isa sa mga hirit ng mga transport group ang bigyang-linaw ang mga rekomendasyong inilatag ng Department of Transportation.

Kabilang ang Liga ng Transportasyon at Operator sa Pilipinas (LTOP) sa mga humihiling sa LTFRB Na ibalik ang kanilang mga dating ruta na ipinatigil dahil sa rationalization.

Sa forum ng Liga ng mga Broadcaster sa Pilipinas, inihayag ni LTOP National President Orlando “Ka Lando” Marquez na dapat harapin nang maayos ng bagong liderato ng LTFRB Ang ilang kinakaharap na hamon sa transport sector.

Gayunman, aminado si Garafil na hindi pa nila masusing napag-aaralan ang hiling na ibalik ang mga dating ruta ng iba’t-ibang transport group, lalo sa pagbabalik ng face to face classes sa Agosto.

Lumobo pa sa 22,207 ang aktibong kaso ng covid-19 sa bansa, ang pinaka-mataas na active cases simula noong Abril a – 15.

Ito’y makaraang makapagtala ang Department of Health ng karagdagang 2,828 cases kahapon, na pinaka-mataas na daily tally sa nakalipas na mahigit limang buwan o simula noong Pebrero a – 13.

Sa mga nadagdag na kaso, pinakamarami o 1,002 ay mula sa Metro Manila.

Wala namang naitala ang DOH na panibagong fatalities kaya’t nananatili sa 60,641 ang death toll.

Samantala, nasa 3.74 million na ang total case load kabilang ang 3.65 million recoveries.

Binuksan na ng Department of heaLth sa Bangsamoro Region ang one-stop shop para sa covid-19 vaccination at routine immunization.

Ayon sa DOH, dahil sa pagbubukas ng one-stop-shop ay mas maraming tao na sa rehiyon ang magkakaroon ng mas madaling access sa vaccination at routine immunization upang maprotektahan ang mga komunidad.

Magugunitang naitala sa BARMM Ang mababang covid-19 inoculation rates dahilan upang magkasa ang gobyerno ng special vaccination days sa rehiyon noong Mayo.

Sa datos ng DOH, nasa 1,844,370 doses lamang ang binakunahan sa BARMM.

Bukod sa covid-19 vaccination at routine immunization, nag-aalok din ang one-stop shop site ng mga serbisyong gaya ng animal bite treatment centers.

Muling inabisuhan ng Philippine Consulate General sa New York, U.S.A. ang mga pilipino na manatiling mapagmatyag sa gitna nang dumaraming kaso ng krimen sa lugar.

Batay sa datos ng New York City Police Department, tumaas ng 37% ang city-wide crime incidences ngayong taon kumpara noong 2021.

Kabilang sa mga insidente ng pagnanakaw o theft, 49%; robbery o panghoholdap, 39.2% at hate crimes, 12.6%.

Ayon sa konsulada, dapat mag-ingat ang mga pinoy tuwing lalabas ng bahay upang maiwasang maging biktima ng anumang krimen.

Noon lamang isang linggo, isa na namang pilipinong turista mula sa Cebu ang ginulpi malapit sa Philippine Center sa Manhattan, New York City.

Ito na ang ika-41 beses na isang pinoy ang nabiktima ng itinuturing na hate crime laban sa mga asyano sa Amerika.

Masusing nirerapaso ng Department of Agriculture ang Rice Tarrification Law (RTL) at mandato ng National Food Authority (NFA) upang matiyak ang food security.

Sa ilalim ng RTL, pinapayagan ang liberalized importation ng bigas, habang ang NFA ay may papel lamang na tiyaking sapat ang supply ng rice buffer stocks sa Pilipinas o tatlumpung araw ng total consumption ng bansa tuwing lean season.

Pero bago isabatas ang RTL, ang NFA Ang nag-re-regulate ng rice sector at tanging ahensyang pinapayagang mag-import ng bigas.

Inihayag ni DA Undersecretary Kristine Evangelista na pinag-aaralan ng kagawaran kung papayagang muli ang NFA na mag-angkat ng bigas kahit nasa ilalim ng liberalized trading regime.

Alinsunod sa Rice Tarrification Law, hindi pinapayagan ang NFA na mag-angkat ng bigas.