Drew Nacino

Tumungtong na sa 27,116 ang aktibong kaso ng COVID-19 sa bansa.

Ito’y makaraang makapagtala ang Department of Health (DOH) ng karagdagang 3,657 na COVID-19 cases kabilang ang labingtatlong nasawi, kahapon, ang pinaka-mataas na daily cases simula noong Pebrero 12.

Sa mga bagong kaso, 1,327 ay mula sa Metro Manila habang bahagyang tumaas sa 60,683 ang death toll.

Umakyat naman sa 3,752,534 ang total case load, kabilang ang 3,644,735 recoveries.

Samantala, umalagwa sa 14% ang positivity rate ngayong linggo kumpara sa 12.7% noong nakaraang linggo.

Kasalukuyang nasa moderate risk sa 6.4 cases per 100,000 population ang Metro Manila kung average daily attack rate (ADAR) ang pagbabatayan.

Sa kabila nito, ikinukunsiderang nasa low risk sa 32% ang healthcare utilization rate sa National Capital Region.

Inilatag na ng Quezon City Local Government (QC LGU) ang traffic rerouting scheme para sa kauna-unahang State of the Nation Address (SONA) ni Pangulong Ferdinand “Bongbong” Marcos Junior, mamaya.

Kabilang sa isasara ang Zipper Lane mula Tandang Sora hanggang University Avenue para bigyang-daan ang SONA at magpapatuloy ang Zipper Lane hanggang bukas.

Pinapayuhan naman ng QC LGU ang mga motorista na dumaan sa mga alternatibong ruta dahil inaasahan ang mabigat na daloy ng trapiko sa Commonwealth Avenue.

Ang mga motoristang manggagaling sa Edsa patungong Fairview ay dapat kumaliwa sa Mindanao o North Avenues hanggang Sauyo Road o Quirino Highway papunta sa kanilang destinasyon;

Ang mga manggagaling naman ng Edsa ay dapat ding dumaan sa Aurora Boulevard, flyover papuntang A. Bonifacio, kumaliwa sa J.P. Rizal, kaliwa sa Batasan–San Mateo Road patungong destinasyon;

Dumaan sa Bonny Serrano Avenue diretso hanggang Katipunan Crossing, F.V.R. Road, kaliwa sa SM Marikina, kanan sa A. Bonifacio, kaliwa sa J.P. Rizal, kaliwa sa Batasan–San Mateo Road papuntang destinasyon;

Sa mga manggagaling naman sa C5, dapat lumiko o kumanan sa F.V.R. Road, kumaliwa sa SM Marikina, kumanan sa A. Bonifacio, kumaliwa sa J.P. Rizal, kumaliwa sa Batasan-San Mateo Road patungong destinasyon.

Samantala, isang bahagi ng IBP Road sa kanto ng Sinagtala Street hanggang kanto ng Batasan-San Mateo Road ang sarado sa daloy ng trapiko.

Isang “determinadong assassin” ang suspek sa pamamaslang kay dating Lamitan City Mayor Rosita Furigay at dalawang iba pa.

Ganito ilarawan ni Quezon City Police District (QCPD) Director, Brig. Gen. Remus Medina ang suspek na si Dr. Chao Tiao Yumul nang pagbabarilin nito ang mga biktima sa gitna ng graduation ceremony sa Ateneo De Manila University, kahapon.

Ayon kay Medina, si Furigay ang talagang target ni Yumul na matagal nitong sinundan hanggang sa makakuha ng tiyempo.

Palipat-lipat anya ng bahay ang suspek at walang permanenteng address dahil lagi nitong tinitiktikan ang biktima.

Wala ring tinutuluyan sa Metro Manila si Yumul at sa katunayan ay nag-book lamang ito ng grab taxi papasok ng campus ng Ateneo na armado ng dalawang handgun pero hindi na-detect sa gate.

Sa loob ng campus ay matiyagang naghintay si Yumul kay Furigay sa lobby ng Aretè Building kung saan isasagawa sana ang graduation ng Ateneo Law School.

Tatlo ang patay kabilang ang dating alkalde ng Lamitan City, Basilan matapos pagbabarilin ng isang lalaki sa gitna ng graduation ceremony ng Ateneo Law School sa Katipunan Avenue, Quezon City, kahapon.

Kinilala ang mga biktimang sina Rosita Furigay, dating mayor ng Lamitan; Victor George Capistrano, Executive Assistant ni Furigay at Jeneven Bandiola, isa sa mga security guard ng Ateneo De Manila University.

Ayon kay PNP – Public Information Officer (PIO) Chief, Brig. Gen. Roderick Augustus Alba, dalawa naman ang sugatan sa insidente kabilang ang anak na babae ni Furigay na si Hannah, 25 anyos.

Dadalo anya sana si Furigay sa graduation ceremony ng anak nang pagbabarilin ng suspek na si Dr. Chao Tiao Yumul habang naglalakad sa lobby ng isa sa mga gusali ng paaralan, pasado alas-3 ng hapon.

Inihayag ni Quezon City Police District Director, Brig. Gen. Remus Medina na sunod na binaril ni Yumul si Capistrano at Bandiola matapos nitong tangkaing pigilang makatakas ang suspek.

Gayunman, nakalabas si Yumul ng campus dala ang sasakyang ninakaw nito malapit sa paaralan at nagkaroon pa ng habulan hanggang ma-corner ang suspek sa Aurora Boulevard, Cubao.

Batay sa imbestigasyon, personal ang motibo ng suspek sa pamamaslang.

Sa kabila ng pagtaas ng presyo ng mga bilihin, balik na sa normal ang presyo ng pandesal.

Ayon kay Asosasyon ng Panaderong Pilipino President Lucito “Chito” Chavez, batid nilang hindi kakayanin ng mga consumer ang mas mahal na pandesal kaya’t pinananatili ng mga panaderia ang presyo.

Sinubukan anyang gawing P3 hanggang P4 ang presyo ng pandesal subalit nilangaw at hindi umano nabebenta ang tinapay.

Gayunman, mas maliit na ang mga nabibiling pandesal kumpara dati.

Kabilang din sa problema ng mga magtitinapay ang pagmahal ng asukal.

Samantala, isinusulong ng grupo nina Chavez sa mga community bakery ang paggamit ng coco flour, na mas mura kumpara sa wheat flour.

Sinimulan na ang public consultation para sa hirit na dagdag-singil ng Maynilad at manila water makaraang ipako nang tatlong taon ang water rate sa mga sineserbisyuhan nilang lugar.

Unang nagsagawa ng konsultasyon at rate rebasing process ang Maynilad noong Miyerkules na susundan ng Manila Water.

Hindi binanggit ng Metropolitan Manila Water Sewerage System Regulatory Office MWSS-RO kung magkano ang magiging dagdag-singil pero aabot umano sa P80-billion ang ginastos ng Maynilad na kailangang bawiin sa mga customer.

Nasa P20-billion naman ang gastos ng Manila Water sa kanilang mga proyekto na gustong ipasa sa kanilang mga customer.

Gayunman, nilinaw ni MWSS-RO Chief Regulator Atty. Patrick Ty na kailangan pa nilang himayin at pag-aralan ang hirit ng dalawang water concessionaire.

Tiniyak naman ni TY na hindi bibiglain ang mga consumer sa naka-umang na panibagong water rate adjustment.

Posibleng sa susunod pang taon ipatupad ang hinihiling na dagdag-singil ng dalawang water concenssionaire sa east at west zone ng Metro Manila.

Ito ang nilinaw ni Manila Water Corporate Communications Head Dittie Galang sa gitna ng isinasagawang rate rebasing ng Metropolitan Manila Water Sewarage System.

Ayon kay Galang, isinasagawa ang rate rebasing kada limang taon alinsunod sa concession agreement upang mabatid kung kailangang magpatupad ng dagdag o bawas singil.

Muling ikinukunsidera ng World Health Organization (WHO) Na idineklara bilang isang global health crisis ang monkeypox outbreak.

Sa pulong ng WHO Emergency Committee kanina, inihayag ni Director-General Tedros Ghebreyesus na patuloy ang pagtaas ng cases sa iba’t-ibang bansa.

Nilinaw naman ng mga WHO official sa Africa na itinuturing na nilang emergency ang nasabing epidemya sa naturang kontinente.

Gayunman, nagdadalawang-isip pa ang mga siyentista at medical expert sa Europa, North America at iba pang lugar kung kailangang magdeklara ng emergency dahil mild lamang umano ang bersyon ng sakit sa kanilang mga bansa.

Hindi na tinantanan ng kamalasan ang Terrafirma Dyip sa PBA Philippine Cup.

Ito’y makaraang mapatalsik ng Meralco Bolts ang Terrafirma sa 2022 Philippine Cup sa kanilang paghaharap, sa Araneta Coliseum, kahapon.

Ipinalasap ng Bolts ang ika-11 sunod na pagkatalo ng Dyip makaraang patumbahin ito sa score na 105-89.

Bitbit ng Meralco ang kartadang 7-4 at maaaring pumuwesto sa 4^th o 5^th spot sa quarterfinals habang nahulog ang walang kapana-panalong Dyip sa 12^th spot o pinaka-kulelat.

Sumalaksak si Chris Newsome ng 19 points, 6 rebounds at 5 assists para sa ikalawang sunod na panalo ng Meralco.

Nagpakawala naman ng 24 points si Aldrech Ramos para sa Terrafirma pero hindi nakapalag ang koponan sa Bolts.

Isang person with disability ang patay habang 15 iba pa ang na-ospital makaraang malason sa kinain umanong chicken mami sa Tondo, Maynila.

Kinilala ng Manila Police District ang pwd na si Josefina Manila Argamosa, 43 anyos, residente ng barangay 172, Gagalangin.

Ayon sa MPD, bumula ang bibig at nangitim ang mga kamay ni Josefina matapos kumain ng mami na itinitinda ng kanilang kapitbahay na si Joy Dela Vega Bernando, 45 anyos sa Gapan street.

Nakaranas din nang pagkahilo, pagsusuka at pananakit ng tiyan ang iba pang biktima.

Kabilang din si Bernardo at asawa nito maging ang ina ni Josefina na si Levita sa mga isinugod sa ospital at hinihinalang na-food poison.

Samantala, inihayag ni Aner De La Vega, ina ni Joy, na wala namang ibang inihalong ibang sangkap ang kanyang anak lalo’t halos dalawang dekada na itong nagtitinda ng mami.

Humihingi naman ng paumanhin si De La Vega sa mga biktima at handa rin anya silang makipagtulungan sa mga otoridad.