Drew Nacino

Ipa-prayoridad ni Pangulong Ferdinand “Bongbong” Marcos Junior ang pagtatayo ng mga karagdagang ospital at health center.

Kabilang ito sa mga inilatag ni Pangulong Marcos sa kanyang kauna-unahang State of Nation Address (SONA), kahapon.

Ayon sa pangulo, kailangang palakasin ang Health Care System ng bansa sa gitna ng COVID-19 pandemic at iba pang nagbabadyang health crisis.

Hindi lamang anya dapat sa National Capital Region ilagay ang mga naglalakihang ospital kundi maging sa iba pang bahagi ng bansa.

Inilatag na ni Pangulong Ferdinand “Bongbong” Romualdez Marcos Junior ang kanyang mga plano para sa bansa sa kanyang kauna-unahang State of the Nation Address (SONA), kahapon.

Dakong alas-4:00 ng hapon nang magsimula ang SONA na tumagal ng isang oras at labing-apat na minuto at dinaluhan ng mahigit 1,300 katao sa Batasan Pambansa Complex sa Quezon City.

Ito ang kauna-unahang beses sa nakalipas na dalawang taon na nagdaos ng full in-person SONA sa kongreso.

Kabilang sa mga isinulong ni Pangulong Marcos na legislative agenda ang mga planong may kaugnayan sa ekonomiya, agrikultura, kalusugan at imprasatraktura.

Sinisilip na ng Quezon City Police District (QCPD) ang mga posibleng security lapse ng Ateneo De Manila University matapos pagbabarilin ng isang lalaki sina dating Lamitan City Mayor Rosita Furigay at dalawang iba pa.

Ayon kay QCPD Director, Brig. Gen. Remus Medina, nakapagtatakang nakapagpuslit ng mga baril ang suspek na si Dr. Chao Tiao Yumul kahit pa may mga guwardya sa gate ng Ateneo.

Pag-aaralan din anya nila ang mga CCTV footage upang mas maging malinaw ang imbestigasyon at mapalakas ang kaso laban sa suspek.

Labing pito ang nasawi, kabilang ang isang sanggol matapos lumubog ang isang bangka sa Bahamas Islands.

Pawang mga Haitian migrant ang sakay ng nasabing vessel na nagtangkang makarating ng US upang matakasan ang gang violence at kahirapan sa kanilang bansa.

Ayon kay Bahamian Prime Minister Philip Davis, dalawampu’t lima naman ang narescue ng mga otoridad habang mayroon pang hindi mabatid na bilang ng mga nawawala.

Batay sa imbestigasyon ay posibleng speedboat ang sinakyan ng mga biktima patungong Miami, Florida sa Estados Unidos.

Overloading ang pinaniniwalaang sanhi ng trahedya habang hinihinalang bahagi ito ng human smuggling operation.

Pinangangambahang magmamahal pa ang mga matamis na pagkain sa gitna ng patuloy na pagtaas ng presyo ng asukal.

Sa datos ng Sugar Regulatory Administration (SRA), aabot na sa 115 pesos ang presyo ng refined sugar sa mga pamilihan, lalo sa Metro Manila.

Ito na ang ikatlong sunod na linggong nasa 100 peso per kilo level ang presyo ng nasabing produkto kumpara sa 89 hanggang 95 pesos per kilo noong unang linggo ng hulyo.

Dahil dito, pinayuhan ni Bangko Sentral ng Pilipinas (BSP) Monetary Board Member Bruce Tolentino ang publiko na dapat maghanda sa mas mahal na sweet food products.

Ayon kay Tolentino, dating Undersecretary ng Agriculture, matagal nang mataas ang presyo ng asukal pero lalo pa itong nagmahal kumpara sa ating mga karatig bansa, gaya ng Vietnam at Thailand.

Inihayag naman ni Roehlano Briones, Senior Research Fellow sa Philippine Institute for Development Studies (PIDS), na ang presyo ng asukal sa Pilipinas na ang pangalawang pinaka-mahal na sweetener sa mundo, matapos ang Oman.

Muntik makatakas ang dalawang menor de edad na suspek sa panggagahasa at pagpatay sa pitong taong gulang na babae sa San Pedro City, Laguna.

Ayon sa City Social Welfare Development (CSWD) ng San Pedro, nakatakas ang dalawang suspek noong Hulyo 15.

Gayunman, muling naaresto ng mga pulis at barangay tanod ang 16 anyos na suspek kinabukasan pero itinanggi niyang tumakas siya.

Sunod na nadakip ang 17 anyos na suspek pero inilagay muna ito sa isolation facility makaraang tamaan ng COVID-19

Ayon sa San Pedro City Police, ililipat ang dalawa sa Calauan sa sandaling gumaling na sa COVID-19 ang isang suspek.

Samantala, pinuna ng pulisya ang kaluwagan ng CSWD kaya nakalabas ang dalawa.

Dapat tutukan ni Pangulong Bongbong Marcos sa kanyang unang State of the Nation Address (SONA) ang mga plano para sa ekonomiya, partikular as Build, Build, Build Program.

Ito ang inihayag Employers Confederation of the Philippines (ECOP) President Sergio Ortiz-Luis sa gitna ng tumataas na presyo ng mga bilihin at serbisyo sa bansa.

Ayon kay Ortiz-Luis, nais nilang marinig ang mga detalyadong plano ng pangulo sa agrikultura, lalo sa produksyon ng pagkain at paano mababawasan ang importasyon.

Pagdating naman sa labor issue, dapat anyang i-prayoridad ng pangulo ang paglikha ng mas maraming trabaho.

Hindi pa matiyak ng MMDA kung papayagang makapagtayo ng mga entablado ang mga grupong magkikilos-protesta at suporta sa unang State of the Nation Address (SONA) ni Pangulong Bongbong Marcos.

Ayon kay MMDA Traffic Chief Bong Nebrija, ang Quezon City Local Government (QC LGU) ang magpapasya sa naturang issue.

Gayunman, mas maiging masolusyonan agad anya ang perwisyong idudulot sa daloy ng trapiko ng mga demonstrasyon, lalo sa Commonwealth Avenue.

Ipinunto ni Nebrija na hangga’t maaari ay hindi nila nais mabalam ang biyahe ng mga motorista, partikular ang mga dumaraan sa Commonwealth o iba pang kalsada sa paligid ng Batasan Pambansa.

Pinayagan naman ng Quezon City Local Government (QC LGU) na magsagawa ng rally at kilos-suporta ang mga anti at pro-Marcos group sa unang State of the Nation Address (SONA) ni Pangulong Ferdinand “Bongbong” Marcos, Junior.

Gayunman, nilinaw ni Quezon City Police District Director, Brig. Gen. Remus Medina na hindi naman pinayagang makalapit sa Batasan Pambansa ang mga magsasagawa ng rally.

Tanging sa bahagi ng Commonwealth Avenue at Tandang Sora anya maaaring magdaos ng aktibidad ang mga grupong sumusuporta at kumokontra sa Marcos administration.

Umaapela naman si Medina sa mga raliyista na iwasang magsunog ng mga effigy o magkalat sa mga lugar na pagdarausan nila ng mga aktibidad.

Sampung lalawigan na ang nakapagtala ng “very high” COVID-19 positivity rates o mahigit 20% hanggang nitong July 22 kumpara noong July 16.

Tinukoy ng grupong OCTA Research ang mga probinsya ng Aklan, 32.6%; Capiz, 31.9%; Nueva Ecija, 30.5%; Isabela, 27.8%; Pampanga, 26.1%; Laguna, 26%; Cavite, 24.5%; Tarlac, 24%; Rizal, 22.8% at Antique, 22.2% positivity rate.

Ayon kay OCTA Research Fellow, Dr. Guido David, sumampa rin sa 14% ang one-week positivity rate sa National Capital Region noong July 22 kumpara sa 12.7% noong July 16.

Ang NCR din ang may pinaka-maraming bagong COVID-19 cases sa lahat ng rehiyon 1,327 hanggang kahapon.

Mayorya o 274 new cases ay naitala sa Quezon City; sinundan ng Manila, 159; Makati, 150; Taguig, 121; Parañaque, 114; Pasig, 100 at Las Piñas, 86.

Samantala, sumampa naman sa 16% ang daily positivity rate sa Metro Manila.