Drew Nacino

Limang hindi pa nakikilalang kalalakihan ang pinagbabaril sa bayan ng Doña Remedios Trinidad, Bulacan.

Ayon kay Capt. Eugenio De Ramos, hepe ng Doña Remedios Trinidad Police, naganap ang krimen sa liblib na bahagi ng barangay Camachile dakong alas-10:30 ng umaga kahapon.

Magtatabas lamang anya sana ng damo ang mga biktima sa isang bakanteng lote na napag-alamang subject ng land dispute.

Batay sa imbestigasyon, isang kasama ng mga biktima ang maghahatid sana ng pananghalian, subalit pawang mga bangkay na ang naabutan nito pasado alas-11.

Isang saksi naman na naninirahan malapit sa nabanggit na lugar ang nakarinig ng mga putok ng baril dakong alas-10:30 ng hapon.

Inaalam na ng awtoridad kung ano ang motibo at sino ang posibleng nasa likod ng krimen.

Muling nakapagtala ng tatlong volcanic earthquake sa paligid bulkang Kanlaon sa Negros Island.

Ayon sa Phivolcs, naitala ang mga pagyanig sa nakalipas na 24-oras.

Nagbuga rin ng mahinang usok sa Timog-Kanluran at Hilagang-Kanluran ng Kanlaon.

Mahigpit namang ipinagbabawal ng Phivolcs ang pagpasok sa 4-kilometer radius Permanent Danger Zone (PDZ) sa paligid ng bulkan dahil sa banta ng pagsabog at nagbabala sa posibleng biglang pagputok nito.

Sa kabila nito, nananatili sa Alert level 1 ang nasabing bulkan.

Pinapurihan ng mga agricultural group ang commitment ni Pangulong Bongbong Marcos na i-modernize ang sektor ng agrikultura at suportahan ang mga magsasaka sa pamamagitan ng subsidiya.

Sa kanyang unang State of the Nation Address kahapon, tiniyak ni Pangulong Marcos na ipa-prayoridad ng gobyerno ang procurement ng farm inputs para sa mga magsasaka sa murang halaga.

Kabilang sa mga farm inputs ang fertilizers, pesticides, binhi, feeds at krudo, na mahalaga sa pagiging produktibo ng agricultural sector.

Ayon kay Samahang Industriya ng Agrikultura executive director Jayson Cainglet, binigyang-diin ng Pangulo ang problema sa mataas na presyo ng pagkain dahil sa mas mahal na produksyon.

Ang pinaka-malaki anyang hamon para sa bansa ay mas mataas na local production.

Kuntento naman si Philippine Chamber of Agriculture and Food Incorporated President Danilo Fausto sa mga inilatag ni Pangulong Marcos, pero kanilang aabangan ang implementasyon ng mga ipinangako nito sa SONA.

Gayunman, hindi tinalakay ng Punong Ehekutibo ang rice tariffication law bilang bahagi ng kanyang legislative agenda bagay na inasahan ng stakeholders at iba pang grupo sa sektor ng agrikultura.

Patuloy sa pagtaas ang mga kaso ng COVID-19 sa Metro Manila, subalit hindi pa ito umaabot sa rurok o peak.

Ayon kay OCTA research fellow, Dr. Guido David, nasa average 1,033 additional cases kada araw ang naitala sa National Capital Region simula July 18 hanggang 24.

Dahil dito ay nananatili aniya sa ilalim ng moderate risk classification ang NCR.

Gayunman, ang nasabing bilang ay sumasalamin sa increase mula sa seven-day average na 829 new infections na naitala simula July 11 hanggang 17.

Idinagdag pa ni David na nananatiling “flat” ang one-week growth rate sa Metro Manila sa nakalipas na tatlong linggo.

Nasa 25% naman ang COVID-19 growth rate sa Metro Manila noong isang linggo nangangahulugang bagaman tumataas, moderate naman ang increase rate o flat growth rate kaya’t hindi pa malinaw kung kailan naganap ang peak ng cases.

Aabot na sa mahigit 2.8 milyong estudyante ang nakapag-enroll sa unang araw ng enrollment sa iba’t ibang bahagi ng bansa para sa School Year 2022-2023.

Ayon sa Department of Education, ang nasabing bilang ay naitala dakong ala-7:30 kagabi kumpara sa mahigit 1.4 milyon dakong alas-3:30 ng hapon.

Wala namang napaulat na major issues o untoward incidents ang DepEd sa nationwide enrollment.

Pinasalamatan din ng kagawaran ang lahat ng personnel, volunteers at stakeholders sa maayos na proseso ng enrollment.

Tiniyak naman ng DepEd ang patuloy na suporta sa lahat ng field offices at paaralan nito para sa buong enrollment period sa gitna nang inaasahang mataas na turnout para sa nasabing school year.

Magsisimula ang School Year 2022-2023 sa August 22 ngayong taon at magtatapos sa July 7, 2023 habang itinakda ang blended learning at full-distance learning sa October 31.

Gayunman, dapat ay nag-transition na ang lahat ng public at private schools sa limang araw na in-person classes simula November 2.

Umabot na sa mahigit 600 ang dengue cases sa Western Visayas sa loob lamang ng isang linggo.

Inihayag ng Department of Health-Region 6 na simula July 10 hanggang 16, sumampa na sa 674 ang tinamaan ng nasabing sakit.

Pinakamaraming naitala sa lalawigan ng Negros Occidental, 230 na sinundan ng Iloilo, 161 at Antique, 118.

Lima naman ang namatay sa nasabing panahon kabilang ang dalawa sa Antique habang tig-isa sa Iloilo, Bacolod at Negros dahilan upang umakyat na sa 37 ang death toll simula Enero ngayong taon.

Sa kabuuan, lumobo na sa 6,856 ang dengue cases sa rehiyon mula Enero hanggang Hulyo 16 at posibleng lumampas pa ng 7,000 ngayong linggo.

Ipinag-utos din ni Pangulong Ferdinand “Bongbong” Marcos Jr.ang pag-isyu sa 30 milyong physical cards at 20 milyong digital ID ng Philippine Identification System (PhilSys).

Inihayag ni Pangulong Marcos sa kanyang unang State of the Nation Address na target makamit ang issuance ng nasa 92 million ID sa kalagitnaan ng 2023.

Isinulong din ng Punong Ehekutibo ang digitalization ng lahat ng

Isa-isang inilatag ni Pangulong Bongbong Marcos Jr. ang kanyang mga plano para sa pagbangon ng ekonomiya ng bansa sa kanyang kauna-unahang State of the Nation Address.

Sa mahigit isang oras na talumpati ni Pangulo Marcos, pangunahing isinulong nito ang pagsasaayos ng sistema ng buwis.

Para anya makatulong sa ekonomiya, sisingilin na ng pamahalaan ng value added tax ang mga digital service provider.

Ayon sa Punong Ehekutibo, dapat ibatay ang tax system ng gobyerno sa mabilis na pagbabago sa digital economy.

Gagawin na ring simple ang paraan ng pangongolekta ng buwis upang mas maging madali ang pagbabayad.

Ipinanawagan ni Pangulong Bongbong Marcos Jr. sa Kamara na gawing prayoridad ang pagpasa sa National Government Rightsizing Program at tax reform measures.

Binigyang-diin ni Pangulong Marcos na makatutulong ang rightsizing para pagbutihin ang institutional capacity ng gobyerno upang magawa nito ang mandato at makapaghatid ng mas magandang serbisyo habang tinitiyak ang epektibong paggamit ng resources.

Kaugnay naman sa tax reforms, itinutulak ni PBBM ang valuation reform bill na magtatakda ng real property values at valuation standards sa buong bansa at ang real property information system na magsisilbing database ng lahat ng real property transactions at declarations.

Samantala, isinusulong din ni Marcos ang pagpasa sa passive income and financial intermediary taxation act na magpapadali sa revenue neutral tax system ng financial sector.

Inatasan na ni Pangulong Bongbong Marcos ang Departments of Migrant Workers at Information and Communications Technology na iprayoridad ang automation ng mga kontrata ng mga Overseas Filipino Workers (OFW).

Sa kanyang kauna-unahang State of the Nation Address (SONA) kahapon, nais din ni Pangulong Marcos na magkaroon ng Overseas Employment Certifications (OECs) ang mga OFW sa kanilang mobile phones.

Ipaprayoridad din ang pagpapalawak ng proteksyon sa kapakanan ng mga filipino na nagta-trabaho sa ibang bansa sa pamamamitan ng pagputol sa bureaucratic red tape.

Tinawagan din ng pansin ng punong ehekutibo ang Department of Foreign Affairs (DFA) upang tulungan ang DMW na tiyaking makahahanap ng mga bagong oportunidad ang mga OFW na nawalan ng trabaho noong mga nakaraang taon.