Drew Nacino

Plano ng Department of Trade and Industry (DTI) na magpatupad ng 6% hanggang 8% increase sa presyo ng mga nasa 30% ng total basic goods na nakalathala sa suggested retail price bulletin.

Ayon kay DTI Undersecretary for Consumer Protection Ruth Castelo, pinag-aaralan pa nila ang mga petisyon para sa price hikes mula sa mga manufacturer pero hindi lahat ng commodities ang maaaring magpatupad ng dagdag-presyo.

Ito, anya, ay upang mayroon pa ring mapagpilian ang mga consumer.

Kabilang sa mga inaasahang magkakaroon ng minimal price hike ang tinapay, de latang isda, bottled water, processed milk, instant noodles, kape, asin, sabong panlaba, kandila, harina;

Processed at canned meat, processed at canned beef, suka, patis, toyo, toilet soap at baterya.

Nakikipag-ugnayan na ang Department of Education sa Department of Public Works and Highways upang tiyaking handa ang mga paaralan sa pagsisimula ng school year 2022–2023 sa Agosto 22.

Ayon kay DepEd Spokesperson, Atty. Michael Tan Poa, magkakaroon ng Inter-Agency Coordination alinsunod sa pahayag ni Pangulong Bongbong Marcos sa SONA nito na dapat ng bumalik sa in-person classes.

Mayroon pa anyang ilang bagay na kailangang ilatag sa DPWH bilang paghahanda sa academic year.

Sa panig naman ni Vice President at Education Secretary Sara Duterte, tiniyak nitong makikipagtulungan sa national at local government, private sector at international stakeholders upang madagdagan ang investment sa edukasyon.

Magsisimula ang school year 2022-2023 sa Agosto 22 at magtatapos sa Hulyo 17 ng susunod na taon.

Pinagtibay na ng Sandiganbayan 4th Division ang pagbasura sa 200 billion peso civil case kaugnay sa assets at properties ng pamilya Marcos, na karamiha’y narekober ng gobyerno sa mga nakalipas na taon.

Sa 12 pahinang July 22 Resolution, ibinasura ng Anti-Graft Court ang Motion for Reconsideration ng Presidential Commission on Good Government para  baligtarin ang December 16, 2019 ruling na nag-dismiss naman sa kanilang hirit na reversion, reconveyance, restitution at accounting ng umano’y 200 billion peso ill-gotten wealth ng mga Marcos.

Ang naturang resolusyon ay pinonente ni 4^th Division Chairman Alex Quiroz na sinang-ayunan nina Associate Justices Maria Theresa Mendoza-Arcega at Maryann Corpus-Mañalac.

Bago ang December 16, 2019 ruling, ipinag-utos na ng Sandiganbayan sa p.c.g.g. na magsumite ng report sa status ng properties na sinusubukang marekober sa mga nasasakdal.

Ipinunto ng korte na ang pagbasura sa buong complaint alinsunod sa best evidence rule ay hindi “warranted” lalo’t karamihan sa mga ari-arian ay matagal nang narekober ng pamahalaan.

Kabilang sa mga narekober ay shares of stock sa ilalim ng IRC Group of Companies na ibinigay sa gobyerno sa pamamagitan ng compromise agreement kay Jose Campos noong 1994;

526 pieces ng sequestered art collections na nasa kustodiya na ng Bangko Sentral ng Pilipinas at 111,415 shares ng PLDT sa PTIC na idinispose noong 2006 sa pamamagitan ng public bidding pabor sa Metro Pacific Assets Holdings sa halagang 25.2 billion pesos.

Itinuturing na ng Philippine National Police na sarado na ang kaso ng pamamaril sa Ateneo De Manila University.

Ito ang inihayag ni Quezon City Police District Office Director, Brig. Gen. Remus Medina makaraang sampahan ng patong-patong na kasong kriminal laban sa suspek na si Dr. Chao Tiao-Yumol.

Si Yumol, ang bumaril at pumatay sa mga biktimang sina dating Lamitan City Mayor Rosita “Rose” Furigay at dalawang iba pa habang nasa graduation ceremony ng Ateneo Law School noong July 24.

Bukod sa 3 counts ng murder at frustrated murder, nahaharap din si Yumol sa kasong paglabag sa Anti-Carnapping Act of 2016, Comprehensive Law on Firearms and Ammunition at Malicious Mischief.

Isinampa ang mga nasabing kaso ng QCPD at PNP sa Quezon City Prosecutor’s Office noong Lunes ng gabi.

Kasalukuyang nasa kustodiya ng QCPD si Yumol na nakapiit sa Camp Caringal.

Bukod kay Furigay, patay din sa pamamaril ang executive assistant nitong si Victor Capistrano at security guard ng paaralan na si Jeneven Bandiala habang sugatan ang anak ng dating alkalde na si Hannah, na kabilang sa mga graduates ng Ateneo Law School.

Naglunsad ng donation drive ang Ateneo De Manila University upang matulungan ang pamilya ni Jeneven Bandiala, ang security guard na kabilang sa tatlong pinaslang matapos ang shooting incident sa loob ng campus noong linggo.

Sa isang facebook post, binuksan na ng Ateneo ang kanilang “Scan-To-Pay” Donation Channel para sa mga naulila ni Bandiala.

Maaaring ipadala ang mga donasyon sa pamamagitan ng Gcash, Grabpay, BDO online, PNB online, BPI online, RCBC online at Unionbank online.

Nagsasagawa rin ng hiwalay na fund raising activity ang Ateneo Law Student Council para sa pamilya ni Bandiala.

Layunin ng donasyong malilikom na maka-agapay sa funeral at burial services ni Jeneven at bilang suporta sa naulilang pamilya.

Nagpapasaklolo na ang ilang Overseas Filipino Workers (OFW) sa Macau makaraang maapektuhan ang kanilang hanapbuhay ng COVID-19 restrictions.

Ayon sa Department of Migrant Workers (DMW), nasa 5,000 hanggang 26,000 OFW sa Macau ang apektado ng panibagong restrictions.

Ilan sa kanila, wala na umanong pambili ng pagkain kaya’t nakikipag-agawan na pagkaing ibinibigay sa isang restaurant.

Karamihan sa mga apektado ang mga nagtatrabaho sa commercial at industrial sector na tigil-operasyon dahil sa muling pagtaas ng COVID-19 cases habang ang mga nasa food businesses, groceries at essential services lamang ang pinapayagang mag-operate.

Inihayag ni DMW Spokesperson Toby Nebrida na sinimulan na nilang magkaloob ng financial assistance na 50 dollar vouchers upang ipambili ng pangangailangan ng mga OFW.

Nagkakaloob din ng 200 dollar one time assistance sa mga tatamaan ng COVID-19.

Samantala, tiniyak naman ni Nebrida na nakikipag-ugnayan na sila sa mga Filipino Overseas Labor Offices upang matulungan ang mga apektadong OFW.

Personal na away ang nakikitang motibo sa pagpatay sa limang mananabas sa bayan ng Doña Remedios Trinidad, Bulacan.

Kinilala ang mga biktimang sina Pampilo Bonaga, 55 anyos; Carlito Servano, 48; Pola Servano, Antonio Servano, 45 anyos at Angelo Del Castillo pawang residente ng Sitio Armstrong, Barangay Camachile.

Gayunman, aminado ang Doña Remedios Trinidad Municipal Police na hirap silang makakuha ng saksi dahil sa lawak ng kagubatan na pinangyarihan ng krimen.

Naniniwala naman ang mga kaanak nina Bonaga na naipit ang limang biktima sa land dispute bagay na itinanggi ng may-ari ng lupa dahil maging sila ay nagulat sa insidente at payag makipagtulungan sa imbestigasyon ng kaso.

Batay sa imbestigasyon, dakong alas-10:30 ng umaga noong linggo nang makarinig ng magkakasunod na putok ng baril sa nabanggit na lugar.

Samantala, bumuo na ang pulisya ng joint investigation team sa naturang insidente.

Hindi na umano mararanasan sa administrasyong Marcos ang agresibong pangungutang sa panahon noong administrasyong Duterte dahil sa COVID-19 pandemic, na nagdala sa pinakamataas na utang sa nakalipas na 17 taon.

Ito ang inihayag ni Finance Secretary Benjamin Diokno matapos ang State of the Nation Address (SONA) ni Pangulong Ferdinand “Bongbong” Marcos Junior.

Kinatigan ni Diokno ang pangako ni pangulong Marcos sa unang SONA nito na ang utang ng bansa ay mas mababa sa 60% debt-to-gross domestic product ratio pagsapit ng 2025.

Naniniwala ang kalihim sa mga financial reform ng kasalukuyang administrasyon tulad ng Tax Reform for Acceleration and Inclusion at Corporate Recovery and Tax Incentives para sa mga batas ng enterprises.

Hanggang nitong katapusan ng Mayo, umabot na sa 12.4 trillion pesos ang natitirang utang ng gobyerno, kung saan pinaka-malaki o 8.66 trillion pesos ay domestic debt habang 3.83 trillion ay foreign debt.

Aprubado na ng European Commission ang isang bakuna sa bulutong upang gamitin laban sa monkeypox virus matapos ideklara ng World Health Organization ang monkeypox bilang global health emergency.

Ayon sa Danish drugmaker na Bavarian Nordic, nasa 1.5 milyong doses ng Imvanex ang isu-supply nila sa mga European Union member states.

Ang Imvanex ay naaprubahan sa EU mula noong 2013 kontra bulutong at itinuturing na potensyal na bakuna para sa monkeypox dahil sa pagkakatulad nito sa smallpox virus.

Noong Sabado, idineklara ng WHO na ang pagkalat ng monkeypox bilang isang global health emergency, ang pinakamataas na alarma na maaari nitong ipataw.

Muling nagkampyon sa katatapos lamang na FIBA Asia Cup ang Australia matapos malusutan ang Lebanon sa score na 75-73.

Dahil dito, sinelyuhan ng Lebanon ang ikalawang puwesto makaraan ang paghaharap nila ng Boomers sa Istora Senayan Gymnasium sa Jakarta, Indonesia.

Kumamada ng 14 points at 8 rebounds ang NBA veteran bigman na si Thon Maker para sa Australia.

Tinalo naman ng New Zealand ang Jordan sa score na 83-75 sa naunang laro upang makuha ang third spot.