June 2026

Magsasagawa na ng public hearing ang Commission on Elections o COMELEC para sa gagawing botohan sa mga shopping malls.

Ayon kay COMELEC Chairman Andres Bautista, gaganapin ito sa November 27, alas-10:00 ng umaga sa Palacio del Gobernador sa Maynila.

Sinabi ni Bautista na nais nilang marinig ang panig ng publiko kaya’t magiging bukas ito para sa lahat ng mga partido.

Una nang nanawagan sa COMELEC si Senate Electoral Reforms Comittee Chairman Koko Pimentel na huwag nang ipursige ang konsepto ng botohan sa mga malls dahil wala itong legal na basehan.

Sinasabing aabot sa 2 milyong botante ang masasaklaw ng mga botohan sa malls.

By Jelbert Perdez 

Lalong lumakas ang loob ng gobyerno na isulong ang laban sa West Philippine Sea sa U.N. Arbitral Tribunal.

Ito’y bunsod na rin ng inaning suporta mula sa mga lider na dumalo sa katatapos lamang na Asia Pacific Economic Cooperation Summit.

Sinabi ni Presidential Communications Secretary Sonny Coloma na sa simula pa man ay hindi nila inisip na makipagsabayan sa China sa isyu ng military capability kaya mas piniling idaan ito sa International Tribunal.

Mismong sina US President Barack Obama, Japanese Prime Minister Shinzo Abe at Canadian Prime Minister Justin Trudeau ang nagsabing dapat igalang ang international law at mga prosesong ginagawa para sa mapayapang kalutasan ng territorial dispute sa West Philippine Sea.

By  Meann Tanbio | Aileen Taliping (Patrol 23) 

Lumakas muli ang bagyong nasa labas ng PAR o Philippine Area of Responsibility na may international name na Infa.

Ang bagyong Infa ay nasa typhoon category na at malaki ang tsansang maging super bagyo pa ito.

Ang nasabing bagyo ay pinakahuling namataan sa mayong mahigit 2,000 kilometro silangan ng Mindanao.

Taglay ng bagyo ang lakas ng hanging umaabot sa 140 kilometro kada oras malapit sa gitna at may pagbugso na umaabot sa 170 kilometro kada oras.

Ang bagyong Infa ay kumikilos pa kanluran, hilagang kanluran sa bilis na 20 kilometro kada oras.

Inaasahang bukas, linggo o sa Lunes papasok ng PAR ang nasabing bagyo na papangalanang Marilyn.

Ayon kay Joint Typhoon Warning Center, hindi naman tatama sa alinmang bahagi ng kalupaan ng bansa ang nasabing bagyo kung magtutuluy-tuloy sa kasalukuyang takbo nito.

By  Judith Larino 

Binuksan na ang lahat ng mga kalsada na isinailalim sa lock down dahil sa APEC Summit.

Ayon sa Metropolitan Manila Development Authority (MMDA), accessible na sa mga sasakyan matapos buksan bandang alas-2:30 ng hapon kahapon.

Hinintay lang na makaalis ng bansa ang lahat ng mga APEC Leaders bago ito binuksan.

Kabilang sa mga isinarang kalsada sa panahon ng APEC ang buong Roxas Boulevard, Edsa-Ayala Makati hanggang Edsa extension sa Pasay, Macapagal Avenue mula ASEANA hanggang Buendia Extension, EDSA Magallanes Interchange, at Metro Manila Skyway o Sales hanggang Magallanes Exit.

By  Meann Tanbio