June 2026

Nangako ang pamahalaan ng New Zealand na magdo-donate ito ng halagang P159 milyon sa Philippine Red Cross o PRC.

Sa inagurasyon ng bagong Logistics and Training Center ng Red Cross sa Mandaluyong City, sinabi ni PRC Chairman Richard Gordon na nagsimula ang magandang relasyon at tulungan ng 2 bansa bago pa man nanalasa ang bagyong Yolanda.

Nagtungo rin si New Zealand Prime Minister John Key sa naturang training center na nasa likod lamang ng PRC National Headquarters na paglalagakan ng mga relief goods at iba pang mga kagamitan ng ahensya.

By Jelbert Perdez  

Nagsibalikan na ang mga street dwellers sa Roxas Boulevard matapos ang APEC Summit kagabi.

Sinabi ng mga street dwellers sa isang panayam na panahon na upang bumalik sa boulevard dahil kailangan na nilang humanap ng pagkain at mapagkakakitaan.

Lalo’t tatlong araw silang pinagbawalan sa naturang lugar.

Ang mga street dwellers ay sinasabing itinago ng pamahalaan bilang bahagi umano ng pagpapapogi ng bansa sa mga delegado ng APEC.

Pero una na itong itinanggi ng DSWD at sinabing ang hakbang nilang iyon ay bahagi lamang ng kanilang Modified Conditional Cash Transfer Program.

By  Allan Francisco     

Nasakote ang notoryus na Abu Sayyaf Leader na nag-ooperate sa Basilan.

Kinilala ni Philippine Navy Commander Vincent Roy Trinidad, Chief of Staff ng Naval Forces sa Western Mindanao ang naarestong lider ng Abu Sayyaf na si Mhadie Umangkat Sahirin alyas “Madie”.

Ayon kay Trinidad, nadakip sa bisa ng warrant of arrest si Madie sa barangay Tugbungan dahil sa kasong murder.

By  Meann Tanbio

Ipinauubaya na ng PNP sa Bureau of Immigration (BI) ang pagsasampa ng kaso laban sa mga dayuhang nakilahok sa mga kilos protesta sa panahon ng APEC Summit.

Ayon kay APEC Security Task Force Spokesman Police Chief Supt. Wilben Mayor, isinumite na nila sa Immigration Bureau ang mga kaukulang ebidensya at pagkakilanlan ng mga dayuhan, kasama na rito ang mga larawan na lumabas sa mga pahayagan at maging sa social media.

Iginiit ni Mayor na batay sa umiiral na batas, walang karapatan ang mga dayuhan na sumali sa anumang political activity dito sa Pilipinas.

Ito’y sa kadahilanang hindi sila nagbabayad ng buwis sa Pilipinas kaya’t wala silang karapatan para kwestyunin ang mga nangyayari rito.

Kabilang sa nakitang kasama sa rally sa Buendia Avenue ay isang Canadian at isang Palestinian national.

By  Meann Tanbio | Jonathan Andal  

Pinasalamatan ng pamahalaan ang pagtutulungan ng lahat ng sektor para maging matagumpay ang pagdaraos ng APEC Summit.

Ito ang binigyang diin nina Philippine National Police (PNP) Chief Director General Ricardo Marquez, Office of the Deputy Director General for Security Natalio Ecarma, at DILG Undersecretary Peter Irving Corvera.

Binigyang-diin ng mga nabanggit na opisyal na gaya ng pulisya, media, pamahalaan at ang mga Pinoy mismo ang naging pangunahing susi upang maging matagumpay ang APEC Summit sa bansa.

APEC Security Task Force

Samantala, tila nabunutan ng tinik ang APEC security task force sa loob ng Multi-Agency Coordination Center sa Mall of Asia sa Pasay city matapos pormal nang nakalabas ng bansa ang lahat ng lider ng APEC.

Kuntento ang lahat ng miyembo ng security task force sa resulta ng Apec Summit.

Ikinuwento pa ni PNP Chief Director General Ricardo Marquez na may isang nag-aanunsyo sa loob sa harap ng lahat sa tuwing nakakalabas ng ligtas sa bansa ang bawat lider ng APEC at lahat aniya ay nag-chi-cheers.

Bukod kay Marquez, halata rin kina Office of the Deputy Director General for Security Natalio Ecarma at DILG official Peter Irving Corvera ang saya ngayong nakalabas ng bansa ang mga dumalong APEC leaders.

Ito’y kahit na may mga naunang APEC leader ang nagpahayag ng pangamba sa pagpunta rito sa Pilipinas.

By  Meann Tanbio | Allan Francisco