Dalawa ang patay habang dalawa ang sugatan matapos mahulog ang isang 10 wheeler truck sa isang tulay sa Maharlika Highway sa bayan ng Pagbilao, lalawigan ng Quezon kagabi.
Ayon sa MDRRMO o Municipal Disaster Risk Reduction and Management Office sa Pagbilao, kabilang sa mga nasawi ang driver ng nahulog na trak gayundin ang isa sa tatlong pahinante nito.
Habang ang nalalabing dalawang pahinante ay kritikal naman ang kundisyon at patuloy na inoobserbahan sa isang ospital sa lungsod ng Lucena sa Quezon.
Patungo sana sa Maynila ang naturang trak mula Bicol at binabagtas nito ang kalsada sa bahagi ng Barangay Malicboy nang mangyari ang aksidente.
Pahirapan naman sa mga rumespondeng awtoridad sa lugar ang isinagawang rescue operations dahil sa tindi ng pagkasira ng van na tila niyuping lata.
